|
 5-7
may tarixlərində Bakı Slavyan Universitetində ümummilli
lider Heydər Əliyevin anadan olmasının 91-ci ildönümünə
həsr edilmiş "Azərbaycanşünaslığın aktual problemləri"
mövzusunda V Beynəlxalq elmi konfrans keçirilib.
Azərbaycan Milli Elmlər Akademiyası Rəyasət Heyəti və
BSU-nun birgə təşkilatçılığı ilə keçirilən tədbir
başlamazdan öncə iştirakçılar Fəxri xiyabanda ulu öndər
Heydər Əliyevin xatirəsini ehtiramla anaraq məzarı önünə
əklil qoymuşlar. Görkəmli oftalmoloq alim, akademik
Zərifə xanım Əliyevanın da xatirəsi hörmətlə yad
edilərək məzarı önünə güllər düzülmüşdür.
Sonra tədbir BSU-nun akt zalında keçirilən plenar
iclasla davam etdirilib. AMEA-nın müxbir üzvü,
Azərbaycan Respublikasının millətlərarası,
multikulturalizm və dini məsələlər üzrə dövlət müşaviri,
konfransın təşkilat komitəsinin sədri, professor Kamal
Abdullayev tədbiri açaraq iştirakçıları salamlayıb.
K.Abdullayev ümummilli lider Heydər Əliyevin yaratdığı
Bakı Slavyan Universitetində artıq beşinci ildir ki,
təşkil edilən "Azərbaycanşünaslığın aktual problemləri"
mövzusunda beynəlxalq konfransın bu dahi şəxsiyyətin
anadan olmasının ildönümünə həsr edilməsinin təsadüfi
olmadığını vurğulayıb.
Qeyd edib ki, azərbaycançılıq məfkurəsinin dövlət
siyasəti səviyyəsində təzahür tapması, Azərbaycanın
dünya ölkələri sırasında tanınması və layiqli yer
tutması məhz ulu öndərin gərgin və məqsədyönlü
fəaliyyəti nəticəsində mümkün olub. Tədbirin
məqsədlərindən, azərbaycanşünaslığın aktual
problemlərinin araşdırılması və həlli istiqamətində
mühüm əhəmiyyət kəsb etməsindən, bölmə iclaslarında
dinləniləcək məruzələrin aktuallığından danışan natiq
beynəlxalq konfransda alimlərimizlə yanaşı, 12 ölkədən
30-dan çox qonağın iştirak etdiyini diqqətə çatdırıb.
AMEA-nın vitse-prezidenti, akademik İsa Həbibbəyli
iştirakçıları AMEA-nın prezidenti Akif Əlizadənin
adından salamlayaraq konfransın işinə uğurlar arzulayıb.
BSU-nun rektoru, professor Asif Hacıyev bu konfransın
yeni elmi istiqamətə, yeni əməkdaşlığa təkan verəcəyini
vurğulayıb və tədbir çərçivəsində Rusiya, Belarus,
Bolqarıstan və Polşa universitetləri ilə müqavilələrin
imzalanacağını bildirib.
Daha sonra çıxış edən Nəsimi RİH-in başçısı Nəsib
Məhəməliyev ulu öndərin Azərbaycan xalqı və dövləti
qarşısında əvəzsiz xidmətlərindən söz açıb.
Ural Federal Universitetinin kafedra müdiri Aleksandr
Nesterov, Anadolu Universitetinin rektoru, professor
Davut Aydın, İngiltərədə fəaliyyət göstərən Avropa
Azərbaycan Cəmiyyətinin mətbuat katibi Nil Vatson,
Almaniyanın Johannes Qutenburq Universitetinin
professoru Haynrix Vişoten, Polşadakı Aleksandr Geyştor
adına akademiyanın rektoru, professor Adam Koseski və
digərləri çıxışlarında müasir dünyada elmin, təhsilin
önəmli rolundan, beynəlxalq konfransın əhəmiyyətindən
bəhs ediblər.
Sonra proqrama uyğun olaraq konfrans öz işini "Heydər
Əliyev və azərbaycançılıq məfkurəsi", "Heydər Əliyev
irsi və Azərbaycanın inkişaf strategiyası", "Müasir
Azərbaycanda multikultural cəmiyyət və millətlərarası
münasibətlər", "Azərbaycan müasir beynəlxalq münasibət
sistemində", "Azərbaycanın tarixi və mədəniyyəti" və
"Azərbaycan dili və ədəbiyyatı" bölmələrində davam
etdirib.
Konfrans çərçivəsində BSU-nun Polyak dili və Mədəniyyət
Mərkəzi nəzdində Polyak dili bazar günü məktəbinin
açılışı olub. Mərasimdə BSU-nun rektoru, professor Asif
Hacıyev və Polşanın Azərbaycandakı fövqəladə və
səlahiyyətli səfiri Mixail Labenda iştirak ediblər.
Tədbir çərçivəsində eləcə də xarici qonaqların iştirakı
ilə ustad dərsləri, "dəyirmi masa"lar, Qubaya səfər
təşkil olunub, həmçinin "Azərbaycanşünaslığın aktual
problemləri" mövzusunda Beynəlxalq elmi konfransın
nəticələrinə dair mətbuat konfransı keçirilib.
Hicran ƏKBƏROVA,
"Azərbaycan müəllimi" |
