|
"Demokratik İnkişaf Platforması" və "Təhsil Tədqiqatları
Mərkəzi" ictimai birliklərinin Təhsil Nazirliyinin
maliyyə yardımı ilə birgə həyata keçirdikləri "Təbiət
fənləri üzrə Avropanın innovativ təcrübə
texnologiyalarının Azərbaycan ümumtəhsil məktəblərində
tətbiqinə dəstək" layihəsi üzrə təlimləri aprelin 14-də
başa çatdırıldı.
Təlimlərə ərazisi işğal altında olan rayonların Bakı,
Sumqayıt şəhərləri və Abşeron rayonu ərazisində
fəaliyyət göstərən ümumi təhsil məktəblərinin fizika,
kimya və biologiya müəllimlərinin cəlb edilməsi və 96
müəllimin təlimlərdə iştirakı nəzərdə tutulmuşdu.
Layihə çərçivəsində keçirilən təlimlər heç bir
laboratoriya şəraiti olmadan elmi təcrübələrin həyata
keçirilməsi üzrə alternativ texnologiyanın öyrədilməsinə
həsr edilmişdi. Bunun üçün "Kopernik" Elmi Mərkəzində
işlənib hazırlanmış texnologiyanın əsasında ümumtəhsil
məktəb müəllimlərinə innovativ Avropa təcrübəsi
öyrədildi.
Bu texnologiyadan istifadə etməklə laboratoriya şəraiti
olmayan ən kasıb məktəbdə də elmi təcrübə işlərinin
böyük bir hissəsini yüksək səviyyədə və keyfiyyətlə
həyata keçirmək mümkündür. "Kopernik" Elmi Mərkəzində
işlənib hazırlanmış elmi təcrübələr spesifik
xüsusiyyətlərə malikdir: təhlükəsizdir, xüsusi
laboratoriya avadanlıqlarından istifadəyə ehtiyac
yoxdur, daha çox məişətdə gündəlik istifadə olunan əşya
və məmulatlardan istifadə edilməklə həyata keçirilir,
çox az miqdarda vəsait tələb edir, qazanılmış nəzəri
bilikləri təcrübədə sınaqdan keçirməyə imkan verir, tam
olaraq interaktiv təlim texnologiyaları prinsipləri
əsasında hazırlanmışdır, təlimin keyfiyyətinin
yüksəldilməsini təmin edir və ən intizamsız şagirddə də
dərsə, müəllimə və elmi tədqiqat işlərinə maraq oyadır,
onu yaxşı oxuyan şagirdlər sırasına qata bilir.
"Kopernik" Elmi Mərkəzində işlənib hazırlanmış bu
texnologiyadan hazırda inkişaf etmiş qərb ölkələrinin
təhsil sistemi geniş şəkildə yararlanır və 2009-cu ildən
etibarən bu texnologiya Gürcüstan Respublikasında da
geniş şəkildə tətbiq olunur.
Hazırda Təhsil Nazirliyinin yardımı ilə həyata
keçirilən bu layihə müvafiq istiqamətdə Azərbaycanda
icra edilən 4-cü layihədir. İndiyədək bu təcrübə
texnologiyasının öyrədilməsi istiqamətində 298 nəfər
müəllim təlimlərə cəlb edilmiş, o cümlədən layihədən 92
müəllim yararlanmışdır. Təlimlərdə iştirak etmiş
müəllimlərə müvafiq sertifikatlar verilmişdir.
Layihənin növbəti - sonuncu mərhələsində təlimlərdə
iştirak etmiş müəllimlərin işlədikləri ümumtəhsil
məktəblərində innovativ təcrübə texnologiyası əsasında
apardıqları dərs məşğələlərinin effektivlik səviyyəsi,
bu texnologiyanın fənlərə şagird marağının
artırılmasında rolu, müvafiq məktəb rəhbərliyinin və
fənn müəllimlərinin bu texnologiyanın tətbiqinə
münasibətinin canlı olaraq öyrənilməsi, müşahidə
məlumatlarının toplanması və təhsil ictimaiyyətinin,
nümayəndələrinin, təhsil ekspertlərinin iştirakı ilə
müzakirə edilməsi nəzərdə tutulur.
"Təhsil Tədqiqatları Mərkəzi" İB-nin Mətbuat xidməti
|
