|
Son vaxtlar şagirdlərimizin bir sıra beynəlxalq fənn
olimpiadalarında uğurlar qazanaraq vətənə medallarla
qayıtmaları xoş bir ənənəyə çevrilib. Dünyanın müxtəlif
ölkələrində keçirilən bilik yarışlarında uğurlu
çıxışları ilə ölkəmizin təhsil sisteminin inkişafına öz
töhfələrini verən şagirdlərimiz Qazaxıstanın Astana
şəhərində təşkil olunan 45-ci Beynəlxalq Fizika
Olimpiadasında da (IPhO-2014) respublikamızı layiqincə
təmsil ediblər. Azərbaycan təhsilinin yetirmələri,
Azərbaycan Beynəlxalq Təhsil Mərkəzinin keçmiş "Dədə
Qorqud" və Gəncə liseylərinin şagirdləri Tural
Əliyev və Nurlan Avazlı bilik yarışmasında bürünc
medallara layiq görülərək üçrəngli bayrağımızı
yüksəklərə qaldırıblar. Bu il eyni zamanda Vyetnamda
keçirilən 46-cı Beynəlxalq Kimya Olimpiadasında
Beynəlxalq Təhsil Mərkəzinin keçmiş Gəncə liseyinin
11-ci sinif şagirdi Murad Rəhimov bürünc medal qazanıb.
Ağdaş liseyinin 11-ci sinif şagirdi Cavid Əhmədov isə
həvəsləndirici mükafat alıb. Qaliblərlə daha yaxından
tanış olaq.
"Güclü rəqiblərin olduğu mübarizədə bürünc medal
qazandım"
 Tural
ƏLİYEV
1999-cu il yanvarın 24-də anadan olub. I-VI sinifləri
165 nömrəli tam orta məktəbdə oxuyub. VII sinifdən
təhsilini "Dədə Qorqud", daha sonra Bakı liseyində davam
etdirib. 7-ci sinfin ilk rübündən başlayaraq fizika
fənni üzrə olimpiadaya hazırlaşmağa başlayıb.
Olimpiadaya hazırlıq müəllimi Rəşadət Qədiməliyev olub.
Tural orta məktəb illərində dərin biliyi, bacarığı,
məntiqi təfəkkürü ilə həmyaşıdlarından seçilib.
Müxtəlif illərdə keçirilən nüfuzlu bilik yarışlarında
qazandığı uğurlar bunu sübut edir.
- Liseydə Fuad Qarayevin rəhbərliyi ilə olimpiadaçılar
üçün təşkil olunmuş mərkəzdə hazırlaşırdıq. IX sinifdə
oxuyarkən Respublika fizika olimpadasında bürünc, X
sinifdə isə qızıl medal aldım. Bundan başqa, Azərbaycanı
bir neçə ölkədə təmsil etmək şansı əldə etdim. Bu il
Sinqapurda 15-ci Beynəlxalq Asiya Fizika (APHO)
olimpiadasında həvəsləndirici sertifikatla təltif
olundum. Cari ilin yanvarında Qazaxıstanda keçirilən X
Jautikov (İZHO) olimpiadasında gümüş medala layiq
görüldüm. Mənim üçün ən əhəmiyyətli və unudulmaz olan
isə Qazaxıstanda 86 ölkədən 374 məktəblinin iştirak
etdiyi 45-ci Beynəlxalq Fizika Olimpiadasında
(IPHO-2014) Azərbaycanın üçrəngli bayrağını
dalğalandırmaq imkanı qazanmağım oldu. Olimpiadada başqa
ölkələrdən (Qazaxıstan, Türkmənistan,Tacikistan,Türkiyə,
Honqkonq, Pakistan və b.) şagirdlərlə əlaqə saxladıq.
Onların arasında elələri var idi ki, artıq bir neçə
olimpiadada yarışırdıq. Güclü rəqiblərin olduğu
mübarizədə qalib gələrək bürünc medal qazandım.
"Öz ölkəmin bayrağını yüksəkliklərdə görmək qürurverici
haldır"
 Nurlan
AVAZLI
1996-cı il sentyabrın 18-də Goranboy rayonunun Todan
kəndində anadan olub. İlk təhsilinə Gəncədə Məhəmməd
Hadi adına 10 nömrəli tam orta məktəbdə başlayıb.
Məktəbin qabaqcıl müəllimlərindən Şamama Həsənovanın
Nurlanın təhsilində xüsusi əməyi olub. VI sinifdən
təhsilini Gəncə liseyində davam etdirib. Nurlan biliyi,
bacarığı, dərslərə hazırlığı və çalışqanlığı ilə
seçilib. O, bütün fənlərdən yüksək qiymət alsa da təbiət
elmlərinə daha çox maraq göstərib.
- VII sinfin ortalarından başlayaraq şagirdlər fənn
olimpiadalarına seçmək üçün riyaziyyat və məntiqdən
ümumi imtahan verirlər. Bu imtahanların nəticəsinə
müvafiq olaraq da ilk yerləri tutan şagirdlərə öz
istədikləri fənləri seçmək imkanı verilir. Uşaqlıqdan
təbiətə maraq göstərmişəm və daim onun sirlərini açmağa
çalışmışam. Məhz bu səbəbdən seçimim fizika oldu. IX
sinifdən başlayaraq olimpiadaçılar üçün ciddi hazırlıq
mərkəzinə gəldim. Olimpiada koordinatorumuz Fuad Qarayev
və fizika müəllimim Rəşadət Qədiməliyevin dəstəyi ilə
nüfuzlu beynəlxalq yarışlara hazırlaşmağa başladım.
Fərqli ölkələrdə keçirilən olimpiadalara getdim və onlar
arasında uğur qazandığım yarışlar oldu. Amma bütün
bunlar beynəlxalq olimpiadalara hazırlıq üçün bir növ
alternativ olimpiadalar idi. Beynəlxalq Fizika
Olimpiadası yay fəslində, daha dəqiq, hər il iyul ayında
fərqli ölkələrdə keçirilir. Bu il olimpiada Qazaxıstan
Respublikasında keçirildi və yarışmada 86 dövlət
iştirak etdi. Hər dövlətin fizika fənni üzrə ən güclü
məktəbliləri (X-XI sinif şagirdləri) bir araya gələrək
öz bacarıqlarını sübut etməyə çalışırdı. Olimpiadanın
birinci günü məktəblilər üçün ən çətin olan nəzəriyyə,
ikinci gün isə eksperimental imtahan keçirildi. Hər
imtahanda suallara cavab vermək üçün 5 saat vaxt
verildi. İmtahanda topladığımız ballara uyğun olaraq
da medallara layiq görüldük. Olimpiadalarda fərqli
ölkələrin namizədləri ilə ünsiyyət qurmaq mənə çox
maraqlı gəldi. 4 illik çalışmalardan və bir sıra
çətinliklərdən sonra bürünc medala layiq görüldüm
və canım qədər sevdiyim Azərbaycanın bayrağını
mükafatlandırma səhnəsində dalğalandırdım. Bayraqlar
arasında öz ölkəmin bayrağını yüksəkliklərdə
görmək, təbii ki, qürurverici haldır. Bundan sonrakı
həyatım və karyeram boyu da daim ölkəm və millətimə
xidmət edəcəyəm. Unutmamalıyıq ki, Azərbaycan fitri
istedadlar ölkəsidir.
Biz də fitri istedadlar ölkəsi olan Azərbaycanı
beynəlxalq olimpiadalarda layiqincə təmsil edən, öz
qələbələri ilə təhsilimizin uğurlarını artıran Nurlan
və Tural kimi gənclərimizlə fəxr edir və onlara
daha böyük müvəffəqiyyətlər arzulayırıq.
Beynəlxalq Kimya Olimpiadasının bürünc medalçısı 
Murad RƏHİMOV
1996-cı ildə Göygöl rayonunun Şəhriyar kəndində anadan
olub. 2002-ci ildə L.Məhərrəmov adına Şəhriyar kənd tam
orta məktəbinin birinci sinfinə gedib. VII sinifdən
təhsilini Azərbaycan Beynəlxalq Təhsil Mərkəzinin keçmiş
Gəncə liseyində davam etdirib. X sinifdən etibarən
kimya olimpiadasına qatılan Murad ötən il ilk dəfə
Özbəkistanda keçirilən 47-ci Beynəlxalq Mendeleyev
Olimpiadasında uğurla iştirak edərək vətənə bürünc
medalla qayıdıb. Həmçinin respublika olimpiadasında
bürünc medala layiq görülüb.
Bundan sonra 45-ci Beynəlxalq Kimya Olimpiadasında da
ölkəmizi uğurla təmsil edib. Moskva şəhərində 16
ölkədən 105 şagirdin iştirakı ilə keçirilmiş 48-ci
Beynəlxalq Mendeleyev Olimpiadasında bürünc medala layiq
görülüb. Murad cari il aprelin 28-də Rusiya
Federasiyası Tatarıstan Respublikasında keçirilən "Nobel
ümidləri" kimya olimpiadasında da iştirak edərək I yerə
layiq görülüb.
Qeyd edək ki, növbəti 47-ci Beynəlxalq Kimya Olimpiadası
gələn il ölkəmizdə keçiriləcək.
Bir ildə üç olimpiadanın qalibi olmuş istedadlı şagird
 Cavid
ƏHMƏDOV
1997-ci ildə Bakı şəhərində anadan olub. İbtidai
təhsilini İ.Hacıyev adına "Tərəqqi" texniki-humanitar
liseyində alıb. 2012-ci ilin dekabr ayında 33 ölkənin
iştirakı ilə Tehranda keçirilən yeniyetmələrin Təbiət
Elmləri Olimpiadasında bürünc medala, 2013-cü ildə
Daşkənddə keçirilən 47-ci Beynəlxalq Mendeleyev
Olimpiadasında 4-cü yerə, Nigeriyada keçirilən
Beynəlxalq Təbiət Elmləri Olimpiadasında isə qızıl
medala layiq görülüb. 2014-cü il mayın 11-18-də
Moskvada keçirilən 48-ci Beynəlxalq Mendeleyev
Olimpiadasında 2 nəzəri və bir praktik mərhələnin
nəticələrinə əsasən bürünc medala layiq görülüb.
Beynəlxalq olimpiadalarla yanaşı respublika kimya
olimpiadalarına da qatılan Cavid 2012-ci ildə 4-cü,
2013-cü ildə 3-cü və 2014-cü ildə isə 1-ci yeri tutaraq
qızıl medala layiq görülüb. Bu il aprelin 28-də Rusiya
Federasiyası Tatarıstan Respublikasında keçirilən "Nobel
ümidləri" kimya olimpiadasında iştirak edərək 1-ci yerə
layiq görülüb. Və bu olimpiadanın nəticələrinə görə
46-cı Beynəlxalq Kimya Olimpiadasında iştirak etmək
haqqını qazanıb.
Sonda ölkəmizi dünya bilik yarışmalarında təmsil edən
şagirdlərimizə daha yüksək zirvələri fəth etməyi arzu
edirik.
Oruc MUSTAFAYEV,
"Azərbaycan müəllimi" |
