|
 Aprelin
21-də SDU-da Sumqayıt Dövlət Universitetinin rektoru,
dosent Elxan Hüseynov və Gəncə Dövlət Universitetinin
rektoru, professor Yusif Yusibov arasında qarşılıqlı
əməkdaşlıq haqqında birgə müzakirələr aparılmışdır.
Görüşdə SDU-nun rektoru əməkdaşlığın ikitərəfli
münasibətlərə səmərəli töhfə verəcəyini vurğulamış, bu
fəaliyyətin gələcəkdə də uğurla davam edəcəyinə
əminliyini ifadə etmişdir.
Rektor Elxan Hüseynov bildirmişdir ki, Azərbaycan
Respublikasının Prezidenti cənab İlham Əliyev hər bir
sahədə olduğu kimi təhsil sahəsində də böyük şəxsiyyət
Heydər Əliyevin işləyib hazırladığı strateji xətti
uğurla davam etdirməklə Azərbaycanın davamlı inkişafına
yönəlmiş proqram və layihələrin həyata keçirilməsini
təmin etmişdir. Rektor çıxışında cənab İlham Əliyevin
sərəncamı ilə təsdiq edilmiş "Azərbaycan Respublikasında
təhsilin inkişafı üzrə Dövlət Strategiyası"nda
innovasiyaların əhəmiyyətindən və ali təhsil sahəsində
dövlətimizin həyata keçirdiyi islahatların əsas
hədəflərindən söhbət açmış, müasir dövrdə
yüksəkixtisaslı kadr hazırlığı məsələsinin aktual
olduğunu nəzərə çatdırmışdır.
Rektor Elxan Hüseynov söhbət əsnasında vurğulamışdır ki,
ali təhsil qlobal fenomendir. Bu baxımdan, biz ali
təhsil müəssisələrinin rəhbərləri olaraq tələbələrin
tədris müddətində qazandığı bilik, bacarıqlarını nəzərə
alaraq onların əmək bazarına ciddi resurslarla daxil
olmasına təkan verməliyik. Bu öz növbəsində tələbənin
rəqabətdə qalib peşəkar biliklərini daim artırmağa zəmin
yaradacaqdır. Bizim ən ümdə məsələlərdən biri də təhsil
sisteminin maddi-texniki bazasını gücləndirmək, eyni
zamanda təhsilin keyfiyyətini artırmaqdır. Həm orta, həm
də ali məktəblərdə bu proses ardıcıllıqla, vahid sistem
şəklində aparılmalıdır və aparılır.
Səmimi əməkdaşlıq çərçivəsində keçən görüşdə Gəncə
Dövlət Universitetinin rektoru, professor Yusif Yusibov
rəhbəri olduğu ali təhsil müəssisəsinin tarixindən və
qarşıda duran perspektivlərdən söz açmışdır. Qeyd
edilmişdir ki, Gəncə Dövlət Universiteti özünün
maddi-texniki bazasını daim artırır, inkişaf etdirir,
yüksəkixtisaslı və geniş dünyagörüşlü kadr hazırlığı
vəzifəsini müvəffəqiyyətlə yerinə yetirir. Hazırda Gəncə
Dövlət Universitetində yalnız Qərb bölgəsindən deyil,
respublikanın bütün guşələrindən olan tələbələr təhsil
alırlar.
Gəncə Dövlət Universitetinin rektoru çıxışında iki
universitet arasında təhsil sahəsində əməkdaşlığın daha
da genişləndirilməsinin əhəmiyyətinə toxunaraq belə
görüşlərin mütəmadi təşkil olunmasının vacibliyini
vurğulamışdır.
Sonra Sumqayıt Dövlət Universiteti ilə Gəncə Dövlət
Universiteti arasında əməkdaşlıq haqqında müqavilə
imzalanmışdır. Müqaviləni Sumqayıt Dövlət
Universitetinin rektoru, dosent Elxan Hüseynov və Gəncə
Dövlət Universitetinin rektoru, professor Yusif Yusibov
imzalamışlar.
Müqavilənin imzalanmasında məqsəd Sumqayıt Dövlət
Universiteti ilə Gəncə Dövlət Universiteti arasında
elmi-pedaqoji, elmi-tədqiqat işlərinin aparılması
sahəsində birgə fəaliyyət proqramının həyata
keçirilməsidir.
Müqavilədə fakültə, kafedra və professor-müəllim heyəti
arasında birbaşa əlaqə və əməkdaşlıq yaratmaq, elmi
araşdırma aparmaq, təlim kursları və seminarlar keçirmək
məqsədi ilə universitet əməkdaşlarının qısa və ya
uzunmüddətli mübadiləsi, hər iki ali təhsil
müəssisəsinin magistr və doktorantlarına rəhbərlik
edilməsi, elmi-tədqiqat təcrübələrinin keçirilməsi
məqsədəuyğun sayılmışdır. Professor-müəllim heyətinin
elmi-pedaqoji səviyyəsini yüksəltmək məqsədilə
qısamüddətli kadr mübadiləsi, birgə sərgi və elmi
konfransların təşkili nəzərdə tutulmuşdur.
Hər iki ali təhsil ocaqlarının rektorları
universitetin ayrı-ayrı auditoriyalarında, həmçinin
yüksək texnologiyalarla təchiz edilən, Avropa
standartlarına cavab verən laboratoriyalarında, TEMPUS
otaqlarında, idman zalında olaraq buradakı vəziyyətlə
tanış olmuşlar.
Sonda SDU-nun tarixini və onun haqqında geniş məlumatı
özündə əks etdirən buklet və prospektlər qonağa hədiyyə
olunmuşdur.
SDU-nun Mətbuat xidməti |
