|
 Azərbaycanın
birinci xanımı, Heydər Əliyev Fondunun prezidenti,
UNESCO-nun və İSESCO-nun xoşməramlı səfiri Mehriban
Əliyeva sivilizasiyalararası dialoqa verdiyi töhfələrə,
həmçinin Almaniyada türk dünyasının tanıdılmasına,
Azərbaycan-Almaniya əlaqələrinin inkişafındakı
xidmətlərinə görə Türk-Alman Dostluq Federasiyasının
idarə heyətinin qərarı ilə qurumun fəxri mükafatına
layiq görülmüşdür.
AzərTAc xəbər verir ki, Türk-Alman Dostluq
Federasiyasının təşkilatçılığı ilə Almaniyanın Bavariya
Federal Torpağının parlamentində mükafatın təqdim
edilməsi ilə bağlı mərasim keçirilmişdir.
Türk-Alman Dostluq Federasiyası tərəfindən təsis olunmuş
və qədim yunan ilahələrindən Kübelenin adını daşıyan bu
mükafat müxtəlif nominasiyalar üzrə tanınmış simalara
təqdim olunur. İndiyədək federasiyanın mükafatlarına bir
sıra nüfuzlu siyasətçilər, ictimai-siyasi xadimlər,
iqtisadçılar, mədəniyyət işçiləri, məşhur idmançılar
layiq görülmüşlər.
Laureatlar arasında Almaniya Kansleri Angela Merkel, bu
ölkənin sabiq Prezidenti Yohannes Rau, parlamentin sabiq
sədri Rita Silismud, Yaşıllar Partiyasının keçmiş sədri
Kladio Rout, Türkiyənin keçmiş Prezidenti Süleyman
Dəmirəl, Bavariya Federal Torpağının baş naziri Qünter
Bexştayn və başqaları olmuşlar.
Türk-Alman Dostluq Federasiyasının prezidenti Cehan
Sendan sayca 12-ci olan mərasimdə bildirmişdir ki,
Azərbaycanın birinci xanımı, Heydər Əliyev Fondunun
prezidenti, UNESCO-nun və İSESCO-nun xoşməramlı səfiri
Mehriban Əliyeva dünyada sivilizasiyalararası dialoqa
verdiyi töhfələrə, həmçinin Almaniyada türk dünyasının
tanıdılmasına, Azərbaycan-Almaniya əlaqələrinin
inkişafındakı xidmətlərinə görə federasiyanın fəxri
mükafatına layiq görülmüşdür.
Cihan Sendan demişdir: "Mehriban xanıma xidmətlərinə
görə minnətdarlığımızı bildiririk. Onun xidmətlərini
necə önə çıxara bilərik? Türkiyə-Azərbaycan dostluğunu,
Azərbaycan-Almaniya dostluğunu bizim federasiya vasitəsi
ilə dünyaya necə yaya bilərik? Bu mükafatla onun əməyinə
qiymət verdik və çox xoşbəxtik".
Mükafatı Mehriban Əliyevanın adına Azərbaycanın
Almaniyadakı səfiri Pərviz Şahbazov qəbul etmişdir.
Mərasimdə çıxış edən səfir Pərviz Şahbazov Azərbaycanın
birinci xanımı, Heydər Əliyev Fondunun prezidenti
Mehriban Əliyevanın adından federasiyaya bu yüksək
mükafata görə minnətdarlığını bildirmiş, qurumun
rəhbərliyini ölkəmizə səfərə dəvət etmişdir.
Diplomat siyasi, iqtisadi sahələrdə uğurları ilə yanaşı,
zəngin tarixi keçmişi, mədəniyyəti, musiqisi, incəsənəti
və nəhayət, tolerantlığı ilə Azərbaycanın bütün dünyada
tanındığını və haqlı olaraq xalqımızın bu nailiyyətləri
və keyfiyyətləri ilə qürur duyduğunu vurğulamışdır.
Pərviz Şahbazov Mehriban Əliyevanın rəhbərlik etdiyi
Heydər Əliyev Fondu tərəfindən indiyədək Almaniyada bir
sıra mühüm tədbirlərin keçirildiyini - Berlində "Müasir
incəsənət sərgisi", "Bakıya uçuş", Münxen, Köln,
Ştutqart və Hamburqda isə Azərbaycan mədəniyyət
axşamlarının yüksək səviyyədə baş tutduğunu qeyd
etmişdir.
Tədbirdə çıxış edən Bavariya Federal Torpağı
parlamentinin vitse-prezidenti İnqe Aures demişdir:
"Mehriban Əliyeva fərqli fəaliyyəti ilə hər zaman diqqət
mərkəzindədir. Onun rəhbərlik etdiyi fond məktəblərin
tikintisinə dəstək verməklə yanaşı, dini məbədlərin
bərpasına da kömək göstərir. Mehriban xanım dostluğun,
əməkdaşlığın inkişafı naminə hansı sahələrə diqqət
yetirməyin zəruriliyini gözəl bilir. O, fəaliyyəti ilə
bunu sübut edib. Hesab edirəm ki, seçilən bu istiqamət
doğru yoldur".
Qeyd edək ki, bu il Almaniyanın vitse-kansleri, Sosial
Demokrat Partiyasının sədri, iqtisadiyyat və
ticarət naziri Ziqma Qabrielə, aktyor Bülent Ceylana,
Bavariya Federal Torpağının Futbol Federasiyasının
prezidenti Rayner Koka və başqalarına mükafatlar təqdim
olunmuşdur.
Bavariyanın Futbol Federasiyasının prezidenti Rayner Kok
demişdir: "Mehriban Əliyevanın fəaliyyətini diqqətəlayiq
hesab edirəm. Xüsusilə görürük ki, bu fəaliyyətin
nəticələri Almaniyaya qədər gəlib çatır. Bütün bu işlər
uşaqlar üçün görülür. Mədəniyyət abidələrinin qorunub
saxlanılması, dini abidələrin bərpası həyata keçirilir.
Bütün bunları mən ancaq yüksək qiymətləndirə bilərəm".
|
