|
 Aprelin
26-da Azərbaycan Milli Elmlər Akademiyasının
İnformasiya Texnologiyaları İnstitutunda ali məktəb
tələbələri arasında informatika üzrə ümumrespublika
olimpiadasının final mərhələsi keçirilib.
Rabitə və Yüksək Texnologiyalar Nazirliyi, Təhsil
Nazirliyi, Heydər Əliyev Fondu və AMEA İnformasiya
Texnologiyaları İnstitutunun birgə təşkilatçılığı ilə
keçirilən 17 may - Ümumdünya Telekommunikasiya və
İnformasiya Cəmiyyəti gününə həsr olunan olimpiadanın
final mərhələsində Bakı Dövlət Universiteti, Azərbaycan
Dövlət Neft Akademiyası, Qafqaz Universiteti, Gəncə
Dövlət Universiteti, Bakı Ali Neft Məktəbi, Azərbaycan
Texniki Universiteti, Moskva Dövlət Universitetinin
Bakı filialı və Naxçıvan Dövlət Universiteti üzrə 28
komanda iştirak edib.
Tədbiri giriş sözü ilə institutun baş mühəndisi, texnika
üzrə fəlsəfə doktoru Rəşid Ələkbərov açaraq informasiya
texnologiyaları sahəsində innovasiyaların daha sürətlə
vüsət almasında gənc kadrların rolundan danışıb. İKT-nin
yeni imkanlarının meydana gəlməsi və innovasiyaların
geniş tətbiqi prosesinə məhz innovativ təfəkkürə malik
gənclərin böyük töhfə verdiyi vurğulanıb.
Olimpiadanın münsiflər heyətinin sədri, BDU-nun dosenti
Ramin Mahmudzadə təkcə Azərbaycanda deyil, dünyada
informasiya texnologiyaları üzrə yüksək ixtisaslı, böyük
elmi-praktiki təcrübəyə malik, innovativ təfəkkürlü
kadrların, xüsusən də kompüter və proqram təminatı
mühəndislərinin hazırlanmasına böyük tələbatın olduğunu
bildirib. Qeyd olunub ki, başlıca hədəflərdən biri
informatika fənni üzrə respublika olimpiadasının
qaliblərini beynəlxalq yarışlara hazırlaşdırmaqla
Azərbaycanın intellektual yarışlarda yüksək səviyyədə
təmsil olunmasına şərait yaratmaqdır. Olimpiadada fəal
iştirak edən gənclər üçün yay məktəblərinin təşkili və
Ukraynada treninqlərdə iştirak etmək nəzərdə tutulub.
Yarış zamanı hər komandaya 5 saat ərzində 10 məsələni
həll etmək tapşırığı verilib. Sonda Qafqaz
Universitetinin "Qafqaz Programmers", M.V.Lomonosov
adına MDU-nun Bakı filialının "MSU Programmers" və
Qafqaz Universitetinin "Qafqaz U 4" komandaları müvafiq
olaraq I, II, III yerləri tutublar.
Olimpiada qalibləri bu ay 17 may-Dünya
Telekommunikasiya və İnformasiya Cəmiyyəti Gününə həsr
olunan tədbirdə "HP" şirkətinin qiymətli hədiyyələri ilə
mükafatlanacaqlar.
Şakir CƏFƏROV,
"Azərbaycan müəllimi" |
