|
 Heydərov
Hidayət Minayət oğlu 1997-ci il aprelin 4-də Bakıda
anadan olub. Uşaq yaşlarından idmana böyük həvəsi olan
Hidayət 6 yaşından Bakı şəhəri 13 nömrəli
İxtisaslaşdırılmış Olimpiya Ehtiyatları Uşaq-Gənclər
İdman Məktəbinin cüdo bölməsində respublikanın əməkdar
məşqçisi Tərlan Həsənovdan bu idman növünün sirlərini
öyrənməyə başlayıb. İdmanla məşğul olduğu vaxtdan bu
günə kimi Hidayət Heydərov özünü perspektivli idmançı
kimi göstərmiş, müxtəlif şəhər, respublika və beynəlxalq
miqyaslı yarışlarda yüksək nəticələr əldə etmişdir. Onun
ən böyük uğurlarından biri 2013-cü ilin iyununda
Estoniyada keçirilən yeniyetmələr arasında Avropa
birinciliyinin qalibi və həmin ilin 8-11 avqust
tarixlərində ABŞ-da keçirilən yeniyetmələr arasında
dünya birinciliyinin 60 kq çəki dərəcəsində qızıl
mükafatçısı olmasıdır. Qeyd edək ki, H.Heydərov 2012-ci
ilin idman göstəricilərinə görə Təhsil Nazirliyi
tərəfindən keçirilən müsabiqədə "İlin ən yaxşı
idmançısı" nominasiyası üzrə qalib hesab olunmuş və
fəxri fərmanla təltif edilmişdir. |
