|
 Bakıdakı
20 nömrəli məktəb-liseydə dördüncülərin 28 may
Respublika Gününə həsr olunmuş bayram tədbiri keçirildi.
Dahi bəstəkar Ü.Hacıbəylinin "Koroğlu" operasının
uvertürasının sədaları altında al-əlvan bəzədilmiş zala
daxil olan dördüncülərin sonsuz sevinc və həyəcan
hissləri aydın sezilirdi.
Öncə Azərbaycan Respublikasının Dövlət himni
səsləndirildi. Aparıcılar Zemfira və Cabir səhnədə 28
may Respublika Gününə həsr olunmuş bayram tədbirinin
başlanmasını elan etdilər. "Canım Azərbaycan" mahnısı
tədbir iştirakçılarında xoş ovqat yaratdı. Sonra
məktəbin əlaçı şagirdlərindən olan Cabir Məmmədov 28
mayın Azərbaycanın şanlı tarixinə Respublika Günü kimi
daxil olduğu, hər il bu günün böyük təntənə ilə qeyd
olunduğunu diqqətə çatdırdı. Dedi ki, 1918-ci il mayın
28-də bütün müsəlman Şərqində ilk dəfə vətənimizdə
demokratik respublika yarandı və xalqımız azadlığa
çıxdı.
Dördüncülərdən Qəmər Əsgərova, Kənan Məmmədov, Rəna
Ağazadə, İsmayıl Bəşirli milli və dünya xalqlarının
rəqslərini məharətlə ifa etdilər, vətənpərvərlik
mövzusunda səslənən şeirlər, ifa olunan mahnılar
iştirakçıları məmnun etdi.
Aytən, Nigar, Rəvan, Sənubər, Nihat, Zemfira, Həsən,
Tahir, Məryəm, Mirsəid və başqaları isə öz qısa
çıxışlarında müstəqilliyimiz dövründə qazanılan
uğurlardan söz açdılar, torpaqlarımızın suverenliyi
uğrunda canından keçən Milli Qəhrəman Mübariz
İbrahimovun şərəfli həyat yolundan bəhs etdilər.
Ekranda Qarabağ savaşından görüntülər nümayiş olundu.
Tədbir bir də onunla əlamətdar idi ki, dördüncülər məhz
həmin gün ibtidai təhsil pilləsini başa vururdular.
Sevimli müəllimləri Mehparə Həbibli ilə son görüşləri
olsa da, qarşıda onları bir neçə fənn müəlliminin
nəvazişi ilə əhatə olunmaq gözləyirdi.
Məktəbin direktor əvəzi Elşad Məmmədov çıxışında tədbiri
yüksək dəyərləndirdi və rəngarəng çıxışlar
hazırladıqlarına görə dördüncülərə, eləcə də onların
sinif müəllimi Mehparə Həbibliyə təşəkkürünü bildirdi.
Qeyd etdi ki, bir neçə metodiki vəsaitin müəllifi olan
M.Həbibli 54 ilə yaxın pedaqoji fəaliyyəti dövründə
həmişə nümunəvi işi ilə gənc müəllimlərə örnək olub.
Tədbirdə çıxış edən valideyn B.Məmmədov övladının məhz
Mehparə müəllimin sinfində təhsil aldığından
məmnunluğunu ifadə etdi. Söylədi ki, lap kiçik
yaşlarından uşaqların əllərindən tutub xoşbəxt gələcəyə
aparan müqəddəs sənət sahiblərinin - müəllimlərin
qarşısında baş əyirik. Ölkəmizdə təhsilə göstərilən
diqqət və qayğıdan söz açan valideyn çıxışının sonunda
gələcəyin qurucuları olan gül balaları bir daha təbrik
etdi, onlara uğurlar arzuladı.
Bütün fəaliyyəti boyu öz işinə məsuliyyətlə yanaşdığını
bildirən dördüncülərin sinif rəhbəri M.Həbibli hər zaman
yetirmələrinin uğurlarından ruhlandığını söylədi. Artıq
ona öz övladları qədər doğma olan builki dördüncülərin
də gələcəyinə böyük ümidlərlə baxdığını vurğulayan
M.Həbibli şagirdlərinin hər birinə təhsillərində və
həyatlarında bol-bol nailiyyətlər dilədi.
Sifai SƏFƏROVA,
"Azərbaycan müəllimi" |
