|
 KÜRDƏMİR.
Məlum olduğu kimi, Azərbaycan Respublikası Təhsil
Nazirliyinin 31 yanvar 2014-cü il tarixli tövsiyə
məktubuna əsasən XI sinif şagirdlərinə dərsdənkənar
vaxtlarda müstəqil Azərbaycan tarixinə dair "Ümummilli
lider Heydər Əliyevin ideyaları müasir Azərbaycanın
sosial-iqtisadi inkişafının təminatçısıdır" və "Ulu
öndər Heydər Əliyev müstəqil Azərbaycanın qurucusu və
memarıdır" mövzularında dərslər keçilir.
Gənclərin dünyagörüşünün formalaşmasında və mənəvi
tərbiyəsində mühüm rol oynayan bu tədbirin yüksək
səviyyədə həyata keçirilməsi məqsədilə Kürdəmir
rayonunda zəruri işlər görülüb.
Qeyd edək ki, fevralın 4-dən başlayan dərslər mayın
19-dək davam edəcəkdir.
Rayonda fəaliyyət göstərən Heydər Əliyev Mərkəzində
keçilən dərslərdə 43 tam orta məktəbin XI sinfində
təhsil alan 945 nəfər şagirdin iştirak edəcəyi nəzərdə
tutulub. Dərslər xüsusi hazırlanmış qrafik əsasında 2
akademik saat ərzində keçilir. Bu işə rayonda qabaqcıl
pedaqoji təcrübəsi ilə tanınan 10 nəfər tarix müəllimi
cəlb olunmuş, onlara hər mövzu üzrə tezislər və
bütövlükdə prosesin səmərəli tənzimlənməsinə dair yazılı
tövsiyələr verilmişdir. Hazırda davam edən dərslərdə
indiəyədək 795 nəfər şagird iştirak edib.
Dərslərdə ulu öndərin Azərbaycanda ikinci dəfə siyasi
hakimiyyətə qayıdışı, 1994-cü ildə "Əsrin müqaviləsi"nin
imzalanmasının ölkədə iqtisadi dirçəlişə səbəb olması,
Azərbaycanda demokratik dövlət quruculuğunun həyata
keçirilməsi, ordu quruculuğu, xarici siyasətdə uğurlar,
təhsil, mədəniyyət və idmanın inkişafı, xarici ölkələrdə
Azərbaycan diasporalarının yaradılması, Azərbaycanın
dövlət müstəqilliyinin bərpa edilməsinin XX əsrdə
tariximizin ən böyük nailiyyəti olması və s. kimi
məsələlərdən bəhs olunur. Bundan əlavə, dərslərdə
ümummilli liderin Azərbaycanda bazar iqtisadiyyatına
keçidi şərtləndirən fəaliyyəti, milli neft
strategiyasının yaradıcısı olması, iqtisadiyyatın
liberallaşdırılması və özəlləşdirilməsi, aqrar sahədə
islahatların həyata keçirilməsi, sosial siyasət, təhsil
siyasəti ilə əlaqədar mövzuların da tədrisi nəzərdə
tutulub.
Artıq 3-cü aydır ki, davam edən bu tədbir valideynlər və
ümumiyyətlə, rayon ictimaiyyəti arasında müsbət rezonans
doğurub.
Müəllimlərdən İnqilab Rəsulov, Əhsən Xankişiyev, Elnarə
Eminbəyli, Nizami İsmayılov və Gülbəniz İbrahimovanın
keçdiyi dərslər məlumatlılıq səviyyəsinə, şagirdlərlə
canlı ünsiyyətə görə xüsusilə fərqlənir.
Müvafiq istiqamətdə təlimin keyfiyyətinin yüksəldilməsi
və məktəblilərin potensial imkanlarının üzə çıxarılması
baxımından mühüm əhəmiyyət kəsb edən dərslər, eyni
zamanda şagirdlərin milli mənəvi dəyərlərə malik, sağlam
əqidəli, vətənpərvər, müasir dünyagörüşlü şəxsiyyətlər
kimi formalaşmasına və yetkin vətəndaş kimi müstəqil
həyata hazırlanmasına xidmət edir.
Mərkəzdə dərslərin gedişi zamanı
informasiya-kommunikasiya texnologiyalarının
imkanlarından geniş istifadə olunur. Qurulmuş
monitorların birində bu gün möhtərəm Prezidentimiz İlham
Əliyevin rəhbərliyi altında müstəqil Azərbaycan
Respublikasının, digərində isə Kürdəmir rayonunun
sosial-iqtisadi inkişafını, aparılan abadlıq və
quruculuq işlərini əks etdirən materiallar şagirdlərin
diqqətinə çatdırılır. Canlı diskussiya şəraitində keçən
dərslərdə şagirdlərin çoxsaylı sualları cavablandırılır.
Dərslər Mərkəzin sifarişi ilə hazırlanmış "Tarixi
yaradan şəxsiyyət - Heydər Əliyev" filminin nümayişi ilə
başa çatır.
Bu dərslərdə ulu öndərin Kürdəmirə səfərləri, rayon
sakinləri ilə keçirdiyi görüşlər haqqında da ətraflı
məlumat verilir, bu səfərləri əks etdirən filmlər
göstərilir. Şagirdlər burada, həmçinin ulu öndərin həyat
və fəaliyyətinə aid fotostendlər, kitab sərgisi və digər
eksponatlarla da tanış olurlar.
Dərslərdə ümummilli lider Heydər Əliyevin irsinin
öyrənilməsi ilə yanaşı, onbirincilərin diqqətinə
çatdırılır ki, bu gün Azərbaycan Respublikası etibarlı
əllərdədir, davamlı və dinamik inkişaf tempinə malikdir.
Prezidentimiz İlham Əliyevin rəhbərliyi altında ölkəmiz
özünün milli dövlət quruculuğu və idarəçiliyinin növbəti
şərəfli mərhələsini yaşayır.
LERİK.
Azərbaycan xalqının ümummilli lideri Heydər Əliyevin
həyat və fəaliyyətinin, onun zəngin irsinin
ictimaiyyətin geniş təbəqələrinə, xüsusilə yeniyetmə və
gənclərə dərindən mənimsədilməsi istiqamətində Lerik
rayonunda müəyyən işlər görülür.
Bu məqsədlə Lerik şəhərindəki Heydər Əliyev Mərkəzində
"Heydər Əliyev məktəbi", "Gənc heydərçilər" klubları,
"İstedadlar" yaradıcılıq dərnəyi, "Mənəvi dəyərlərimiz"
kursu, "Sabaha inamla" kitabxanası, "Dostluq" studiyası
fəaliyyət göstərir.
Heydər Əliyev Mərkəzində "Ümummilli lider Heydər
Əliyevin müstəqil Azərbaycan dövlətçiliyində rolu",
"Heydər Əliyev və Azərbaycan gəncliyi", "Heydər Əliyev
və Azərbaycan mədəniyyəti", "Heydər Əliyev və ordu
quruculuğu", "Gənc nəslin formalaşmasında Heydər
Əliyevin rolu" və digər mövzularda idarə, təşkilat və
müəssisələrin kollektivlərinin, ağsaqqalların,
ziyalıların, məktəblilərin, ictimaiyyət nümayəndələrinin
iştirakı ilə müxtəlif tədbirlər keçirilir, iştirakçılar
ulu öndərin həyat və fəaliyyətini əks etdirən müxtəlif
eksponatlarla tanış olur, sənədli filmlərə tamaşa
edirlər.
Bu istiqamətdə görülən işlərdən biri də rayonun tam orta
məktəblərinin XI sinif şagirdləri üçün dərsdənkənar
vaxtlarda müstəqil Azərbaycan tarixi üzrə dərslərin
təşkil edilməsidir.
Dərslərdə 36 tam orta məktəbin 479 nəfər XI sinif
şagirdinin iştirakı nəzərdə tutulub. Həmin dərslərin
keçilməsində məqsəd ən yeni tarixin, bu tarixdə
Azərbaycan dövlətçiliyinin inkişaf yolları, ulu öndər
Heydər Əliyev tərəfindən əsası qoyulmuş sosial-iqtisadi
və mədəni inkişafın istiqamətləri, ümummilli liderin
siyasi kursunun Azərbaycan xalqına qazandırdığı
uğurların şagirdlər tərəfindən daha ətraflı və dolğun
öyrənilməsini təmin etməkdən, onların həyatda fəal mövqe
nümayiş etdirmələrinə yardımçı olmaqdan, həmçinin
şagirdlərdə vətənpərvərlik, Vətənə sevgi hisslərinin
aşılanmasından ibarətdir.
"Ulu öndər Heydər Əliyev müstəqil Azərbaycanın memarı və
qurucusudur" və "Ümummilli lider Heydər Əliyevin
ideyaları müasir Azərbaycanın sosial-iqtisadi
inkişafının təminatçısıdır" mövzularında dərslərin
yüksək səviyyədə, sistemli və planlı şəkildə keçilməsini
təmin etmək məqsədilə peşəkarlığı, metodik hazırlığı ilə
fərqlənən tarix müəllimləri cəlb edilərək onlar üçün
xüsusi seminarlar təşkil olunub.
"Açıq dərs"lərin iştirakçıları əvvəlcə rayonun mərkəzi
meydanında ümummilli liderin abidəsini ziyarət edir,
sonra Heydər Əliyev Mərkəzində ulu öndərin həyat və
fəaliyyətini əks etdirən zəngin eksponatlarla tanış
olurlar. Dərslər canlı ünsiyyət və şagirdlərin yüksək
fəallığı şəraitində keçilir.
Dövlət müstəqilliyinin bərpası və bu barədə
Konstitusiya aktının qəbul edilməsi, "Əsrin
müqaviləsi"nin imzalanması ilə ölkədə iqtisadi
dirçəlişin əsasının qoyulması, 1995-ci ilin mart
və oktyabr aylarında dövlət çevrilişi cəhdlərinin
qarşısının alınması, hüquqi və demokratik dövlət
quruculuğu, ordu quruculuğu, xarici siyasətdə
uğurların qazanılmasında, təhsil, mədəniyyət və
idmanın inkişafında ulu öndər Heydər Əliyevin əvəzsiz
xidmətləri şagirdlərə konkret faktlarla izah
olunur.
İndiyədək "açıq dərs"lərdə rayonun 26 tam orta
məktəbinin 367 nəfər Xl sinif şagirdi iştirak edib.
TOVUZ.
Fevral ayının əvvəlindən Təhsil Nazirliyinin tövsiyə
məktubuna əsasən Tovuz rayonunda da ümumtəhsil
məktəblərinin XI sinif şagirdlərinə müstəqil Azərbaycan
tarixinə dair dərslərin tədrisinə başlanılıb.
Dərslər rayondakı Heydər Əliyev Mərkəzində xüsusi tərtib
olunmuş qrafikə uyğun hər biri 2 akademik saat olmaqla
peşəkar tarix müəllimləri tərəfindən keçilir.
Bununla bağlı bütün zəruri təşkilati məsələlər həll
edilib, dərslərin gedişinə Tovuz RİH və rayon təhsil
şöbəsi tərəfindən ciddi nəzarət olunur.
Verilən məlumata görə, rayonda fəaliyyət göstərən 86
təhsil müəssisəsindən 66-sı tam orta məktəbdir və bu
məktəblərin XI siniflərində təhsil alan 1581 nəfər
şagirdin hamısı məşğələlərə cəlb olunub.
Fevral ayı ərzində 30 məktəbdə təhsil alan 930 nəfər,
mart ayı ərzində isə 36 məktəbdə oxuyan 630 nəfər XI
sinif şagirdi bu dərslərdə iştirak edib.
Məşğələlərdə şagirdlər yüksək fəallıq nümayiş
etdirirlər. Keçilən dərslərin gedişi göstərir ki,
onbirincilər Heydər Əliyev irsinin, müstəqil Azərbaycan
tarixinin öyrənilməsinə xüsusi maraq göstərirlər.
Dərslərin daha yüksək səviyyədə təşkil edilməsində
tarix müəllimlərindən Ulduzə Alıyeva, Tural Qasımov,
Svetlana Hüseynova və Nəriman Qurbanovun rolu böyükdür.
Hicran ƏKBƏROVA,
"Azərbaycan müəllimi"
|
