|
Naxçıvan Dövlət Universitetində 15 iyun Milli Qurtuluş
Günü münasibətilə keçirilən silsilə tədbirlər elmi
konfransla yekunlaşmışdır. YAP universitet şəhərciyi
ərazi ilk təşkilatının təşəbbüsü ilə keçirilən elmi
konfransı universitetin rektoru, professor Saleh
Məhərrəmov açaraq XX əsrin sonlarında Azərbaycanda geniş
vüsət alan milli azadlıq hərəkatından, ümummilli lider
Heydər Əliyevin milli müstəqilliyin qazanılması və
qorunub saxlanılmasındakı əvəzsiz rolundan, Milli
Qurtuluş Gününün tarixi-siyasi əhəmiyyətindən
danışmışdır. Qeyd olunmuşdur ki, dahi siyasətçi Heydər
Əliyev 1993-cü ildə xalqın təkidli tələbi ilə yenidən
siyasi hakimiyyətə gələrək Azərbaycanın dövlət
müstəqilliyinin itirilməsi, vətəndaş müharibəsi, siyasi
parçalanma kimi faciələrin qarşısını almışdır. Ulu
öndərin tərəqqiyə və firavan gələcəyə aparan müdrik
siyasəti Prezident İlham Əliyev tərəfindən sədaqətlə
davam etdirilir. Azərbaycan xalqı ümummilli lider Heydər
Əliyevin layiqli siyasi varisi, Prezident İlham Əliyevin
uzaqgörən və məqsədyönlü siyasətini hər zaman
dəstəkləyəcək.
Naxçıvan Muxtar Respublikası Ali Məclisinin deputatı,
əməkdar müəllim, YAP universitet şəhərciyi ərazi ilk
təşkilatının sədri, dosent Kamal Camalov "Vətənin
xilası, xalqın qurtuluşu" adlı məruzəsində bildirdi ki,
Heydər Əliyev uzaqgörən siyasəti, liderlik əzmi ilə
Azərbaycan dövlətçiliyini, varlığını parçalanıb yox
olmaq təhlükəsindən qurtarmış, xalqı qurtuluş və nicat
yoluna çıxarmışdır. Məhz onun sayəsində ölkəmiz xaosdan
xilas olmuş, sivil demokratik inkişaf yolu ilə inamla
irəliləyərək böyük nailiyyətlər qazanmışdır. Ümummilli
liderin iqtisadiyyatın inkişafı, milli ordu quruculuğu,
demokratik idarəetmə sisteminin yaradılması, qətiyyətli
xarici siyasətin müəyyənləşdirilməsi istiqamətindəki
mühüm xidmətləri sayəsində Azərbaycan dünyanın inkişaf
etmiş ölkələrindən birinə çevrilmişdir.
Elmi konfransda Milli Qurtuluş Gününə həsr olunmuş
videoçarx nümayiş olunmuşdur.
Mehriban SULTAN,
NDU-nun Mətbuat şöbəsinin müdiri |
