|
 Bakı
Şəhəri üzrə Təhsil İdarəsi (BŞTİ) iyunun 4-də
müəllimlərin bilik və səriştəsinin sınaq
qiymətləndirilməsi ilə əlaqədar məktəb direktorlarının
iştirakı ilə növbəti iclasını keçirib. İclasda BŞTİ-nin
rəsmi nümayəndələri tərəfindən sınaq
qiymətləndirilməsində iştirak etmək üçün dövlət
ümumtəhsil məktəblərinin hər müəlliminin adına
hazırlanan buraxılış vərəqəsi barədə ətraflı məlumat
verilmişdir. İclasdan sonra buraxılış vərəqələri hər bir
məktəbin direktoruna müəllimlərə vermək üçün
çatdırılmışdır.
Buraxılış vərəqələrində qiymətləndirilmədə iştirak edən
müəllimin adı, soyadı, ata adı, ixtisası, rayon kodu,
məktəb kodu, iş nömrəsi, qiymətləndirilmənin tarixi və
keçirildiyi yer qeyd edilib. Qiymətləndirməyə gələn
zaman müəllimlər həm buraxılış vərəqəsini, həm də
şəxsiyyəti təsdiq edən sənədi özü ilə
gətirməlidir.İştirakçı müəllimin qiymətləndirilmə
mərkəzinə buraxılış vərəqəsində göstərilən saatdan 1
saat 30 dəqiqə əvvəl gəlməsi vacibdir. Qiymətləndirilmə
başladıqdan 30 dəqiqə sonra gələn müəllim zala
buraxılmayacaq. Qiymətləndirilmə 2 saat 30 dəqiqə davam
edəcək.
Qeyd edək ki, Dövlət Strategiyasının icrası
istiqamətində ümumi təhsil müəssisələrində işləyən
müəllimlərin peşəkarlıq səviyyəsinin qiymətləndirilməsi
və əlavə təlim ehtiyaclarının müəyyənləşdirilməsi
məqsədilə 10-13 iyun 2 014-cü il tarixlərində Bakı
şəhərinin bütün dövlət ümumi təhsil müəssisələrində
çalışan müəllimlərin bilik və səriştəsinin sınaq
qiymətləndirilməsi aparılacaqdır.
www.baku.edu.gov.az |
