|
 Hər
dəfə beynəlxalq müsabiqə və festivallarda qalib adını
qazanan yeniyetmə və gənclərin xoş sorağını eşidəndə
qürur hissi keçiririk. Belə gənclər cəmiyyətdə öz
sözlərini deməyi bacaran, dünyagörüşləri, intellektual
səviyyələri, həyata baxışları və istedadı ilə seçilən
fəal gənclərdir. Haqqında danışmaq istədiyimiz Vurğun
Vəkilov da nümunəvi gənclərdəndir. 1998-ci ildə Bakı
şəhərində anadan olan Vurğun 2004-cü ildə Bülbül
adına Orta İxtisas Musiqi Məktəbinin fortepiano
şöbəsinə daxil olub. O, 2005-ci ildə keçirilən
"Kövkəb Səfərəliyeva adına gənc ifaçıların III
festivalı"nda fəxri fərmanla təltif edilib. V.Vəkilov
Heydər Əliyev Sarayında keçirilən Səməd Vurğunun 100
illik, filarmoniyada keçirilən Asəf Zeynallının 100
illik, Azərbaycan Dövlət Pedaqoji Universitetində
keçirilən Qara Qarayevin 90 illik yubileylərinə həsr
olunmuş konsertlərdə, 2007-ci ildə R.Mustafayev
adına Azərbaycan Dövlət İncəsənət Muzeyində
keçirilən "İsmayıl Hacıbəyov" kitabının təqdimat
mərasimində, "Səməd Vurğun", "Niyazi", "Rostropoviçlər"
ev-muzeylərində, "Kapellhaus"da və bir çox konsert
salonlarında çıxış edib. Həmin il R.Mustafayev
adına Azərbaycan Dövlət İncəsənət Muzeyində
keçirilən "İsmayıl Hacıbəyov" kitabının təqdimat
mərasimində iştirak edən yeniyetmə 2007-ci ildə "Səməd
Vurğun fondu"nun prezidenti Aybəniz Vurğun qızı
tərəfindən klassik musiqi əsərlərini məharətlə ifa
etdiyinə görə "Səməd Vurğun mükafatı"na layiq görülüb.
O, 2008-ci il aprelin 22-də solo konsert verib və ulu
öndər Heydər Əliyevin anadan olmasının 85 illik
yubileyinə həsr olunmuş gənc ifaçıların I
Respublika müsabiqəsində birinci yerə layiq
görülərək diplomla mükafatlandırılıb. Vurğun Azərbaycan
Respublikasının xalq artisti maestro Rauf Abdullayevin
müşayiətilə filarmoniyada "Qala konsert"də V.A.Motsartın
fortepiano və orkestr üçün 23 nömrəli konsertinin I
hissəsini ifa edib. 2011-ci ilin mayında İtaliyanın
Pesaro şəhərində keçirilən VIII "Çitta di Pesaro"
Beynəlxalq müsabiqəsində birincilik qazanaraq diploma
layiq görülüb. Musiqi sahəsində qazandığı nailiyyətlər
nəzərə alınaraq onun adı 2009-cu il mayın 5-də
Azərbaycan Respublikası Prezidentinin müvafiq
sərəncamına əsasən Azərbaycanın gənc istedadlarının
"Qızıl kitabı"na daxil olunmaqla o, xüsusi aylıq
təqaüdə layiq görülüb. Ümumiyyətlə, onun musiqi
sahəsində qazandığı uğurları sadalamaqla qurtaran deyil.
Hələ yeniyetməlik dövrünü yaşayan bu musiqiçi kifayət
qədər diplom və mükafatların sahibidir və bütün bunlar
musiqiçiyə hədsiz sevinc bəxş edir. İstər beynəlxalq,
istərsə də klassiklərin yubiley tədbirlərində Vurğunun
çıxışları həmişə alqışlarla qarşılanıb. Ən böyük
uğurları hələ qabaqda olan Vurğuna gələcəkdə bu
müqəddəs sənətin korifeyləri sırasında olmağı
arzulayırıq.
Hazırda o, XI sinif şagirdidir. İxtisas müəllimləri
Elmira Mustafayeva və Bakı Musiqi Akademiyasının
prorektoru, əməkdar incəsənət xadimi Oqtay
Abasquliyevdən dərs alır.
Sifai SƏFƏROVA,
"Azərbaycan müəllimi" |
