ARXİV

30 May 2014 - №20

Beynəlxalq təhsil xəbərləri

Amerika alimləri universitet mühazirələrini qeyri-səmərəli hesab edir 

Amerika tədqiqatçıları ənənəvi universitet mühazirələrinin qeyri-səmərəli  olması qənaətinə gəliblər. Vaşinqton Universitetində çalışan  tədqiqatçı-alim Skott Friman 225 kursda tədris metodunu araşdırıb. O, standart  universitet mühazirələrinin səmərəsiz tədris forması olduğunu bildirib.  Bu məlumat bəhs olunan modelin  son on illər ərzində köhnəlməsinə dair fikirləri bir daha təsdiq edir. İlk  Qərbi Avropa universitetlərinin bizim eramızın təxminən 1050-ci ilində yaranmasından sonra mühazirələr tədris forması kimi dominantlıq təşkil edib.  Lakin müasir texnologiyalar hazırkı universitet mühazirələrini daha maraqlı etməyə imkan verə bilər. Skott Friman artıq böyük universitet auditoriyalarında öz konsepsiyasının tətbiqinə başlayıb.  Qeyd olunmalıdır ki, tədqiqat yeni metodun  bir neçə milyon insanın iştirak etdiyi açıq onlayn-kurslarda nə qədər səmərəli olmasını nəzərə almır. Lakin ABŞ Təhsil  Departamenti hesab edir ki, onlayn-mühazirə və auditoriyalardakı  ənənəvi mühazirələr arasında hər hansı fərq yoxdur.

Britaniyada universitet məzunlarının hər beş nəfərdən biri milyonerdir

Böyük Britaniyada ali məktəb məzunlarının hər beş nəfərdən biri milyonerdir. Bu barədə ölkənin Milli Statistika Xidmətinin rəsmi açıqlamasında qeyd olunur. "The Telegraph" qəzetinin məlumatına görə,  universitet təhsilli ölkə vətəndaşlarının 20 faizi milyon funt-sterlinq həcmində sərvətə malikdir.  İqtisadi böhrana baxmayaraq, son 4 il ərzində ölkədə varlı insanların sayı iki dəfə artıb. Maraqlı haldır ki,  ayrı-ayrı milyonerlərin şəxsi hesablarındakı pullar dövlət xəzinəsinin vəsaitlərindən   6 dəfə çoxdur.   Ekspertlər universitet məzunlarının var-dövlət əldə etmək səylərinin əsasında ali  təhsilə çəkilmiş xərclərin kompensasiya olunmasının dayandığını bildirir. 

Rusiyada 90 universitet yenidən təşkil olunacaq

Rusiyada ali məktəblərin keyfiyyət monitorinqi üzrə İdarələrarası komissiyanın ekspert qrupunun növbəti iclası başa çatıb. "Uçitelskaya qazeta"nın yazdığına əsasən, iclasda  8 dövlət və bələdiyyə ali məktəbi, onların 206 filialının, eləcə də 85 özəl ali məktəb və onların 226 filialının  yenidən təşkil olunması tövsiyə olunub.  Rusiya Rektorlar Birliyi isə monitorinqi ölkənin bütün  təhsil sisteminin dağılması  faktoru kimi qiymətləndirib.  Rusiya Təhsil və Elm Nazirliyinin açıqlamasına görə, iclasda 1000-dən artıq dövlət və özəl ali məktəb və onların filiallarının fəaliyyətinə dair analitik təhlil müzakirə olunub.  İclasda yekdil səslə 46 dövlət və bələdiyyə ali məktəbi və onların 172 filialının, 26 özəl ali məktəb və onların 7 filialının fəaliyyəti isə məqsədəmüvafiq elan olunmayıb.