|
 Roma
"La Sapienza" Universitetinin tələbəsi Nərgiz
İsmayılbəyli ilə söhbət
Nərgiz Malik qızı İsmayılbəyli 1990-cı ildə Bakı
şəhərində anadan olub. 1996-2007-ci illərdə Bakıdakı
10 nömrəli tam orta məktəbdə oxuyub. Orta məktəbi
fərqlənmə attestatı ilə bitirib. 2007-ci ildə ali
məktəblərə qəbul imtahanlarında 700 bal toplayaraq
Azərbaycan Tibb Universitetinin II müalicə-profilaktika
fakültəsinə qəbul olub və Prezident təqaüdünə layiq
görülüb. 2013-cü ildə isə həmin universiteti fərqlənmə
diplomu ilə bitirib. 2011-ci ildə yay
istehsalat-təcrübəsi çərçivəsində İtaliyanın Genuya
Universitetinin klinikasında ginekologiya şöbəsində
həkim köməkçisi kimi fəaliyyət göstərib. Hazırda
"2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı" çərçivəsində
İtaliyanın Roma "La Sapienza" Universitetində
(Universita di Roma "La Sapienza") "prenatal
diaqnostika və dölün patologiyası" ixtisası üzrə
magistratura təhsili alır.
- Orta məktəbdə daha çox hansı fənlərə meyil edirdiniz?
Həkim olmağa necə qərar verdiniz?
- Orta məktəbdə mənim ən çox sevdiyim fənlər riyaziyyat,
biologiya, xüsusən də anatomiya və ədəbiyyat olub.
Səmimi deyirəm, həkimlik, həkim olmaq, insanlara kömək
etmək, onların həyatını xilas etmək mənim uşaqlıq
arzumdur. Mən ginekologiya ixtisasını seçdim. Fikrimcə,
bu, ən mürəkkəb, eyni zamanda ən maraqlı
ixtisaslardandır. Burada eyni zamanda iki insanın
həyatına görə məsuliyyət daşıyırsan. Ailəm həmişə mənə
kömək edib və başladığım bütün işlərimdə məni
dəstəkləyib.
- Xaricdə təhsil üzrə Dövlət Proqramında iştirakınızı
necə xatırlayırsınız? Sizin üçün çətin olmadı ki...
- Xeyr. Dövlət Proqramı çərçivəsində tələbələrin seçim
prosesi hər halda mənim üçün çətin olmadı. Proqramda
iştirak etmək üçün bütün zəruri sənədləri toplayıb
Təhsil Nazirliyinə təqdim etdim. Müsahibədən keçdim və
məni proqrama qəbul etdilər. Diqqətimi çəkən başlıca
məqam odur ki, seçim prosesində tələbələrin biliyinə
çox obyektiv qiymət verilirdi və biz tələbələrə dünyanın
ən yaxşı universitetlərində təhsil almaq imkanı
yaradıldı. Bütün bu imkanlara, diqqət və qayğıya görə
biz gənclər Azərbaycan Respublikasının Prezidentinə çox
minnətdarıq.
 Qeyd
edim ki, dövlətimiz tərəfindən tibbi təhsilin inkişafına
böyük diqqət göstərilir. Son zamanlar ATU-nun nəzdində
çoxsaylı yeni klinikalar yaradılıb, onlar yeni texnika
və dünya standartlarına cavab verən ən müasir
avadanlıqlarla təchiz olunub. Əgər əvvəllər bizə
mütəxəssislər xaricdən gəlirdisə, hazırda milli
kadrlarımızın inkişafına böyük diqqət göstərilir. Dövlət
Proqramı da buna ən parlaq misaldır.
- Təhsil sistemimizdə aparılan işləri necə
qiymətləndirərdiniz?
- Şübhəsiz Azərbaycan sürətlə inkişaf edir. Ölkəmizin
dünya miqyasında rəqabətqabiliyyəti, ilk növbədə, təhsil
sistemində aparılan keyfiyyət dəyişikliklərindən
asılıdır. Hazırda Təhsil Nazirliyi bu sahədə ciddi iş
aparır. Müxtəlif təhsil texnologiyaları ölkəmizə
gətirilir, universitetlərimizin maddi-texniki vəziyyəti
yaxşılaşdırılır. Mən Azərbaycan Tibb Universitetini
bitirmişəm. Qeyd edim ki, ATU-da təhsil prosesi yüksək
səviyyədədir. Əsas diqqət tələbələrlə praktik işlərin
səviyyəsinin artırılmasına yönəldilməlidir. Düşünürəm
ki, tələbələrimiz xarici ölkələrdə olduğu kimi, təhsil
illərində paralel olaraq praktiki biliklər də əldə etmək
imkanlarına malik olmalıdırlar. Gənclərimizin ali
məktəbi bitirdikdən sonra müəyyən praktik bilikləri və
vərdişləri olmalıdır ki, onlar öz sahələrində inkişaf
etməklə yanaşı, həm də təhsilimizə və elmimizə,
ümumiyyətlə, ölkəmizə layiqli töhfələrini verə
bilsinlər.
- Oxuduğunuz ali məktəb barədə nə deyə bilərsiniz?
- Roma "La Sapienza" Universiteti tələbə sayına görə
Avropanın ən böyük universitetlərindən biridir. Təhsil
ocağında 11 fakültə, 50-dən artıq elmi-tədqiqat
institutu fəaliyyət göstərir. 140 min tələbənin təhsil
aldığı ali məktəbdə 10 mindən artıq müəllim çalışır.
"La Sapienza" Avropanın ən nüfuzlu elmi tədqiqat
mərkəzlərindən hesab olunur. Universitet tələbələrə
300 bakalavriat, 200-dən çox yüksəkixtisaslı magistr,
119 aspirant və 150-dən artıq doktor proqramları təqdim
edir. Doktor proqramlarından 6-sı beynəlxalq elmlər
doktoru statusuna malikdir. Universitetdə müəllim-tələbə
münasibətləri çox sərbəstdir. Universitetdə dünyanın bir
sıra ölkələrindən tələbələr təhsil alır. Əcnəbi
tələbələrə münasibət adidir. Burada hər kəs ciddi və
məsuliyyətli təhsil prosesində iştirak edir. Seçdiyim
ixtisas prenatal diaqnostika və dölün patologiyasıdır.
Magistratura pilləsində təhsil aldığımdan imtahan
sessiyası kursun sonunda nəzərdə tutulub.
- Tələbə həyatınız necə keçir?
- Tələbə həyatım çox maraqlı keçir, mühazirə oxuyan
müəllimlərimiz dünya səviyyəsində tanınmış
professorlardır, ən son müayinə və müalicə metodlarından
geniş bilik verirlər. Roma dünyanın ən qədim, gözəl və
nüfuzlu şəhərlərindən biridir. İtaliya mühitinə
adaptasiyam çox rahat keçdi. Boş vaxtlarımı əsasən
şəhəri gəzmək və onun gözəlliyini və qədim tarixi
abidələri seyr etməklə keçirirəm.
- Azərbaycan diasporası ilə əlaqələriniz...
- Mən Azərbaycanın İtaliyadakı səfirliyində qeydiyyata
düşmüşəm və bütün tədbirlər haqqında onlar tərəfindən
məlumat alıram və imkan daxilində bu tədbirlərdə iştirak
etməyə çalışıram. Xaricdə oxuyan hər bir azərbaycanlı
gənc təhsillə yanaşı, ölkəmizin, mədəniyyətimizin
dünyada tanınmasına, Azərbaycan həqiqətlərinin
çatdırılmasına, təbliğinə çalışmalıdır. İtaliyada
keçirilən tədbirlər də fəaliyyətimizə daha da təkan
verir.
- Avropa təhsilində hansı maraqlı məqamları qeyd edə
bilərsiniz?
- Avropa təhsil sistemindən danışanda mən, ilk növbədə,
müəllimlər və tələbələr arasında münasibəti qeyd etmək
istərdim. Bu münasibətlər çox sərbəstdir, qarşılıqlı
anlaşmaya əsaslanır. Müəllimdən qorxmaq kimi hiss
yoxdur. Mühazirələr müəllim və tələbə arasında sanki
söhbət, problemlərin müzakirəsi kimi keçir. Mühazirənin
sonunda müəllim ona ünvanlanmış bütün suallara cavab
verir. Bununla yanaşı, universitetdə tez-tez milli və
beynəlxalq konqreslər təşkil olunur, bu tədbirlərə
tələbələri də iştirak etməyə dəvət edirlər. Xaricdə
təhsilin maraqlı məqamlarından biri də odur ki,
məsələn, keçmiş və gələcək mühazirələr haqqında məlumatı
İnternet vasitəsi ilə öyrənmək və həmin mühazirələri pdf
formatında yükləmək olur.
- Seçdiyiniz ixtisas Azərbaycan üçün nə dərəcədə
önəmlidir?
- Qeyd etdiyim kimi, hazırda prenatal diaqnostika və
dölün patologiyası ixtisası üzrə təhsil alıram. Bu
problemin Azərbaycan üçün də çox aktual olduğunu
düşünürəm, çünki bizim ölkəmizdə qohumlararası nigahlara
və bunun nəticəsi kimi də ölü doğulmuş və müxtəlif
inkişaf anomaliyaları ilə dünyaya gələn körpələrə
tez-tez rast gəlmək olar. Prenatal diaqnostika inkişaf
anomaliyalarını hamiləliyin erkən dövründə müayinə
edərək müvafiq tədbirlər görməyə imkan verir. İtaliyada
belə bir sahədə təhsil almaq, yenilikləri əldə etmək
Azərbaycanın ehtiyacı olan bir ixtisası öyrənib
ölkəmizdə onu tətbiq etmək üçün gözəl bir imkandır.
- Gənclərimizin xaricdə təhsil almaq səylərinə necə
baxırsınız?
- Çox müsbət. Xaricdə təhsil yeni imkanlar deməkdir.
Dünyanın aparıcı universitetlərində təhsil almaq,
aparıcı klinikalarda tətbiq olunan texnologiyalarla
tanış olmaq yüksəkixtisaslı kadr kimi formalaşmaq üçün
mühüm şərtlərdəndir. Düşünürəm ki, hər bir insan seçdiyi
peşəni yüksək səviyyədə bilməlidir. Şübhəsiz xaricdə
təhsil həm də ölkəmizi layiqincə təmsil etmək
deməkdir. Azərbaycan sürətli inkişafda olan bir
ölkədir və buna görə də ölkəmizə gələcəkdə müxtəlif
sahələr üzrə daha çox yüksəkixtisaslı kadrlar lazım
olacaq.
- Sizcə, təhsildə uğur əldə etməyin sirri nədir?
- Məncə uşaqlıqdan, elə birinci sinifdən öz üzərində
mütəmadi olaraq çalışmalı, məşğul olmalısan. Əldə
olunmuş nailiyyətlərlə kifayətlənmək və bu yolda
dayanmaq olmaz. Bir məqsədə çatanda qarşıda daha yeni
hədəf seçmək lazımdır. Daim daha çox öyrənməyə can
atmaq, öz üzərində çalışmaq, təkmilləşmək, yeni dünya
ədəbiyyatını oxumaq lazımdır.
- Bir qədər də gələcək planlarınız barədə danışaq...
- Əlbəttə ki, əsas hədəfim seçdiyim ixtisası mükəmməl
mənimsəməkdir. Daha sonra isə arzum ölkəmizdə bu
ixtisası ginekologiya sahəsində geniş tətbiq etmək və
Azərbaycan təhsilində bu ixtisasın öyrənilməsinə yardım
göstərməkdir.
- Biz də sizə bu yolda uğurlar arzulayırıq!
Oruc MUSTAFAYEV,
"Azərbaycan müəllimi" |
