|
Bu günlərdə Gürcüstanın Batumi şəhərində dünya çempionu
Muxran Vaxtanqadzenin şərəfinə yunan-Roma güləşi üzrə
gənclər arasında beynəlxalq turnir keçirilib.
Azərbaycan Güləş Federasiyasından aldığımız məlumata
görə, məşqçilər Akif Əliyev və Zöhrab Abbasovun
rəhbərliyi altında yunan-Roma güləşi üzrə gənclərdən
ibarət yığma komandamızın üzvləri turnirdə iştirak
edib. Güləşçilərimiz 3 gümüş və 3 bürünc medal
qazanaraq 7 ölkə təmsilçilərinin iştirak etdiyi yarışda
komanda hesabında Gürcüstandan sonra ikinci yerdə
qərarlaşıb. İran 3-cü, Türkiyə güləşçiləri isə 4-cü yeri
tutub. Təmsilçilərimizdən Əli Məmmədov (55 kq), Zamir
Məhəmmədov (96 kq) və Əli Həsənov (120 kq) finala qədər
maneəsiz irəliləsələr də, həlledici qarşılaşmada uduzub
və gümüş medalla kifayətlənib. Mikayıl Rəhmanov (60 kq),
Orxan Məmmədli (66 kq) və Elton Vəzirzadə (84 kq) isə
yığmamıza bürünc medal qazandırıb. Görüşlərin idarə
edilməsində ölkəmizi beynəlxalq dərəcəli hakim Kamran
Əliyev təmsil edib. |
