|
 Norveç
Təbiəti Mühafizə Cəmiyyəti 1996-cı ildən etibarən
School Project for Application of Resources and Energy
(Enerji və Resurslardan İstifadə Üzrə Beynəlxalq
Məktəbli Proqram - SPARE) layihəsini həyata keçirir.
Layihənin məqsədi məktəblilərdə təbii ehtiyatlardan
səmərəli istifadə və enerjiyə qənaətin zəruriliyini
aşılamaq, alternativ enerji mənbələrindən istifadənin
üstünlüyünü təbliğ etmək, onları bu istiqamətlərdə əməli
fəaliyyətə sövq etməkdir. Hazırda 17 ölkə SPARE
layihəsində iştirak edir. Bizim ölkədə Norveç Təbiəti
Mühafizə Cəmiyyətinin tərəfdaşı Azərbaycan Gənclər
İttifaqıdır (AGİ). Hər dərs ili SPARE çərçivəsində
təşkil olunan "Mən və Enerji" beynəlxalq məktəbli
müsabiqəsi həm şagirdlər, həm də müəllimlər tərəfindən
maraqla qarşılanır. Müsabiqə iki mərhələdə - ölkə və
beynəlxalq mərhələlərdən ibarət olaraq 4 nominasiya üzrə
keçirilir. Nominasiyaların üçü şagirdlər, biri isə
müəllimlər üçün nəzərdə tutulub. Azərbaycanın şagird və
müəllimləri müsabiqədə həvəslə iştirak edirlər.
2013-2014-cü dərs ilində müsabiqənin ölkə turuna 60-dan
çox iş təqdim edilmişdir. Münsiflər heyəti ən yaxşı dörd
işi beynəlxalq turda iştirak üçün tövsiyə etmişdir.
Həmin işlərdən biri - "Sərfəli yanacaq, təmiz dünya"
"Enerji qənaəti, enerji səmərəliyi və ya bərpa olunan
enerji mənbələri üzrə layihələr" nominasiyasında 2-ci
yer tutmuşdur. İstixanaların qızdırılması üçün odun
əvəzinə findıq qabığının istifadəsinin üstünlükləri,
iqtisadi səmərəsi və təbiətə vurulan zərərin minimuma
endirilməsini sübut edən və hesablamalara əsaslanan
həmin layihənin müəllifləri Qax şəhər N.Allahverdiyev
adına 2 nömrəli məktəb-liseyin şagirdləri Jalə
Məmmədova və Ağa Ramazanov, rəhbəri isə gənc fizika
müəllimi Səlminaz Allahverdiyevadır.
2 iyun 2014-cü ildə Qax şəhər N.Allahverdiyev adına 2
nömrəli orta məktəb-liseydə "Enerjidən səmərəli istifadə
edək" devizi altında məktəbli festivalı keçirilmişdir.
Festivalda Bakı, Sumqayıt və Qax şəhər və kənd orta
ümumtəhsil məktəb şagirdlərinin enerjiyə qənaət və
enerjidən səmərəli istifadə sahəsində irəli sürdükləri
təşəbbüslər, icra etdikləri kiçik layihələr nümayiş
etdirilmişdir, beynəlxalq müsabiqənin qaliblərinə
diplom və hədiyyələr təqdim edilmişdir.
Tədbirdə SPARE məktəbli proqramının Azərbaycan üzrə
milli əlaqələndiricisi Nailə İsmayılova, proqramın
tədbiqi layihələr üzrə koordinatoru Mirabbas Məmmədov,
Alternativ və Bərpa olunan enerji mənbələri üzrə dövlət
agentliyinin nümayəndəsi Ramis Rəlbiyev, Təhsil
Nazirliyinin, Ekologiya və Təbii Sərvətlər Nazirliyinin,
Energetika Nazirliyinin sülh korpusunun, Bakı şəhər 287
nömrəli "Zəkalar" liseyinin, Sumqayıt şəhər 11 nömrəli
tam orta məktəbinin, Qax Rayon İcra Hakimiyyətinin və
təhsil şöbəsinin, Qax şəhər 4 və 5 nömrəli, Qaxbaş kənd
2 nömrəli tam orta məktəblərinin nümayəndələri iştirak
etmişdir.
Məktəbin foyesində festival iştirakçılarının - Bakı
şəhəri 287 nömrəli "Zəkalar" liseyinin, Sumqayıt şəhər
11 nömrəli tam orta məktəbinin, Qax 2, 4, 5 nömrəli
şəhər və Qaxbaş 2 nömrəli kənd məktəblərinin
şagirdlərinin hazırladıqları maket və rəsmlərdən ibarət
sərgi təşkil edilmişdir.
Tədbiri giriş sözü ilə açan məktəb-liseyin direktoru
Şəkər Abdullayeva qonaqları salamladı, ekoloji
tədbirlərin əhəmiyyətini qeyd etdi, rəhbərlik etdiyi
təhsil müəssisəsinin şagird və müəllimlərinin ekoloji
müsabiqələrdə fəal iştirakından danışdı.
SPARE Proqramının Azərbaycan üzrə milli koordinatoru
Nailə İsmayılova öz çıxışında proqram çərçivəsində
görülən işlər haqqında məlumat verdi, beynəlxalq
müsabiqənin qaliblərinə diplomlar təqdim etdi.
N.İsmayılova bildirdi ki, Qax şəhər 2 nömrəli
məktəb-liseyə SPARE Proqramı fizika kabinetinin təchizi
üçün cihaz və avadanlıq hədiyyə etmişdir. O, həmçinin
ekoloji tədbirlərdə fəal iştirak edən bir qrup müəllim
və şagirdə sertifikat və AGİ-nin nişanlarını təqdim
etdi.
Alternativ və Bərpa Olunan Enerji Mənbələri üzrə Dövlət
Agentliyinin məsul işçisi Ramiz Kəlbiyev çıxış edərək
müsabiqə qaliblərinə qiymətli hədiyyələr təqdim etdi.
Qalibləri Ekologiya və Təbii Sərvətlər Nazirliyinin 9
saylı ərazi İdarəsinin şöbə müdiri Mübariz Məmmədov,
Qax Rayon Təhsil Şöbəsi Metodkabinetinin direktoru Günay
Mahmudova təbrik etdilər.
Tədbirin sonunda məktəblilər ətraf mühitin qorunmasına
həsr olunmuş səhnələr nümayiş etdirdilər, Azərbaycanı,
onun təbiətini tərənnüm edən mahnılar ifa etdilər.
Mətanət KAMALOVA,
Qax şəhəri |
