|
Xəbər verildiyi kimi, iyulun 20-29 tarixlərində Vyetnam
Sosialist Respublikasının paytaxtı Hanoy şəhərində
məktəblilər arasında 46-cı Beynəlxalq Kimya Olimpiadası
başa çatıb. Dünyanın 77 ölkəsindən 291 məktəblinin
iştirak etdiyi yarışmanın bağlanış mərasimində
Olimpiadanın bayrağı ənənəyə uyğun olaraq Azərbaycan
nümayəndəsinə - M.V.Lomonosov adına Moskva Dövlət
Universitetinin Bakı filialının beynəlxalq əlaqələr
üzrə prorektoru, fizika-riyaziyyat elmləri doktoru,
professor Oqtay Tağıyevə təqdim olunub.
Beləliklə də məktəblilər arasında növbəti 47-ci
Beynəlxalq Kimya Olimpiadası 2015-ci ildə Bakıda
keçiriləcək. Beynəlxalq səviyyəli tədbirə MDU-nun Bakı
filialı ev sahibliyi edəcək. Olimpiadada dünyanın 80
ölkəsindən şagirdlərin iştirakı gözlənilir.
Qeyd edək ki, Azərbaycan MDB məkanında Rusiyadan
sonra Beynəlxalq Kimya Olimpiadasının keçirilməsi
hüququnu qazanmış ikinci ölkədir. Olimpiadanın Bakı
filialında keçirilməsi barədə qərar 2012-ci ildə
Vaşinqtonda Beynəlxalq Kimya Olimpiadasının İcra
Komitəsi tərəfindən qəbul olunub. Bu qərar əsası
2008-ci ildə qoyulmuş MDU-nun Bakı filialının beynəlxalq
nüfuzundan xəbər verir.
Oruc MUSTAFAYEV,
"Azərbaycan müəllimi" |
