|
 Bu
günlərdə Respublika Şahmat Mərkəzində 2004-2005-ci il
təvəllüdlü 10 yaşadək oğlanlar və qızlar arasında şahmat
üzrə Bakı şəhər birinciliyi keçirilib. Bakı Şəhər
Gənclər və İdman Baş İdarəsi tərəfindən keçirilən
yarışda Bakı şəhəri üzrə1 nömrəli İxtisaslaşdırılmış
Olimpiya Ehtiyatları Uşaq-Gənclər Şahmat-Dama İdman
Məktəbi, 2 nömrəli Uşaq-Gənclər Şahmat İdman Məktəbi, 3
nömrəli Uşaq-Gənclər Şahmat İdman Məktəbi, 19 nömrəli
Uşaq-Gənclər İdman Məktəbi, Respublika
İxtisaslaşdırılmış Olimpiya Ehtiyatları Uşaq-Gənclər
Şahmat Məktəbi, Həmkarlar İttifaqının Respublika
Şahmat-Dama Klubu, "Əlifba" Uşaq Tədris Evi, "Ay Ulduz"
İdman Klubu, "Sərhədçi" İdman Olimpiya Mərkəzi, "İnter"
Professional İdman Klubu, Nizami rayonu Uşaq-Gənclər
Yaradıcılıq Mərkəzi, T.İsmayılov adına Uşaq-Gənclər
Yaradıcılıq Sarayı, "Neftçi" İdman Sağlamlıq Mərkəzi və
Respublika Şahmat Klubunu təmsil edən 108 nəfər idmançı
(onlardan 28 nəfəri qızlardır) iştirak edib.
Bakı Şəhər Gənclər və İdman Baş İdarəsinin baş
məsləhətçisi, paytaxtın şahmat idman növü üzrə
koordinator-kuratoru Salman Əbdülovdan aldığımız
məlumata görə, beynəlxalq dərəcəli hakim Nurəli
Məmmədzadənin rəhbərliyi ilə yarışlar İsveçrə sistemi
üzrə keçirilib. Yekun nəticələrə əsasən oğlanlar
arasında I yeri 9 xalla Vüqar Manafov (1 nömrəli
İOEUGŞDİM), II yeri 7 xalla Mətin Mürsəlli (2 nömrəli
UGŞİM), III yeri 7 xalla Zaur Balayev (3 nömrəli
UGŞİM), qızlar arasında I yeri 6,5 xalla Arzu Orucova (3
nömrəli UGŞİM), II yeri 6,5 xalla Nəcibə Orucova
(RİOEUGŞM), III yeri 6,5 xalla Səyyarə Məmmədzadə
(RİOEUGŞM) tutublar. Bundan əlavə oğlanlar arasında IV
yeri 7 xalla tutmuş Mirmusa Feyziyev (3 nömrəli UGŞİM)
və qızlar arasında IV yeri 6,5 xalla tutmuş Nigar
Allahverdiyeva (RİOEUGŞM) da bu ilin iyun ayında
keçiriləcək respublika final mərhələsinə vəsiqə
qazanıblar.
Yarışın bağlanış mərasimində Bakı Şəhər Gənclər və İdman
Baş İdarəsinin baş məsləhətçisi, paytaxtın şahmat idman
növü üzrə koordinator-kuratoru Salman Əbdülov qalibləri
təbrik edib, onlara gələcək yarışlarda müvəffəqiyyətlər
arzulayıb. Yarışda I, II və III yerləri tutmuş
idmançılar Bakı Şəhər Gənclər və İdman Baş İdarəsi
tərəfindən müvafiq dərəcəli diplomlar və xatirə
hədiyyələri ilə təltif olunublar.
R.RAMAZANOĞLU,
"Azərbaycan müəllimi" |
