|
 Mayın
26-da təhsil naziri Mikayıl Cabbarov Salyan şəhərindəki
Heydər Əliyev Mərkəzində Salyan, Neftçala, Hacıqabul,
Kürdəmir və Biləsuvar rayonlarında yaşayan vətəndaşları
qəbul edib.
Mərkəzi icra hakimiyyəti orqanları rəhbərlərinin 2014-cü
ilin may ayında şəhər və rayonlarda qəbul cədvəlinə
uyğun olaraq, keçirilən qəbulda vətəndaşlar, əsasən,
müəllimlərin işə qəbulu və ya iş yerinin bir məktəbdən,
həmçinin, bir rayondan digərinə dəyişdirilməsi, işə
bərpa olunma, fəxri adların verilməsi, ali və orta
ixtisas məktəbləri tələbələrinin bir təhsil
müəssisəsindən digərinə köçürülməsi, təhsil haqqı,
Azərbaycan Müəllimlər İnstitutunun Salyan filialının
gələcək fəaliyyəti, dövlət qulluğuna işə qəbul,
fəaliyyəti dayandırılmış Azərbaycan Beynəlxalq
Universitetində yarımçıq qalmış təhsil, ümumi təhsil
müəssisələrinin rəhbərlərindən şikayət və digər
məsələlərlə əlaqədar müraciət ediblər.
Qəbulda 67 vətəndaşın müraciəti dinlənilib və əksər
məsələlər yerindəcə həllini tapıb. Bir sıra
müraciətlərlə bağlı nazirliyin müvafiq qurumlarına
tapşırıqlar verilib.
Bəzi vətəndaşların nazirliyin səlahiyyətlərinə aid
olmayan və ya şəxsi xarakter daşıyan müraciətləri isə
müvafiq qurumlara çatdırılmaq üçün qeydə alınıb və
nəzarətə götürülüb. |
