|
Daxili İşlər Nazirliyinin (DİN) İnsan Alverinə Qarşı
Mübarizə İdarəsinin və insan alverinə qarşı mübarizə
üzrə qeyri-hökumət təşkilatları koalisiyasının
təşkilatçılığı ilə Səbail rayonunun Bayıl qəsəbəsindəki
"Qızıl əlcək" idman klubunda gənclər və yeniyetmələr
arasında "İnsan alverini dayandıraq" devizi altında
kikboksinq üzrə idman yarışı keçirilmişdir.
Koalisiyanın mətbuat xidmətindən AzərTAc-a bildirmişlər
ki, tədbir "Azərbaycan Respublikasının insan alverinə
qarşı mübarizə üzrə Milli Fəaliyyət Planı (2014-2018-ci
illər)"nın Azərbaycan Respublikası Prezidentinin 2004-cü
il 6 may tarixli Sərəncamı ilə təsdiq edilməsinin 10
illiyi münasibətilə təşkil edilmişdir.
İdman yarışından əvvəl insan alverinə qarşı mübarizə
həftəliyinin açılış tədbiri keçirilmişdir.
Toplantıda Milli Məclisin deputatı Adil Əliyev, DİN-in
İnsan Alverinə qarşı Mübarizə İdarəsinin əməkdaşları,
kütləvi informasiya vasitələrinin nümayəndələri,
QHT-lərin rəhbərləri, ziyalılar və tanınmış idmançılar
iştirak etmişlər.
Dövlət himni səsləndikdən sonra toplantıda çıxış edən
Milli Məclisin deputatı Adil Əliyev Azərbaycanın son on
ildə böyük inkişaf yolu keçdiyini və artıq hər il
onlarla beynəlxalq səviyyəli idman tədbirinə ev
sahibliyi etdiyini bildirmişdir. Milli Məclisin
deputatı koalisiyanın təşəbbüsünü dəstəklədiyini və
bundan sonra da üçüncü sektorla əməkdaşlığa hazır
olduqlarını qeyd etmişdir.
DİN-in İnsan Alverinə qarşı Mübarizə İdarəsinin şöbə
müdiri Fuad Əliyev və koalisiyanın rəhbəri Mahirə
Əmirhüseynova insan alverinin bəşəriyyət və cəmiyyətimiz
üçün doğurduğu təhlükədən və buna qarşı dövlətin və
ictimaiyyətin birgə mübarizə tədbirlərindən danışmışlar.
Gənc nəslin sağlam və vətənpərvər ruhda yetişməsində
idmanın xüsusi rolunu vurğulayan natiqlər ölkəmizdə bu
sahəyə göstərilən qayğını xüsusi vurğulayaraq vətəndaş
cəmiyyətinin də fəallığını artırmasının vacibliyini qeyd
etmişlər.
Yarışdan sonra qaliblərə xüsusi diplomlar və hədiyyələr
təqdim olunmuşdur. |
