ARXİV

18 Aprel 2014 - №14

Beynəlxalq təhsil xəbərləri

Uşaqların sosial şəbəkələrdən asılılığının səbəbləri məlum olub 

Alimlər uşaqların sosial şəbəkələrdən asılılığının səbəblərini müəyyən etməyə nail olublar. Meksika Milli Psixiatriya İnstitutunun alimləri belə qənaətə gəliblər ki, virtual məkana nəzarətsiz daxil olmalar uşaqların təhsil prosesinə mənfi təsir göstərə bilər. 12-18 yaşlı yeniyetmələr sosial şəbəkələrin təsirinə daha tez düşürlər. Alimlər müəyyən ediblər ki, bu yaşda olan oğlan və qızların baş beyni sosial şəbəkələrdən uzun müddət istifadə nəticəsində yaranan asılılığa  cavab vermək üçün kifayət qədər formalaşmayıb. Mütəxəssislər qeyd edirlər ki, uşaqlar sosial şəbəkələrdə ünsiyyət quraraq digər istifadəçilər tərəfindən həvəsləndirməyə məruz qalırlar. Virtual məkanın iştirakçıları hər dəfə  "mənim xoşuma gəlir" düyməsini basmaqla bir-birlərinin şəkillərinə və fikirlərinə müsbət qiymət verir və ya müxtəlif "smaylink"lər vasitəsi  ilə  öz emosiyalarını ifadə edirlər.   Bu cür ünsiyyət zamanı istifadəçilərin baş beynində dofamin adlı hormon ifraz olunur. Bu maddə isə beynin "həvəsləndirmə sistemi"nə cavab verir. Bu hormon məmnunluq hissi yaradır, motivasiya və təlim prosesinə təsir edir.  Alimlər qeyd edib ki, facebook və ya  Twitter kimi sosial şəbəkələrdən gün ərzində 4-5 saat istifadə edən uşaqlarda asılılığın müəyyən simptomları yaranır. Əgər əvvəllər uşaqların beynində dofaminin yaranması üçün onlara 5-7 "smaylink" kifayət idisə, hazırda özünün ətraf aləm üçün maraqlı olduğunu  hiss etmək üçün yeniyetməyə 20-30 "smaylink" tələb olunur. Alimlər bildirib ki, məhz bu tendensiya uşaq və yeniyetmələrin inkişafına mənfi təsir göstərir. Çünki İnternetdən asılı olan uşaqların real həyatda yaşlılar və həmyaşıdları ilə ünsiyyətdə problemləri olur. Buna görə də Milli Psixiatriya İnstitutunun əməkdaşları qətiyyətlə valideynlərə tövsiyə edirlər ki, öz uşaqlarını onların psixikası tam formalaşana qədər müxtəlif sosial şəbəkələrdən istifadəyə aludəçilikdən çəkindirsinlər.

2014-cü ilin ən yaxşı tələbə şəhərləri  

Böyük Britaniyanın "QS World University Rankings" şirkəti  2014-cü il üçün  dünyanın ən yaxşı tələbə şəhərlərinin adlarını açıqlayıb. Artıq ikinci dəfə tərtib olunan reytinq cədvəli ümumilikdə 14 kriteriyaya əsaslanır. Tərtibçilər universitetlərin dünya  reytinq cədvəllərindəki yerini, tələbə mühitinin rəngarəngliyini, həyat keyfiyyətini, işəgötürənlərin aktivliyini və əlyetərliyini nəzərə alıblar. Ötən reytinqdə olduğu kimi ilk 2 yeri Paris və London tutub. Sinqapur Boston şəhərini ötənilki mövqeyindən sıxışdıraraq 3-cü yerdə qərarlaşıb. İlk onluqda daha sonra Sidney, Sürix, Melburn, Honkonk, Boston, Monreal, Münhen kimi şəhərlər var. Avropa şəhərləri siyahıda dominantlıq təşkil edirlər.   Avropa dünyanın ən yaxşı tələbə şəhərlərinin olduğu region kimi  mövqeyini saxlayır.  50 ən yaxşı tələbə şəhəri siyahısında Avropadan 21, Böyük Britaniyadan 3, Fransadan 2, Almaniyadan 2, İspaniyadan 2 şəhərin adı çəkilir.  Siyahıda ən yaxşı tələbə şəhəri olan ölkələr aşağıdakılardır: Fransa, Böyük Britaniya, İsveçrə, Almaniya, İrlandiya, Avstriya, Danimarka, İtaliya, İspaniya, İsveç, Belçika, Niderland, Rusiya, Çexiya, Finlandiya, Norveç.    

Tələbələr üçün yeni qanun layihəsi  

İsveç hökuməti bu ölkədə təhsil alan xarici  tələbələrin  işlə  təmin olunmasına imkan verən yeni qanun layihəsi hazırlayıb. İyulun 1-dən qüvvəyə minəcək yeni qanun əcnəbi tələbələrin bu ölkədə yaşaması və işləməsi qaydalarını tənzimləyəcək. Bundan sonra İsveç ali məktəblərində aspirantura təhsilini başa vuran əcnəbi tələbələr əmək fəaliyyəti ilə təmin oluna və bu ölkədə daimi yaşamaq üçün  hakimiyyət orqanlarına müraciət edə bilərlər. İsveç mətbuatının məlumatına əsasən belə bir qanun layihəsinin qəbul olunması üçün indiki hökumət və "Yaşıllar Partiyası" arasında razılaşma əldə olunub. Bu  isə qanun layihəsinin ölkə parlamentində böyük səs çoxluğu qazanmasını şərtləndirir. İsveç ali məktəblərini başa vuran xarici tələbələr (magistrlər) ölkə şirkətlərində işləyə və ya öz kompaniyalarını yarada bilərlər.