|
İyulun 20-də ali təhsil müəssisələrinə və tam orta
təhsil bazasında (11 illik) orta ixtisas təhsili
müəssisələrinə cari ilin məzunları üçün II və III
ixtisas qrupları üzrə keçirilmiş qəbul imtahanlarının
nəticələri iyulun 22-də açıqlanıb. Tələbə Qəbulu üzrə
Dövlət Komissiyasından verilən məlumatlara görə,
imtahanlarda iştirak etmiş abituriyentlər TQDK-nın
internet saytına daxil olaraq öz nəticələri və cavab
kartının qrafik təsviri ilə tanış ola bilərlər. İmtahan
nəticələrinə dair məlumat vərəqini isə İnternet
vasitəsilə əldə etmək olar.
İmtahanda iştirak etmək üçün sənəd vermiş 31326 (15562
nəfər II qrup üzrə, 15764 nəfər III qrup üzrə)
abituriyentdən 813 nəfəri imtahana gəlməyib. İmtahanda
iştirak edən 30513 abituriyentdən 33 nəfəri isə
qaydaları pozduqlarına görə imtahandan xaric olunub və
nəticələri ləğv edilib.
II ixtisas qrupu üzrə 11079, III ixtisas qrupu üzrə
10569 nəfər müsabiqə şərtini ödəyərək ixtisas seçiminə
buraxılıb.
II ixtisas qrupu üzrə 2 nəfər ən yüksək nəticə - 700 bal
toplayıb.
II ixtisas qrupu üzrə ixtisas seçimində aşağıdakı
müsabiqə şərtlərini ödəmiş abituriyentlər iştirak edə
bilərlər:
- Ümumi balı 150-dən, hər hansı bir imtahan fənni
istisna olmaqla qalan dörd imtahan fənninin hər biri
üzrə ayrılıqda topladığı nisbi balı 10-dan az olmayan;
- Dövlət sifarişli ixtisasların müsabiqəsində ümumi balı
300-dən, hər bir imtahan fənni üzrə ayrılıqda topladığı
nisbi balı 10-dan az olmayan.
Ümumi balı 300 və daha çox olan abituriyentlərin ixtisas
seçiminə buraxılmaları üçün onların fənlər üzrə
cavablarına nisbi bal məhdudiyyəti tətbiq olunmur.
III ixtisas qrupu üzrə ixtisas seçimində aşağıdakı
müsabiqə şərtlərini ödəmiş abituriyentlər iştirak edə
bilərlər:
- Bu il III qrup üzrə ixtisas seçimində ümumi balı
200-dən, hər hansı bir imtahan fənni istisna olmaqla
qalan dörd imtahan fənninin hər biri üzrə ayrılıqda
topladığı nisbi balı 10-dan az olmayan.
- Dövlət sifarişli ixtisasların müsabiqəsində ümumi balı
350-dən, hər bir imtahan fənni üzrə ayrılıqda topladığı
nisbi balı 10-dan az olmayan.
Ümumi balı 350 və daha çox olan abituriyentlərin ixtisas
seçiminə buraxılmaları üçün onların fənlər üzrə
cavablarına nisbi bal məhdudiyyəti tətbiq olunmur.
Xüsusi qabiliyyət tələb edən ixtisasların bəzi
istiqamətləri üzrə müsabiqə şərtlərində dəyişiklik
edilib. Buna dair cədvəl TQDK-nın internet saytında
yerləşdiriləcəkdir.
TQDK abituriyentlərin nəzərinə çatdırır ki, ali təhsil
müəssisələrinə tələbə qəbulu müsabiqəsində iştirak etmək
üçün ixtisas seçimi iyulun 24-dən avqustun 5-dək
aparılacaqdır. Qəbul aparılan ixtisaslar və onların
kodları, ixtisaslar üzrə plan yerləri "Abituriyent"
jurnalının 4-cü sayında təqdim olunub.
İxtisas seçiminə kömək məqsədilə hər bir ixtisas
qrupunun abituriyentləri üçün "İxtisas seçimi zamanı
nələrə diqqət yetirməli?" adlı vəsaitlər çap edilib.
Vəsaitlərdə hər bir ixtisas qrupu üzrə qəbul planı,
dövlət sifarişi üzrə yerlərin sayı, müsabiqə şərtləri,
müsabiqədə iştirak etmək hüququ qazanmış
abituriyentlərin imtahan ballarının paylanmasına dair
məlumatlar təqdim olunub.
Xatırladılır ki, abituriyentlərin ixtisas seçimi zamanı
düzgün istiqamət götürmələrinə kömək məqsədilə ali və
orta ixtisas təhsili müəssisələrinə ötənilki qəbul
imtahanlarında formalaşmış keçid balları haqqında
məlumatlar ayrıca vəsaitlərdə çap olunub.
Yusif ƏLİYEV,
"Azərbaycan müəllimi" |
