|
Mayın 13-də Azərbaycan Dövlət Pedaqoji Universitetində
"Müəllimlər hər cür zorakılığa qarşı" mövzusunda
konfrans keçirilib. Azərbaycan Jurnalist Qadınlar
Assosiasiyası, "Zəngin Azərbaycan uğrunda mübarizə"
İctimai Birliyi və ADPU-nun birgə təşkilatçılığı ilə
keçirilən tədbirdə universitetin professor-müəllim
heyəti, tələbələr, bir sıra dövlət qurumlarının
nümayəndələri, qeyri-hökumət təşkilatlarının
təmsilçiləri, paytaxt məktəblərinin tanınmış müəllimləri
iştirak ediblər.
Konfransı ADPU-nun prorektoru, professor Vilayət Əliyev
giriş sözü ilə açaraq universitetin qeyri-hökumət
təşkilatları ilə birgə mütəmadi olaraq bir sıra
tədbirlər həyata keçirdiyini bildirib. Bugünkü tədbirin
olduqca aktual bir mövzuya həsr olunduğunu deyən
prorektor müəllimliyə xas olan keyfiyyətlərdən söz açıb.
Gələcəyin müəllimləri olacaq tələbələrə bir sıra
tövsiyələr verən Vilayət Əliyev mövzuyla bağlı öz
fikirlərini söyləyib.
Çıxış üçün söz alan "Zəngin Azərbaycan uğrunda mübarizə"
İctimai Birliyinin sədri İradə Əliyeva konfransın əsas
məqsəd və məramından danışıb.
Azərbaycan Jurnalist Qadınlar Assosiasiyasının
prezidenti Sevil Yusifova hər cür zorakılığa qarşı
mübarizədə müəllimlərin rolunun vacibliyini vurğulayıb.
Qeyd olunub ki, uşaqlarımızın, yeniyetmə və
gənclərimizin məhz düzgün formalaşmasında, cəmiyyətimiz
üçün yararlı bir vətəndaş kimi yetişməsində bağçanın,
məktəbin, ali və orta ixtisas təhsili müəssisələrinin
əhəmiyyətli rolu xüsusi vurğulanıb.
Sonra Dini Qurumlarla İş üzrə Dövlət Komitəsinin məsul
işçisi Əliheydər Zülfüqarlı "Dində zorakılıq haqqında",
ADPU-nun psixologiya kafedrasının müdiri, professor
Ramiz Əliyev "Zorakılığa qarşı münasibətin
formalaşmasında müəllimlərin rolu", ADPU-nun dosenti
Təranə Rəhimli "Azərbaycan ədəbiyyatında qadınlara qarşı
zorakılıq məsələsi" mövzularında məruzələrlə çıxışlar
ediblər.
Konfransda daha sonra qeyri- hökumət təşkilatları
təmsilçilərinin, müəllimlərin, tələbələrin iştirakı ilə
müzakirə olunan mövzu ətrafında geniş fikir mübadiləsi
və diskussiya aparılıb.
Samirə KƏRİMOVA,
"Azərbaycan müəllimi" |
