|
 İyulun
2-də "Four Seasons" otelində Bakı Şəhəri üzrə Təhsil
İdarəsi və "British Council"-in birgə təşkilatçılığı ilə
müəllim və şagirdlər arasında keçirilən Vilyam Şekspirin
450 illik yubileyinə həsr edilmiş müsabiqənin
qaliblərinin mükafatlandırılması mərasimi keçirilib.
Mərasimi giriş sözü ilə təşkilatın ingilis dili
layihələri üzrə rəhbəri Gülşən Hüseynova açaraq tədbir
iştirakçılarını müsabiqənin nəticələri ilə tanış edib.
Bildirib ki, doğum günündən 4 əsr keçməsinə baxmayaraq
Şekspir günümüzə qədər Britaniyanın ən mühüm mədəniyyət
elçisi və məşhur simalarından biri olaraq qalmaqdadır.
Qeyd edək ki, onun yubileyi ilə bağlı "British Council"
- Azərbaycan silsilə tədbirlərə aprel ayında start
vermişdir. Müsabiqənin keçirilməsində əsas
məqsədlərindən biri Azərbaycanda onun irsini qoruyub
saxlamaq, insanlara dahi yazıçının həyat və yaradıcılığı
haqda məlumat vermək və təbii ki, onları ingilis
ədəbiyyatının ən tanınmış nümayəndəsi ilə tanış
etməkdir. Belə ki, "British Council" Bakı Şəhəri üzrə
Təhsil İdarəsi ilə birlikdə yubiley tədbirləri ilə bağlı
müəllimlər və şagirdlər üçün 2 müsabiqəyə start
vermişdir. Orta məktəb müəllimləri Şekspir mövzusunda
onlayn resurslardan istifadə edərək dərs planı
hazırlayıb və şagirdləri ilə həmin dərsi keçib.
Şagirdlər isə Şekspirin əsərlərindən monoloq və
səhnələri ifa edərək video hazırlayıb müsabiqədə iştirak
ediblər. Müəllimlər üçün müsabiqədə cəmi 38 müəllim
iştirak etmiş, ən çox şagirdi əhatə edən 4 müəllim
müvafiq olaraq I, II, III yerləri bölüşüb. Eyni sayda
şagirdə dərs keçdiyi üçün III yerin sahibi 2 nəfər
müəllim olub. Bu müəllimlər 189, 59, 244, 304 nömrəli
tam orta məktəblərin müəllimləri - Xanım Qasımova,
Xəyalə Əsədova, Bahar Kərimova və Ülkər Əliyevadır.
Şagirdlər arasında keçirilən videomüsabiqədə 28
məktəbdən 54 videoçarx alınmışdır. Bəzi məktəblər bir
neçə videoçarx təqdim etmişlər. "British Council"-in
ekspert qrupu tərəfindən 54 videoçarxdan ən yaxşı 5-i
seçilərək səsvermə üçün "British Council"-in FB
səhifəsinə yerləşdirilmiş və ən çox "like" toplayan 244
nömrəli tam orta məktəbin (1535 like), Heydər Əliyev
adına liseyin (1073 like), 189 nömrəli tam orta
məktəbin (342 like) videoçarxları müvafiq olaraq I, II
və III yerlərə layiq görülmüşdür.
Müsabiqə qaliblərini təbrik edən Bakı Şəhəri üzrə Təhsil
İdarəsinin müdir müavini Hüseyn Əsgərov belə
müsabiqələrin müəllim və şagirdlər arasında
keçirilməsini təqdirəlayiq hal kimi qiymətləndirib. Qeyd
edib ki, "Şekspir-450" layihəsinin əsas məqsədi Vilyam
Şeksprin irsini Azərbaycanda paylaşmaq, onun
əsərlərindəki müxtəlif mövzuları tədqiq etməyə insanları
həvəsləndirmək və ingilis ədəbiyyatına aid görkəmli
şəxslər barədə hər kəsi məlumatlandırmaqdır.
Tədbirin sonunda qaliblərə "British Council" tərəfindən
Samsung tablet, iPod shuffle, ödənişsiz IELTS imtahanı,
Şekspirin əsərlərindən ibarət kitablar təqdim olunub.
Rəşad RAMAZANOĞLU,
"Azərbaycan müəllimi" |
