|
 Azərbaycan
Dillər Universitetində (ADU) 2014-2015-ci tədris ilində
növbəti innovativ tətbiqin həyata keçirilməsi nəzərdə
tutulur. Belə ki, universitetə yeni daxil olmuş
tələbələr üçün kartlar Azərbaycan Respublikasının
Prezidenti yanında Vətəndaşlara Xidmət və Sosial
İnnovasiyalar üzrə Dövlət Agentliyi tərəfindən
hazırlanacaq. Bu məqsədlə ADU ilə Dövlət Agentliyi
arasında bu il fevralın 21-də imzalanmış niyyət
protokoluna əsasən mütəmadi tədbirlər həyata keçirilir.
ADU-nun ictimaiyyətlə əlaqələr depar
tamentindən AzərTAc-a bildirmişlər ki, Dövlət Agentliyi
tərəfindən hazırlanacaq tələbə kartları
çoxfunksiyalılığı ilə seçiləcəkdir. Kartlara ilk növbədə
çip və barkod yerləşdiriləcəkdir ki, bu da tələbənin
universitetə giriş və çıxış saatlarını, universitetdə
qalma müddətini təyin etməyə imkan verəcəkdir.
Yeni kartlar vasitəsi ilə təqaüdlərin alınması, tələbə
yeməkxanalarında yerləşdiriləcək xüsusi aparatlarda
ödənişlərin rahat aparılması, eyni zamanda, müasir
imkanlardan istifadə yolu ilə innovativ həllər təmin
ediləcəkdir.
Tələbələr kartların köməyi ilə kitabxanaların
xidmətindən faydalana biləcəklər. Gələcəkdə bu sistemin
nəqliyyatın intellektual idarəetmə mərkəzinə qoşulması
təmin edildikdən sonra kartlardan ictimai nəqliyyatda da
istifadə etmək mümkün olacaqdır.
Tələbələr yeni dərs ilinin əvvəlində kartları ödənişsiz
şərtlərlə əldə edə biləcəklər. |
