|
 Avstraliyanın
Queensland Universitetinin tələbəsi Günay Gözəlova ilə
söhbət
Günay Gözəlova 1992-ci il fevralın 2-də Bakı
şəhərində anadan olub. 2009-cu ildə Bakıdakı 18
nömrəli tam orta məktəbi bitirib. Elə həmin il
yüksək balla Azərbaycan Dövlət İqtisad
Universitetinin beynəlxalq iqtisadi münasibətlər
fakültəsi nəzdində ingilis dilində fəaliyyət göstərən
Xüsusi İstedadlar Qrupuna daxil olub. Təhsil aldığı
müddətdə özünü çox çalışqan və məqsədyönlü bir
tələbə kimi göstərib. Praktiki fəaliyyətə də önəm
verərək dünyanın nüfuzlu kompaniyaları olan BP və
Ernst&Young kimi şirkətlərdə, 2011-ci ildə maliyyə
bazarları və təşkilatları proqramı üzrə Birləşmiş
Krallığın Susseks Universitetində (Sussex University),
daha sonra 2013-cü ildə siyasi iqtisad proqramı üzrə
Böyük Britaniyanın London Kral Kollecində (Kings
Kollege London) təcrübə keçib. Bu, əlbəttə ki, bir
tələbə üçün yüksək göstəricidir. Tələbəlik illərində
liderlik bacarığı ilə də seçilib. Universitetlərarası
keçirilən və aparıcı şirkətlərin sponsorluq etdiyi
"Bisness Case" yarışmasında məhz onun iştirak etdiyi
komanda birinci yeri tutub. Dəfələrlə ölkə səviyyəsində
keçirilən yarışlarda universiteti təmsil etdiyi üçün
rektorluq tərəfindən təltif olunub. Hazırda
"2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı" çərçivəsində
Avstraliyanın Queensland Universitetində magistr təhsili
alır. Beləliklə də rubrikamızın budəfəki qonağı Günay
Gözəlovadır.
-
Orta məktəb illərində uğurlarınız barədə. Xaricdə təhsil
almağa necə qərar verdiniz?
- Orta məktəbdə oxuyarkən sinif nümayəndəsi idim
və hesab edirəm ki, bu, mənim liderlik bacarıqlarımın
inkişafında önəmli rol oynayıb. Orta məktəbdə
ingilis və riyaziyyat fənlərinə daha çox maraq
göstərmişəm. Uğurlarım barədə deyə bilərəm ki, ingilis
dili üzrə məktəblərarası fənn olimpiadasının qalibi
olmuşam və universitetə qəbul imtahanında topladığım
yüksək bala görə fəxri fərmanla təltif olunmuşam.
Xaricdə təhsil almaq barəsində birinci kursdan
düşünürdüm, lakin ADİU tərkibində ingilis dilində
təhsil verən Xüsusi İstedadlar Qrupu olduğundan
planlarımı magistratura təhsilinə saxladım.
- 2013-2014-cü tədris ili üçün tələbələrin seçim prosesi
yaddaşınızda necə qalıb?
- Tələbələrin seçim prosesi kifayət qədər ədalətli,
şəffaf və professional şəkildə həyata keçirilir.
Xüsusilə 2013-cü ildən başlayaraq Dövlət
Proqramına qəbul prosesinə edilən dəyişikliklər
təqdirəlayiqdir. Dövlət Proqramı hər bir gəncə öz
potensialını aşkar etməyə və qiymətləndirməyə imkan
yaradır.
- Azərbaycanın təhsil sistemində aparılan islahatlar
barədə nə deyə bilərsiniz?
- Mən Azərbaycanda təhsilimi ADİU tərkibində aparıcı
fakültələrdən biri olan Xüsusi İstedadlar Qrupunda
almışam. Buna görə də özümü şanslı hesab edirəm.
Dərslər ingilis dilində xaricdə təhsil almış
mütəxəssislər tərəfindən həyata keçirilirdi və ümumi
olaraq təhsilin səviyyəsindən razı idim. Lakin
qloballaşma dövrünün tələblərinə uyğun olaraq bir sıra
ölkələrdə olduğu kimi, Azərbaycan təhsil sistemində də
islahatların aparılması vacibliyini danmaq olmaz.
Xüsusən də müəllim heyətinin peşəkarlıq
səviyyəsinin və ya onların ixtisasının artırılması
məsələsinə diqqət yetirilməsinin vacib olduğunu
düşünürəm. Hazırda Təhsil Nazirliyinin bu sahədə
apardığı islahatları dəstəkləyirəm və nəticələrinin
də yaxın gələcəkdə öz bəhrəsini verəcəyinə ümid
edirəm.
- Avstraliyadakı təhsil mühiti barədə fikirlərinizi
eşitmək maraqlı olardı...
- Əsası 1909-cu ildə qoyulmuş Avstraliyanın Queensland
Universiteti ölkənin 3-cü ən böyük şəhəri olan
Brizbanda yerləşir və dünyanın ən yaxşı 50
universiteti sırasında yer alır. İxtisasım informasiya
sistemlərinin idarə edilməsi üzrədir. Universitetdə
imtahan sessiyası bir ay ərzində başa çatır,
imtahanlar arasında bir neçə gün vaxt olur. Ona
görə semestr boyunca oxumaq lazımdır ki, materialı
təkrarlamağa vaxt qalsın.
- Universitetdə dərs prosesi necə təşkil olunub?
- Təhsil ocağında işgüzar mühit hökm sürür. Müəllimlər
və tələbələr arasında asılılıq demək olar ki, sıfır
səviyyəsinə endirilib. Dərslərdə iştirak müstəqil
seçimdir və buna görə heç kimin qiyməti
kəsilmir. Yalnız laboratoriya seminarları istisnalıq
təşkil edir. Təhsil sistemi tamamilə
elektronlaşdırılıb, mühazirəyə getmədən də evdən
online mühazirəni izləmək mümkündür. Tələbə
məsləhət saatlarına gedib çətinlik çəkdiyi hissəni
müəllimlə müzakirə edə bilər.
- Xaricdə təhsilin hansı üstünlüklərini qeyd edə
bilərsiniz?
- Xaricdə yaşamaq və təhsil almaq hər bir
insanın dünyagörüşünün artmasında çox mühüm rol
oynayır. Müxtəlif ölkələrin, mədəniyyətlərin
nümayəndələri ilə ünsiyyətdə olarkən hər dəfə
yeni bir şey öyrənmiş oluram. Həmçinin belə bir
təcrübə stereotiplərin aradan qalxmasına və
tolerantlığın artmasına da səbəb olur. Oxuduğum
universitet aparıcı təhsil ocaqlarından biri
olduğuna görə dünya standartlarına uyğun təhsil
almağım da biliklərimin möhkəmlənməsinə, ixtisasıma
incəliklərinə qədər yiyələnməyimə səbəb olur.
Tələbələrə xaricdə oxuduqları müddətdə iş
imkanları axtarmağı da məsləhət görürəm, çünki bu
onların praktikada öz biliklərini tətbiq etməyə,
həmçinin yeni bir mühitdə çətinliklərin qarşısını
almaqda çox köməklik göstərəcəkdir.
- Xaricdə təhsil alan bir gənc kimi, sizcə, təhsildə
uğur əldə etmək üçün nələr tələb olunur?
- Yuxarıda qeyd etdiyim səbəblərə görə xaricdə
təhsil almağın tələbəyə çox böyük üstünlük
verdiyini düşünürəm. Lakin təhsil son deyil, ilk
öncə tələbələr hansı sahəyə həvəsli olduqlarını
müəyyən edib, həmin sahəyə uyğun təhsil almağa
başlasalar daha yaxşı olar. Məsələn, mən öz
bakalavr ixtisasımdan fərqli sahədə təhsil alıram,
çünki zamanla başa düşdüm ki, həmin sahə üzrə
çalışmaq istəmirəm. İkinci bir məsələ tələbələrin
özlərini sərbəst inkişaf etdirmə bacarıqlarına
sahib olmalarıdır. Məktəbi bitirdikdən sonra hər
birimiz özümüzü sərbəst fərd kimi qəbul etməliyik
və oxumağa bir məcburiyyət kimi yox, ehtiyac kimi
yanaşmalıyıq.
- Dərsdənkənar vaxtlarınızı necə təşkil edirsiniz?
- Dərslər və sosial həyat arasında balans
qurmağa çalışıram. Həmçinin fiziki cəhətdən də
aktiv qalmaq mənim üçün çox vacibdir, ona görə
idmanla məşğul olmağı ancaq asudə vaxtlarıma
saxlamıram. Müxtəlif cəmiyyətlərə qoşulmuşam,
məsələn, "UQ Dancing Club" (rəqs klubu), həftənin bir
günü görüşüb tələbə dostlarımla rəqslə məşğul
oluruq. Semestr sonu tətildə isə Avstraliyanın
müxtəlif şəhərlərinə səyahət etməyə çalışıram.
Artıq Sidney və Melburnda olmuşam və gələn semestr
Böyük Rif Səddinə getməyi planlaşdırıram.
- Uzaq Avstraliyada Azərbaycan mədəniyyətini, ölkəmizi
təbliğ edə bilirsinizmi?
- Avstraliyada Azərbaycan səfirliyi fəaliyyət
göstərir. Yaşadığım şəhər oradan 300 km uzaqda
yerləşir. İri şəhərlərin bir-birindən uzaqda yerləşməsi
tədbirlərimizin mütəşəkkil keçirilməsinə, tələbə
cəmiyyətinin də effektiv fəaliyyət göstərməsinə
imkan vermir. Buna baxmayaraq biz çalışırıq ki,
yaşadığımız şəhərdə Azərbaycan cəmiyyəti yaradıb
öz ölkəmizi təmsil edək. Hazırda Brizbanda 10
azərbaycanlı tələbə oxuyur və keçirilən beynəlxalq
tədbirlərdə, festivallarda Azərbaycan mədəniyyəti,
adət-ənənələri barədə məlumat veririk. Bir çoxları
üçün bu tədbirlər maraqlıdır. Ölkəmizin
özünəməxsus dəyərləri var və qloballaşma prosesi
nə qədər sürətlə gedirsə-getsin, biz bu dəyərləri
qoruyub saxlamalıyıq.
- Gələcək planlarınız?
- Gələcəkdə öz sahəm üzrə çalışmaqdan əlavə
informasiya sistemlərinin idarə edilməsi üzrə yerli
universitetlərdə dərs demək və öz biliklərimi
paylaşmaq istərdim. Öz sahəm üzrə aparıcı
mütəxəssislərdən birinə çevrilmək və ölkəmizin
inkişafına töhfə vermək barədə düşünürəm.
- Biz də sizə ölkəmizi xaricdə layiqincə təmsil
etməyi və təhsilinizdə yeni-yeni uğurlar qazanmağı
arzulayırıq.
Oruc MUSTAFAYEV,
"Azərbaycan müəllimi" |
