|
 İyunun
30-da Bakı Slavyan Universitetinin təşkil etdiyi
"dəyirmi masa" respublikamızın ali və orta təhsil
müəssisələrində rus dilinin tədrisi və öyrədilməsi,
eləcə də ən müxtəlif sahə və səviyyələrdə işlədilməsi
problemlərinə həsr olunmuşdu.
Respublikanın ali və orta təhsil müəssisələrinin rusist
alimlərinin, metodist müəllimlərin, mətbuat
nümayəndələrinin iştirakı ilə baş tutan "dəyirmi masa",
əsasən iki mühüm məsələni müzakirə edib: ali və orta
məktəblərdə rus dilinin və ədəbiyyatın müasir tələblər
baxımından tədrisi, orta məktəblərin ibtidai və V-VI
siniflərində fənn kurikulumlarının tətbiqi vəziyyəti,
yaradılan dərslik və müəllim üçün vəsaitlərin fənn
kurikulumları və standartlara uyğunluğu problemləri;
Azərbaycanda rus dilinin işlənmə dairəsi və mətbuatda
yeri məsələsi.
Qoyulan məsələlərin aktuallığını vurğulayan BSU-nun
rektoru, professor Asif Hacıyev rus dili və
ədəbiyyatının tədrisi, rusistika sahəsində görülən
işlərə, yaradılan lüğətlərə, elmi-metodik nəşrlərə və
məlumat kitablarına, Rusiyanın ayrı-ayrı ali məktəbləri
ilə əməkdaşlığın perspektivlərinə, rus dilinin xarici
dil kimi tədrisi problemlərinə, kurikulum əsasında
yaradılacaq yeni dərsliklərin yazılmasında universitet
əməkdaşlarının fəal qoşulmasının vacibliyinə diqqəti
yönəldib. Rektor rus dilinin tədrisi və öyrədilməsi ilə
bağlı "dəyirmi masa"ların universitetdə mütəmadi
keçirilməsini təklif edib. Rusiya Mədəniyyət-Məlumat
Mərkəzinin rəhbəri Valentin Denisov son illər ərzində
Rusiyanın özündə də rus dilinə dövlət səviyyəsində
qayğının artdığını, bu canlanmanın Azərbaycanda
fəaliyyət göstərən Rusiya Mədəniyyət-Məlumat Mərkəzinin
fəaliyyətində də öz əksini tapdığını söyləyib.
Aparıcı rusist alimlər - BSU-nun nəzdində fəaliyyət
göstərən rus dili institutunun rəhbəri, BSU-nun ümumi və
rus dilçiliyi kafedrasının müdiri, professor Qalina
Udalıx, Sumqayıt Dövlət Universitetinin elmi işlər üzrə
prorektoru, professor Ramazan Məmmədov, BSU-nun kafedra
müdirləri, professor Aida Şahbazova, dosent Könül
Qasımova ali məktəblərimizdə rus dilinin tədrisi
problemlərini qabartmaqla yanaşı, müasir tələblərə
cavab verən, interaktiv rejimdə dilin öyrədilməsini
təmin edə biləcək yeni proqram və dərsliklərin
yaradılmasını vurğulayıblar.
Orta məktəb müəllimləri - Bakı şəhəri 160 nömrəli
klassik gimnaziyanın rus dili müəllimi Bahar Muradlı,
BSU Məktəb-Lisey Kompleksinin rus dili müəllimi Rəna
Babayeva, Heydər Əliyev adına Müasir Təhsil Kompleksinin
rus dili müəllimi, dosent Tamilla Məhərrəmova təhsil
Azərbaycan və rus dilində aparılan məktəblərimizdə rus
dili fənn kurikulumlarının tətbiqini, yaradılmış
dərsliklərin məzmun və metodiki cəhətdən işlənmə
səviyyəsini təhlil ediblər.
"Ədəbiyyat" fənn kurikulumu, V-VII siniflər üçün
"Ədəbiyyat" dərsliklərinin və metodiki vəsaitlərin
yaradılması prinsipləri, Milli Kurikulum tətbiq
olunmayan yuxarı siniflər üçün dərsliklərin yenidən
işlənilməsi, bu zaman Təhsil Nazirliyi və TQDK
proqramlarının uyğunluğuna diqqət verilməsi kimi
məsələlərə toxunan BSU Məktəb-Lisey Kompleksinin
direktoru, klassik rus ədəbiyyatı kafedrasının dosenti
İlahə Carçıyeva müasir şəraitdə məktəbdə ədəbiyyatın
tədrisinin əhəmiyyətini vurğulayıb.
Rusdilli Məktəblər Assosiasiyasının rəhbəri Lyubov
Yakunina Azərbaycanın müxtəlif bölgələrində məktəblilər
arasında keçirilən rus dili olimpiadalarından, Rusiya və
Azərbaycan məktəblilərinin birgə iştirakı ilə
reallaşdırılmış maraqlı layihələrdən bəhs edib.
"Azərbaycanda rus dili və ədəbiyyatı" jurnalının baş
redaktoru, professor Flora Nacıyeva rusdilli mətbuatın
problemlərinə toxunub.
BSU-nun tədris işləri üzrə prorektoru, professor Telman
Cəfərov bu tipli "dəyirmi masa"larda yeni yaradılan orta
və ali məktəb dərsliklərinin aprobasiya və təhlilinin
böyük fayda verə biləcəyini vurğulayıb.
"Dəyirmi masa" iştirakçılarına son illər BSU-da
rusistika sahəsində nəşr olunmuş kitabların sərgisi də
təqdim olunub.
Şakir CƏFƏROV,
"Azərbaycan müəllimi" |
