|
İyunun 24-də Daşkəsən, Göygöl, Samux, Naftalan,
Goranboy, Şəmkir, Gədəbəy, Ağstafa, Qazax, Tovuz, Şəki,
Balakən, Qax, Qəbələ, Oğuz, Zaqatala rayonlarının,
həmçinin Gəncə və Mingəçevir şəhərlərinin orta
ümumtəhsil müəssisələrinin 9 və 11-ci siniflərində
təhsil alan şagirdlər üçün mərkəzləşdirilmiş qaydada
buraxılış imtahanları keçirilib. Tələbə Qəbulu üzrə
Dövlət Komissiyasının verdiyi məlumata görə, adıçəkilən
şəhər və rayonlarda imtahanların keçirilməsi üçün 51
imtahan mərkəzi ayrılıb. Həmin gün saat 10-da IX sinif
şagirdləri, 15-də isə XI sinif şagirdləri üçün imtahan
başlanıb və 2 saat ərzində davam edib.
İmtahan prosesinin idarə olunması üçün komissiyada
operativ qərargah fəaliyyət göstərib, gün ərzində
imtahanın keçirildiyi binalarla müntəzəm əlaqə
saxlanılıb və imtahan prosesinin gedişinə nəzarət
olunub. Şagirdlərin öz bilik və bacarıqlarını nümayiş
etdirmələri üçün bütün imtahan binalarında normal şərait
yaradılıb.
Hazırda komissiyada imtahan protokollarının və cavab
kartlarının emalı aparılır. Yaxın günlərdə nəticələrin
elan edilməsi nəzərdə tutulur.
Samirə KƏRİMOVA,
"Azərbaycan müəllimi" |
