|
 May
30-da Təhsil Problemləri İnstitutunda Avropa Təlim
Fondunun (ATF) "Azərbaycan İxtisaslaşma Çərçivəsinin
İcrasına Dəstək" layihəsinin milli və beynəlxalq
ekspertləri ilə görüş keçirildi. İnstitutun direktoru
Qulu Novruzov və bir qrup əməkdaşının iştirak etdiyi
görüşdə Azərbaycan təhsil sisteminin hazırkı durumu,
tədris ilinin uzadılması, dünyanın müxtəlif ölkələrində
mövcud olan və milli tədris standartları, müəllimlərin
peşəkarlıq səviyyələrinin artırılması və s. məsələlər
ətrafında geniş danışıldı.
Avropa Təlim Fondunun 2014-cü il iş proqramı
çərçivəsində ATF Azərbaycan İxtisaslaşma Çərçivəsinin
icrasına dəstək məqsədilə qurumun baş eksperti Arjen
Deijə, beynəlxalq ekspert Olav Aarna və milli ekspert
Amin Çərkəzov müvafiq ixtisas üzrə AzİC tamamlanması
üçün məzmunun, yəni ixtisas standartlarının və
kurikulumların, xüsusilə də Azərbaycanda Milli İxtisas
Çərçivəsində (MİÇ) həyata keçirilməsi üçün məsləhət və
dəstəyin təmin olunması barədə məlumat verdilər.
Müzakirənin sonunda beynəlxalq ekspertlər gələcəkdə
Təhsil Problemləri İnstitutu ilə sıx əməkdaşlıq etmək
arzusunda olduğunu bildirdilər.
Mətbuat xidməti |
