|
Rusiya paytaxtında yaşayan və təhsil alan azərbaycanlı
gənclər arasında IV intellektual marafon keçirilmişdir.
AzərTAc xəbər verir ki, Azərbaycan-Rusiya Mədəniyyət və
Həmrəylik Mərkəzinin təşkil etdiyi tədbirdə 17 komanda
"Həmrəylik kuboku-2014" mükafatı uğrunda mübarizə
aparmışdır.
Azərbaycan-Rusiya Mədəniyyət və Həmrəylik Mərkəzinin
icraçı direktoru Mehman Şükürov yarışmanı açıq elan
etmişdir. Reqlamentə görə, hər komandada 4 oyunçu öz
bilik və bacarığını nümayiş etdirmişdir. İki mərhələdən
ibarət oyunda müxtəlif mövzularda 35 sual səslənmişdir.
Münsiflər heyətinin tərkibinə gənclər klublarının sədri
Ramil İsmayılov, pianoçuların beynəlxalq müsabiqələrinin
laureatı, YUNESKO-nun "Görkəmli musiqiçi" fəxri adının
sahibi Lyubov Qorbaçova, Moskva Dövlət Pedaqoji
Universitetinin müəllimi Elçin Vahabov daxil idilər.
Gərgin keçən intellektual mübarizədə birinci yeri Moskva
Dövlət Beynəlxalq Münasibətlər İnstitutunun tələbələri
tutmuşlar. |
