|
Son vaxtlar şagirdlərimizin bir sıra beynəlxalq fənn
olimpiadalarında uğurlar qazanması və vətənə
medallarla qayıtmaları xoş bir ənənə halını alıb.
Uğurlu çıxışları ilə ölkəmizin təhsil sisteminin
inkişafına öz töhfələrini verən şagirdlərimiz mayın
11-18 tarixlərində Moskvada keçirilən kimya üzrə
Beynəlxaq Mendeleyev Olimpiadasında Azərbaycanı
layiqincə təmsil ediblər. Azərbaycan təhsilinin
yetirmələri, Azərbaycan Beynəlxalq Təhsil Mərkəzinin
şagirdləri Cavid Əhmədov, Murad Rəhimov MDB,
Baltikyanı, Cənub-Şərqi Avropanın 16 ölkəsini təmsil
edən 100-dən artıq məktəblinin iştirak etdiyi bilik
yarışmasında bürünc medala layiq görülüblər. Daha
4 məktəblimiz (Dilqəm Əhmədli, Şamil Həsənli, Kərim
Kərimli və Sergey Styopin) olimpiadanın iştirakçı
diplomları ilə təltif olunublar. Yarışmada ən yüksək
nəticə göstərmiş şagirdlərimizdən 4 nəfəri - Cavid
Əhmədov, Murad Rəhimov, Kərim Kərimli, Dilqəm Əhmədli
iyulun 20-də Vyetnamda keçiriləcək Dünya Kimya
Olimpiadasında ölkəmizi təmsil edəcək. Moskva
Olimpiadasında bürünc medal qazanmış Cavid Əhmədov və
Murad Rəhimovla daha yaxından tanış olaq.
"Növbəti beynəlxalq olimpiadada da vətənimi uğurla
təmsil edəcəyəm"
 Cavid
Əhmədov
1997-ci ildə Bakı şəhərində anadan olub. İbtidai
təhsilini İ.Hacıyev adına "Tərəqqi" texniki-humanitar
liseyində alıb. VI sinifdə oxuyarkən Azərbaycan
Beynəlxalq Təhsil Mərkəzinin keçirdiyi qəbul
imtahanlarında birinci yeri tutaraq mərkəzin Ağdaş
filialına qəbul olunub. Hazırda liseyin XI sinfində
təhsil alır. Cavid təhsil aldığı illərdə dəqiq elmlərə,
xüsusən riyaziyyat və fizikaya böyük maraq göstərib.
Olimpiadalarda iştirakı və qazandığı nəticələr haqqında
bizə bunları bildirdi:
- Liseydə oxuyarkən fənn olimpiadaları haqqında xeyli
məlumat aldım. Yuxarı sinif şagirdlərinin müxtəlif
səviyyəli olimpiadalarda əldə etdikləri nailiyyətlər
məni də bilik yarışmalarına həvəsləndirdi. Daha
sonralar mən də kimya olimpiadalarına hazırlaşmağa
başladım. Hər həftə bizə dərslərdən əlavə olimpiada
məşğələləri keçilir və imtahanlar təşkil olunurdu.
Bundan əlavə, bizə M.V.Lomonosov adına Moskva Dövlət
Universitetində praktiki və nəzəri dərslər keçilirdi.
Onuncu sinifdən etibarən mən də bir sıra beynəlxalq
olimpiadalarda iştirak etdim. İlk olaraq 2012-ci ilin
dekabr ayında 33 ölkənin iştirakı ilə Tehranda keçirilən
yeniyetmələrin Təbiət Elmləri Olimpiadasına qatıldım və
bürünc medal qazandım. Bu, mənim həm ilk olimpiadam, həm
də ilk nailiyyətim idi. Daha sonra 2013-cü ildə
Daşkənddə keçirilən 47-ci Beynəlxalq Mendeleyev
Olimpiadasında 4-cü yerə, Nigeriyada Beynəlxalq Təbiət
Elmləri Olimpiadasında qızıl medala layiq görülmüşəm. Ən
sonda isə 2014-cü il mayın 11-18-də Moskvada keçirilən
48-ci Beynəlxalq Mendeleyev Olimpiadasında 2 nəzəri və
bir praktik mərhələnin nəticələrinə əsasən bürünc
medala layiq görüldüm. Beynəlxalq olimpiadalarla yanaşı
mən respublika kimya olimpiadalarına da qatılmışam.
2012-ci ildə 4-cü, 2013-cü ildə 3-cü və 2014-cü ildə isə
1-ci yeri tutaraq qızıl medala layiq görülmüşəm. Bu il
aprelin 28-də Rusiya Federasiyası Tatarıstan
Respublikasında keçirilən "Nobel ümidləri" kimya
olimpiadasında iştirak edərək 1-ci yerə layiq
görülmüşəm. Və mən bu olimpiadanın nəticələrinə görə bu
ilin iyul ayında Vyetnamda keçiriləcək 46-cı Beynəlxalq
Kimya Olimpiadasında iştirak etmək haqqını qazandım.
İnşallah, növbəti beynəlxalq olimpiadada da vətənimi
uğurla təmsil edəcəyəm. Bütün bu uğurlarıma görə
"Tərəqqi" liseyi, Azərbaycan Beynəlxalq Təhsil Mərkəzi,
Moskva Dövlət Universitetinin Bakı filialının bütün
müəllim kollektivinə təşəkkür edirəm.
"Ötən il də Beynəlxalq Mendeleyev Olimpiadasından vətənə
bürünc medalla qayıtdım"
 Murad
Rəhimov
1996-cı ildə Göygöl rayonunun Şəhriyar kəndində anadan
olub. 2002-ci ildə L.Məhərrəmov adına Şəhriyar kənd tam
orta məktəbinin birinci sinfinə gedib. VII sinifdən
təhsilini Azərbycan Təhsil Mərkəzinin Gəncə liseyində
davam etdirib.
- X sinifdən etibarən kimya olimpiadası ilə məşğul
oluram və mənim bu olimpiadalarda bir neçə nailiyyətim
var. Ötən il ilk dəfə Özbəkistanda keçirilən 47-ci
Beynəlxalq Mendeleyev Olimpiadasında uğurla iştirak
edərək vətənə bürünc medalla qayıtdım. Həmçinin həmin il
respublika olimpiadasında bürünc medala layiq görüldüm.
Bundan sonra 45-ci Beynəlxalq Kimya Olimpiadasında da
ölkəmizi uğurla təmsil etdim. Və nəhayət, son iştirak
etdiyim Moskva şəhərində keçirilmiş 48-ci Beynəlxalq
Mendeleyev Olimpiadasında bürünc medala layiq görüldüm.
Bu olimpiadada 16 ölkədən 105 şagird iştirak edirdi.
Olimpiada çox maraqlı idi. Azərbaycan bu olimpiadada 6
nəfərlə təmsil olunmuşdu. Biz başqa ölkələrin şagirdləri
ilə ünsiyyət qurduq. Olimpiada çox uğurlu keçdi və biz
bu olimpiadadan 2 bürünc medalla qayıtdıq. Aprelin
28-də Rusiya Federasiyası Tatarıstan Respublikasında
keçirilən "Nobel ümidləri" kimya olimpiadasında iştirak
edərək I yerə layiq görülmüşəm. Bütün bu uğurlarımda
L.Məhərrəmov adına Şəhriyar kənd tam orta məktəbinin və
Gəncə liseyinin böyük rolu olmuşdur. Ona görə də bu
məktəblərin bütün müəllim kollektivinə təşəkkür edirəm.
Hazırda Gəncə liseyinin XI sinif şagirdiyəm.
Universitet həyatımı da Azərbaycanda, Qafqaz
Universitetində davam etdirmək istəyirəm. Buna görə də
olimpiadalara hazırlaşmaqla yanaşı, həm də TQDK-nın
keçirdiyi imtahanlara da hazırlaşıram. Ümid edirəm ki,
bu yay həm qəbul imtahanında yüksək bal yığacağam, həm
də iyul ayında keçiriləcək Beynəlxalq Kimya
Olimpiadasından vətənimə medalla dönəcəyəm.
Mendeleyev olimpiadası nəinki məktəbdə kimya elminin
inkişafına müsbət təsir göstərir, eyni zamanda istedadlı
şagirdləri elmi tədqiqatlara cəlb edir, müxtəlif
ölkələrdən olan gənclər arasında maraqlı informasiya
mübadiləsi aparmağa kömək edir.
Sonda ölkəmizi növbəti dünya bilik yarışmalarında
təmsil edəcək şagirdlərimizə yüksək zirvələri fəth
etməyi arzu edirik.
Oruc MUSTAFAYEV,
"Azərbaycan müəllimi" |
