|
 Azərbaycan
Dövlət Mədəniyyət və İncəsənət Universitetində
"Türksoylu xalqların musiqi mədəniyyətinin tədqiqi
problemləri" mövzusunda Beynəlxalq konfrans keçirilib.
Konfransda Türkiyənin Azərbaycandakı səfirliyinin
nümayəndələrinin, Türkiyənin Batman Universitetinin
Gözəl Sənətlər fakültəsinin, Qazıantep Universitetinin
Türk Musqisi Dövlət Konservatoriyasının, İsrailin
Təl-Əviv Konservatoriyasının, Bakı Musiqi
Akademiyasının, Azərbaycan Milli Konservatoriyasının,
AMEA-nın, Azərbaycan Dövlət Pedaqoji Universitetinin və
ADMİU-nun professor-müəllim heyəti və tələbələri iştirak
edirdilər.
Konfransı giriş sözü ilə açan ADMİU-nun rektoru,
professor Timuçin Əfəndiyev qonaqları salamlayaraq bu
kimi konfransların keçirilməsinin vacibliyinə diqqət
çəkdi və türksoylu xalqların timsalında iki qardaş
ölkənin - Türkiyə və Azərbaycanın zəngin tarixə və
mədəni irsə malik olduğunu vurğuladı.
ADMİU-nun elm və yaradıcılıq işləri üzrə prorektoru,
professor, əməkdar incəsənət xadimi Maral Manafova öncə
tədbirin bu cür yüksək səviyyədə keçməsinə şərait
yaratdığı üçün universitetin rektoru, professor Timuçin
Əfəndiyevə minnətdarlığını bildirdi və mövzu haqqında
geniş və əhatəli çıxış etdi. Qeyd edildi ki, bu kimi
mövzuların müzakirəsi hər birimiz və ictimaiyyətimiz
üçün önəm daşıyır. Bu xalqların təbii, üzvi xarakterli
əməkdaşlığı son zamanlar humanitar elm sahəsində
fəaliyyət göstərən çoxsaylı alimlərin müzakirə
predmetinə çevrilmiş, türkşünaslıq və regionlararası
əlaqələri, onların fərqli və oxşar cəhətlərini araşdıran
müqayisəli sənətşünaslıq kimi elmi istiqamətlərin
meydana gəlməsinə şərait yaratmışdır. Vurğulandı ki,
respublikamızda bu sahədə elmi araşdırmalar keçən əsrin
90-cı illərindən rəvac tapmışdır. Tarixi vərəqləyərkən
biz dahi Üzeyir Hacıbəylinin türkçülük ideyası uğrunda
nə qədər mübarizə apardığının şahidi oluruq. Dövrümüzün
nailiyyətlərindən biri də bu ideyanın artıq bir varlıq,
həqiqət kimi qəbul olunmasıdır. Ümumtürk musiqi aləmi
çox zəngin və dərin qarşılıqlı əlaqələr tarixinə
malikdir. Bu tarixi mənbələrin öyrənilməsi Azərbaycan
humanitar elmi qarşısında duran ən önəmli
problemlərdəndir.
ADMİU-nun "Musiqişünaslıq" kafedrasının müdiri, əməkdar
incəsənət xadimi, sənətşünaslıq üzrə fəlsəfə doktoru,
dosent Kamilə Dadaşzadə "Epik sənətin araşdırılmasında
konsept anlayışının tətbiqinə dair", Batman
Universitetinin Gözəl Sənətlər Fakültəsinin professor
assistenti, dosent, sənətşünaslıq üzrə fəlsəfə doktoru
Seyran Qafarzadə "Milli musiqi çalğı aləti balaban:
adlanma və yayılma məsələsinə dair bəzi təsbitlər",
Batman Universitetinin Gözəl Sənətlər Fakültəsinin
professor assistenti, Dok. Rohat CEBE "Yezidi dini
müziği", Türkiyənin Qazıantep Universitetinin Türk
Musqisi Dövlət Konservatoriyasının dosenti Yalçın
Abdulla, AMEA-nın doktorantı Hafiz Kərimov "Aşıq vokal
ifaçılığında "qoşma" janrının tətbiqinə dair"
məruzələrlə çıxış etdilər.
Universitetdə təhsil alan türk tələbə Oğuzhan Mercimek
Qaradəniz kamançasından, türk tələbə Alparslan Yeşilbaş
isə türk zərb alətlərindən bəhs etdi. |
