|
 Aprelin
28-də Azərbaycan Respublikasının Prezidenti yanında
Dövlət İdarəçilik Akademiyasında Latviyanın sabiq
prezidenti, Madrid klubunun üzvü və Nizami Gəncəvi
Beynəlxalq Mərkəzinin həmsədri xanım Vayra
Vike-Freyberqa ilə görüş keçirilib.
Tədbirdə akademiyanın professor-müəllim heyəti,
tələbələr iştirak ediblər.
Görüşü Dövlət İdarəçilik Akademiyasının rektoru,
akademik Urxan Ələkbərov açaraq qonağı rəhbərlik etdiyi
ali təhsil müəssisəsində görməkdən məmnunluq hissi
keçirdiyini bildirib. Rektor xanım Vayra
Vike-Freyberqanın Latviya Respublikasının 6-cı
prezidenti kimi səkkizillik fəaliyyəti ərzində
(1999-2007) ölkəsinin yüksək inkişafa nail olmasını, bu
gün də beynəlxalq siyasətdə xüsusi fəallığı ilə seçilən,
BMT-nin baş katibinin xüsusi elçisi olduğunu qeyd edib.
Akademik görüşün "Səmərəli dövlət idarəçiliyi"
mövzusuna həsr olunduğunu söyləyib. Urxan Ələkbərov
Azərbaycan Respublikasının Prezidenti cənab İlham Əliyev
tərəfindən son dövrlərdə aparılan səmərəli islahatların
və görülən tədbirlərin ölkəmizdə dövlət idarəçiliyinin
inkişaf etdirilməsini, dövlətin idarə edilməsində biliyə
əsaslanan cəmiyyətin qurulması istiqamətində həyata
keçirilən siyasəti, beynəlxalq təşkilatların qəbul
etdiyi statistik faktları əyani vasitələrlə qonağın
diqqətinə çatdırıb.
Respublikamızın yüksək inkişaf tempi, beynəlxalq arenada
əldə edilən nailiyyətlər, elm və humanitar sahədə
qazanılan uğurlar haqqında məlumat verən natiq davamlı
inkişaf strategiyasının tələblərinə cavab verən insan
potensialının formalaşması, ölkəmizin zəngin təbii
ehtiyatlarından olan "qara qızılın" insan kapitalına
çevrilməsi, bu sərvətin formalaşdırılması və idarə
edilməsinin əsasında elm və təhsilin dayandığını qeyd
edib. O, ölkəmizdə sağlam, yüksək bilik və bacarığa
malik olan yeni nəslin formalaşmasının dövlət
siyasətinin əsas istiqamətlərindən biri olduğunu
xatırladıb.
Xanım Vayra Vike-Freyberqa öz növbəsində görüş
iştirakçılarını salamlayıb və onların qarşısında
"Səmərəli idarəçilik" mövzusunda mühazirə ilə çıxış
edib. O, dövlət idarəçiliyinin yeni paradiqması kimi
səmərəli idarəçiliyin mahiyyətini şərh edib. Qonaq
Avropa və dünya miqyasında bu prinsiplərin tətbiqi
sahəsində görülən və görülməli olan işlərə dair öz
baxışlarını izah edib. Çıxışda daha sonra səmərəli
idarəçilik prinsiplərinin tətbiqi istiqamətində
Azərbaycan Respublikasının əldə etdiyi müsbət
nəticələrin beynəlxalq təşkilatlar tərəfindən yüksək
qiymətləndirildiyi, dünya arenasında ölkəmizin nüfuzunun
durmadan artdığı xüsusi qeyd olunub. Xanım Vayra
Vike-Freyberqa belə bir fikri vurğulayıb ki, səmərəli
idarəçilik üçün iki mühüm şərt vardır: birincisi, güclü
siyasi liderin olması, ikincisi, bu iradənin
reallaşmasını təmin edə biləcək effektiv idarəçilik
sisteminin olması. Onun fikrincə, Azərbaycanda bu
şərtlərin hər ikisi mövcuddur və bu da ölkənin gələcək
uğurlarının təminatçısıdır.
Sonda xanım Vayra Vike-Freyberqa görüş iştirakçılarının
çoxsaylı suallarını cavablandırıb.
Samirə KƏRİMOVA,
"Azərbaycan müəllimi" |
