|
Mayın 8-də Bakının Nərimanov rayonunda Azərbaycanın
Milli Qəhrəmanı Rafiq Nəsrəddinov adına 39 nömrəli tam
orta məktəbdə Şuşanın işğalının 22-ci ildönümü ilə
əlaqədar "Şuşanın tarixi keçmişi, bu günü və sabahı"
adlı geniş tədbir keçirilib. Məktəbin dil-ədəbiyyat
müəllimi Gülarə İbayeva tədbiri açıq elan etdikdən sonra
Şuşa şəhidlərinin xatirəsi bir dəqiqəlik sükutla yad
olunub.
Daha sonra məktəbin müəllim və şagird kollektivi
qonaqlarla birlikdə Azərbaycanın Dövlət himnini
oxuyublar. Məktəbin direktoru, şəhid bacısı Tahirə
Şükürova öz çıxışında qeyd edib ki, Şuşamızın
Ermənistan ordusu tərəfindən işğal edilməsindən 22 il
ötür. Eramızın II əsrindən tarixi mövcudluğu bəlli olan
Şuşa XVIII əsrin 50-ci illərində Qarabağ xanı Pənahəli
xan tərəfindən bərpa edilib və sonradan Azərbaycanın
mədəniyyət mərkəzlərindən birinə çevrilib. Xalqımızın
bir çox görkəmli şəxsiyyətləri bu şəhərdə doğulub. Bu
gün hamımız bütün əsir torpaqlarımıza, o cümlədən
Şuşaya qovuşacağımız günün intizarındayıq. Şükürlər
olsun ki, artıq Azərbaycanın güclü və mütəşəkkil ordusu
var və Qarabağ münaqişəsinin həlli dinc yolla baş
tutmayacağı təqdirdə, mən əminliklə deyirəm ki,
Azərbaycanın müzəffər ordusu Şuşanı və bütün Qarabağı
düşmən tapdağından xilas edə biləcək. Əziz balalarımız!
Azərbaycanın sabahı siz gənclərin əlindədir. Mən arzu
edirəm ki, Şuşaya bayraq sancmaq şərəfi bizim məktəbin
məzunlarından birinə- sizlərə nəsub olsun. Sizə qalib
ölkənin yüksək təhsilə malik vətəndaşları olmağı
arzulayıram.
Dəvətlilərdən Xocalı sakini Şamil Sabiroğlu, Qarabağ
müharibəsi veteranı, tibb bacısı Sevda Səfərova öz
çıxışlarında Şuşa haqqında arzularını dilə gətirdilər.
Tədbirin gedişi boyunca fəal şagirdlərdən Fərid Əzimov,
Günel İsaxanova, Emil Kərimzadə, İsmayıl Umudlu, Emin
Abdullayevin ifasında Üzeyir Hacıbəyovun, Səməd
Vurğunun, Xurşidbanu Natəvanın əsərlərindən seçilmiş
səhnəciklər nümayiş etdirildi, Bülbülün, Xanın
repertuarından musiqilər səsləndirildi. Aytac Səlimova,
Gündüz Kərimov, Nicat Hacıyev, Əsmər Cavadzadə, Mehnur
Şıxəliyev, Sevinc Vəlizadə və Füruzə Zeynallı tədbirin
maraqlı keçməsində fərqləndilər. Nikbin notlar üstündə
başa çatan tədbirin sonunda Azərbaycanın bayrağı
qaldırıldı.
Ellada UMUDLU
"Azərbaycan müəllimi" |
