|
Aprelin 29-da Bakıdakı 177 nömrəli tam orta məktəbdə
Nərimanov rayon İcra Hakimiyyətinin təşkilatçılığı ilə
"Biz narkomaniyaya yox deyirik" mövzusunda tədbir
keçirilib. Məktəbin pedaqoji kollektivinin və
şagirdlərinin, rayon ictimaiyyətinin, hüquq-mühafizə
orqanlarının, səhiyyə işçilərinin iştirak etdikləri
tədbirdə narkomaniya və onun cəmiyyətdə törətdiyi
fəsadlar haqqında ətraflı söz açılıb.
Tədbirdə Nərimanov Rayon İcra Hakimiyyəti başçısının
müavini İradə Mahmudova ölkəmizdə həm təhsil, həm də
asudə vaxtın səmərəli keçirilməsində gənclər üçün hər
cür şəraitin yaradıldığı bir dövrdə narkotikdən istifadə
edilməsinin milli mənəvi dəyərlərə zidd, vətənə,
torpağa, ailəyə xəyanət olduğunu vurğulayıb.
Narkomaniyanın bütün dünyanı narahat edən problem olduğu
qeyd edilib, ölkəmizdə bu bəlanın qarşısının alınması
istiqamətində mühüm işlər aparıldığı vurğulanıb.
Narkomaniyanın daha geniş insan kütləsini öz təsiri
altına almaması üçün maarifləndirmə işlərinin
aparılmasına böyük ehtiyac olduğu diqqətə çatdırılıb.
Sifai SƏFƏROVA,
"Azərbaycan müəllimi" |
