|
Qəzetə ünvanlanmış təbriklər
İlk nömrəsinin nəşrə başlaması və 60-70 illik
yubileyləri münasibəti ilə "Azərbaycan müəllimi"
qəzetinə müxtəlif təbriklər ünvanlanıb. Onlardan
bəzilərini təqdim edirik.
Mədəni inqlabın yeni mübarizinə!
Bolşevik mətbuatının sırasına yeni daxil olan mübariz
"Qommunist Məarifi"nə "Qommunist" ğəzetəsinin
işçi-kəndli müxbirləri və əməkdaşları tərəfindən alovlu
bolşevik salamları.
"Qommunist" ğəzetəsi əmin olur ki, "Qommunist Məarifi"
bütün qüvvəsini birinci nömrəsindən başlayaraq XVII
firqə qurultayının qərarlarının yerinə yetirilməsi, xalq
məarifi dəyərinin yüksək pilləyə qaldırılması, dərslərin
kəmiyyət və keyfiyyətinin yaqşılaşması, yeni dərs ilinin
bolşeviq hazırlığı ilə qarşılanması, Azərbaycanın
başdan-başa savadlılar cümhuriyyətinə verilməsi və
müəllimlərin Marks - Engels - Lenin - Stalin inqlaği
nəzəriyyələrilə silahlanması uğrunda məarif kütlələrinin
həqiqi və kütləvi təbliğatçısı, təşviqatçısı və
təşkilatçısı olacaqdır.
"Qommunist" redaksiyası
"Qommunist Məarifi",
2 sentyabr 1934-cü il,
№ 1
"Qommunist
Məarifi" ğəzetəsi redaksiyasına!
Marks - Lenin məktəb quruluşu cəbhəsinin, sosyalizm
nəslinin internasional tərbiyəsi uğrunda yeni döyüşçüsü
və dərs ili ərəfəsində çıqan "Qommunist Məarifi"
ğəzetəsinə bolşevik səlamları!
Ğəzetənin, Stalin yoldaşın göstərişlərinin və məktəb
haqqında ÜİQ(b)F MQ-si qərarlarının həyatə tətbiqində
kitlələri səfərbərligə alacağına əminik.
Məktəb işini bilən ustadların təcrübələrini gəridə
qalanlara verməgə çalışın. Onları ÜİQ(b)F MQ və ZÖQ-çi
qərarlarının bolşevikcəsinə realizə edilməsi nümunələri
əsasında ögrədin.
Bolşevik firqəsi və dahi Stalinin bizə, 2-nci beş
illikdə sınıfsız sosializm cəmiyyətinin gələcək
üzvilərini tərbiyə edəcək LENİN məktəb quruluşu yolunda
maniçilik göstərənləri amansızcasına ifşa edin.
"BAK.RABOÇİ"
"Qommunist Məarifi",
2 sentyabr 1934-cü il,
№
1
Biz inanırıq
Elmimizin, maarifimizin zəngin nailiyyətlərinin,
qabaqcıl ənənələrinin təbliğində görkəmli rol oynayan,
xalqımızın ziyalandırılmasında müstəsna xidmətləri olan
"Azərbaycan müəllimi" qəzetinin 60 yaşı tamam olur. Bu
şərəfli yubiley münasibətilə 75 yaşlı Bakı Dövlət
Universitetinin çoxminli professor-müəllim və tələbə
kollektivləri adından "Azərbaycan müəllimi" qəzetini,
onun yaradıcı heyətini ürəkdən təbrik edir, tutduğu
şərəfli yolda ona uğurlar arzulayırıq.
"Azərbaycan müəllimi" qəzeti 30-cu illərdə çətin bir
şəraitdə savadsızlığa qarşı gərgin mübarizə aparıldığı,
milli ziyalı kadrlara çox böyük ehtiyac olan bir dövrdə
fəaliyyətə başlamışdır. İlk nömrəsindən başlayaraq
maarif və mədəniyyətin, təhsilin təbliğatçısı olmuş,
elmi və pedaqoji biliklərin ən yeni nailiyyətlərini
geniş kütlə içərisində yaymışdır.
Onun 60 illik dövrdə çıxan nömrələri maarif və
mədəniyyətimizin canlı salnaməsinə çevrilmişdir. Qəzetin
səhifələrində təhsil sisteminin bütün problemləri,
qabaqcıl təcrübə nümunələri, ömrünü, əməyini maarifə,
xalqın savadlanmasına həsr edən pedaqoqlar, gəncliyin,
yeniyetmələrin təlim-tərbiyəsi həmişə yüksək səviyyədə,
sənətkarlıqla əks etdirilmişdir.
"Azərbaycan müəllimi" qəzeti bütün səmərəli fəaliyyəti
dövründə orta təhsil sistemi ilə yanaşı, ali təhsilə,
gənc mütəxəssislərin hazırlanmasına, ali məktəblərin
elmi-pedaqoji kadrlarına xüsusi diqqət və qayğı ilə
yanaşmışdır.
Onun səhifələrində Bakı Dövlət Universitetində görülən
zəngin elmi-tədqiqat və pedaqoji işlərdən dəfələrlə
yazılmışdır. Buna görə də "Azərbaycan müəllimi" qəzetini
universitetimizin kollektivi özünün doğma qəzeti hesab
edir və həvəslə oxuyur.
"Azərbaycan müəllimi" qəzeti müxtəlif ictimai-siyasi
şəraitlərdə maraqlı, çətin yol keçmiş, bir sıra
sınaqlarla üzləşmiş, lakin özünün müqəddəs amalına,
ənənələrinə sadiq qalmışdır. Biz inanırıq ki,
müstəqillik, suverenlik yolunda inamla addımlayan
Azərbaycan Respublikasının hazırki çətin sosial-siyasi
və iqtisadi vəziyyətində də öz nəcib yolundan
dönməyəcək, məsləkinə, əqidəsinə sadiq qalacaqdır.
M.N.ƏLƏSGƏROV,
M.Ə.Rəsulzadə adına
BDU-nun
rektoru,
professor
"Azərbaycan müəllimi",
25 noyabr 1994-cü il,
№
27
"Azərbaycan müəllimi" qəzetinin kollektivinə
"Azərbaycan müəllimi" respublikamızın mətbuat aləmində
özünəməxsus yaradıcılıq yolu keçmiş, Azərbaycanda
təhsilin inkişafında silinməz izlər buraxmış pedaqoji
nəşrlərdən biridir. Bu qəzet Azərbaycanda təhsil, elm və
mədəniyyətin inkişafı yolunda əvəzsiz xidmətlər
göstərmiş, maarifimizin dəyərli salnaməsinə
çevrilmişdir.
"Azərbaycan müəllimi" gənc nəslin təlim-tərbiyəsində,
pedaqoji kadrların elmi-metodiki biliklərinin
zənginləşməsində mühüm rol oynamış, çoxminli pedaqoji
ictimaiyyətin sevimli qəzetinə çevrilmişdir.
Bu gün "Azərbaycan müəllimi" öz səhifələrində ölkəmizdə
təhsilin vəziyyəti, müstəqil dövlətimizin təhsil
siyasətinin əsas istiqamətləri və gələcək inkişaf
yolları, dünya təhsil sisteminin təcrübəsi ilə tanışlığa
dair analitik yazılar çap etdirməklə yanaşı, müharibənin
təhsil işinə vurduğu zərbələrin dünyaya çatdırılması,
gənclərdə Vətənə məhəbbət, düşmənə sonsuz nifrət
hisslərinin aşılanması yolunda öz imkanlarından
bacarıqla istifadə edir.
İlk nömrəsinin çapdan çıxmasının 60 illiyi münasibətilə
"Azərbaycan müəllimi" qəzetinin bütün əməkdaşlarını
ürəkdən təbrik edir, onlara xalqımızın maarifinin daha
da çiçəklənməsi və inkişafı naminə yeni-yeni uğurlar
diləyirəm.
L.X.RƏSULOVA,
Azərbaycan Respublikasının təhsil naziri
"Azərbaycan müəllimi",
17 noyabr 1994-cü il,
№
26
Keçmişinə cəsarətlə baxan qəzet
Yubiley günündə istəsən də, istəməsən də arxaya baxmalı
olursan, ötən illərə bir-bir nəzər salırsan. Həmin yolda
üzağardan işlər görmüsənsə rahatlıq tapırsan, başını dik
tutursan. Təsəllin bu olur ki, xalqına, millətinə imkan
daxilində xidmət göstərmisən.
Belə fəxrlə dayanmağa 60 yaşlı "Azərbaycan müəllimi"
qəzetinin də haqqı var. O, zərurətdən doğuldu.
Respublikamızda savadsızlığın ləğvində geniş təbliğat,
təşkilat işi apardı. Məktəblərdə qabaqcıl təcrübənin, iş
üslubu və metodlarının ən ucqar rayonlara
çatdırılmasında böyük rol oynadı. Səhifələrində təcrübə
mübadiləsinə geniş yer verdi. Respublikamızda elm və
təhsilin bu səviyyəyə çatdırılmasında xidmətləri az
olmadı. Ötən müddətdə "Azərbaycan müəllimi" təkcə elm
və təhsil sistemində çalışanların deyil, daha geniş
kütlənin sevimli qəzetinə çevrildi.
İndi "Azərbaycan müəllimi"nin qarşısında daha məsul
vəzifələr durur. O, Təhsil Qanununun tətbiqində, dünya
standartları səviyyəsində kadrlar yetişdirilməsində
yaxından iştirak edir.
"Xalq qəzeti"nin kollektivi "Azərbaycan müəllimi"ndə
çalışan həmkarlarını ürəkdən təbrik edir, onlara bugünkü
çətin və şərəfli işlərində uğurlar arzulayır.
"Xalq qəzeti"nin yaradıcı kollektivi
"Azərbaycan müəllimi",
17 noyabr 1994-cü il,
№
26
Baş redaktora
Altmış ildə "Azərbaycan müəllimi" şərəfli yol keçmiş və
bu günkü böyük, habelə gənc nəslin tərbiyələnib
yetişməsində əhəmiyyətli rol oynamışdır. Qəzet
respublikada təhsil sisteminin təkmilləşdirilməsinə
təkan vermiş, müəllimlərimizin istiqamətləndirilməsi
kimi mühüm bir işi özünün əsas vəzifəsi hesab etmişdir.
Qəzetin tarixinin digər önəmli cəhəti bundan ibarətdir
ki, onun əməkdaşları sırasında görkəmli jurnalistlər və
tədqiqatçılar yetişmiş və onlar pedaqoji elmin
inkişafında fəal iştirak etmişlər.
Vətənimizin ağır zamanlar yaşadığı indiki dövrdə
"Azərbaycan müəllimi" qəzetinin əməkdaşlarına və
oxucuları olan müəllimlərimizə səbr, inam arzulayırıq və
ümid edirik ki, qəzet bundan sonra da müəllimin müqəddəs
adının yüksək tutulması uğrunda apardığı mübarizəni
dönmədən davam etdirəcəkdir.
Azərbaycan Jurnalistlər Birliyi yubiley münasibətilə
"Azərbaycan müəllimi" qəzetinin əməkdaşları və
oxucularını təbrik edir, onlara ağır, şərəfli işlərində
uğurlar arzulayır.
H.HACIYEV,
Azərbaycan Jurnalistlər Birliyinin sədri
"Azərbaycan müəllimi",
17 noyabr 1994-cü il,
№
26
Yeni uğurlar diləyirik
Əziz həmkarlar!
Pedaqoji mətbuatımızın inkişafında səmərəli
fəaliyyətinizə, qabaqcıl müəllimlərin və təhsil
müəssisələrinin iş təcrübəsinin, təhsilin əsas problem
və istiqamətlərinin hərtərəfli işıqlandırılmasında fəal
mövqeyinizə və 60 illik şərəfli yol keçdiyinə görə Sizi
ürəkdən təbrik edir, yaşadığımız məsuliyyətli və tarixi
bir anda kollektivinizə ən səmimi arzularımızı bildirir,
təhsil sisteminin daha da inkişafı sahəsində apardığınız
yaradıcı işdə yeni-yeni uğurlar diləyirik.
Təhsil İşçiləri Azad Həmkarlar İttifaqının Azərbaycan
Respublika Komitəsi
"Azərbaycan müəllimi",
25 noyabr 1994-cü il,
№
27
Müəllim də yazıçıdır
Azadlıq, müstəqillik yoluna çıxmış doğma respublikamızın
milli maarifinin dirçəlişi və yüksəlişi işində Sizə ən
səmimi istəklərimizi çatdırırıq.
Müəllim və yazıçı bir-birinə çox yaxın, əslində eyni
qayə və məqsəd daşıyan anlayışlardır. Sizin qəzetiniz 60
illik ömründə həmişə söz-sənət sahibləri, ədiblər,
yazıçılarla həmrəy olmuş, bütünlükdə ədəbiyyatımızın
araşdırılması, öyrənilməsi və yayılması üçün səylərini
əsirgəməmişdir.
"Ədəbiyyat qəzeti" Sizin 60 yaşınızı yaxın yaşıdının
əlamətdar günü kimi qiymətləndirir. Bütün
əməkdaşlarınıza xeyirxah, nəcib işinizdə cansağlığı,
yazıb-yaratmaq arzulayırıq.
"Ədəbiyyat qəzeti" əməkdaşları adından baş redaktor
Sabir Əhmədli
"Azərbaycan müəllimi",
25 noyabr 1994-cü il,
№
27
|
"Azərbaycan müəllimi"nin arxivindən
Azərbaycan müəllimlərinin IX qurultayı (1978-ci
il) |
|
 |
Tanınmış imzalar
Ədəbiyyat dərsliyini yaxşılaşdırmalı
...Ədəbiyyat dərsliklərinin yaradılmasında Azərbaycan
ədəbiyyatşünaslığının böyük xidməti vardır. Neçə
illərdir ki, görkəmli ədəbiyyatşünaslarımızın
yaratdıqları dərsliklər yeni nəslin yetişməsinə yaxından
kömək edir. Ancaq xalqımızın getdikcə artan mənəvi
tələbləri ölkəmizin qarşısında duran yeni, böyük
vəzifələr... bu dərslikləri nəzərdən keçirmək,
keyfiyyətini daha da yaxşılaşdırmaq ehtiyacını irəli
sürür.
1955-ci ildə orta məktəbin VIII sinfi üçün Həmid Araslı
yoldaşın yazmış olduğu ədəbiyyat dərsliyinin yeni,
dördüncü çapı nəşr edilmişdir. Məlum olduğu üzrə, VIII
sinifdə Azərbaycan ədəbiyyatının geniş və zəngin
tarixinin əsasları öyrədilir. Eyni zamanda rus və Qərbi
Avropa ədəbiyyatının mühüm hadisələrinə burada yer
verilmişdir. Bu dərslik VIII sinif şagirdlərini dünya
ədəbiyyatı ilə tanış etmək üçün yeganə ciddi və əsaslı
bir mənbədir. XIX əsrə qədər ədəbi inkişaf, klassiklərin
ən görkəmli əsərləri, bədii əsərlərin mətnlərinin
müfəssəl öyrənilməsini, bədii ədəbiyyatın tərbiyəvi
təsirinin təmin edilməsi, ədəbiyyat tarixi və
nəzəriyyəsinin əsasları ilə tanışlıq bu dərslikdən tələb
olunan ən mühüm məsələlərdir.
Bu nöqteyi-nəzərdən dərsliyə yanaşdığımız zaman, hələ
onun sovet məktəbləri üçün yaradılmış olan yeni tipli
dərsliklərdən xeyli geridə qaldığını etiraf etməyə
məcburuq. Təəssüf ki, dərslikdə rus ədəbiyyatı
dərsliklərinin yaradılması işində əldə edilən
nailiyyətlərdən çox az istifadə olunmuşdur. Məsələn,
keçmiş illərdə rus məktəblərində N.Pospelov və
P.Şablonskinin "Russkaya literatura" dərsliyi
işlədildiyi halda, üçüncü ildir ki, bunun əvəzində
S.M.Florinskinin yazdığı daha mükəmməl və daha əlverişli
yeni bir dərslik yaradılmışdır. VIII sinif dərsliyinin
müəllifi H.Araslı yoldaş rus ədəbiyyatı haqqındakı
fəsilləri orijinal və müstəqil surətdə yazmaq əvəzinə,
köhnəlmiş və artıq istifadə edilməyən bir dərsliyə
əsaslanmışdır. Nəticədə kitabda bir çox ciddi səhvlərə
yol verilmişdir...
M.RƏFİLİ,
filoloji elmlər doktoru, professor
"Azərbaycan müəllimi",
2 fevral 1956-cı il,
№
5
SSRİ xalqlarının sevimlisi
Mirzə Ələkbər Sabirin böyük sənətkar olduğunu sübut
etməyə ehtiyac yoxdur. Azərbaycan xalqının böyük satirik
şairi Yaxın və Orta Şərqin bir çox ölkələrində,
sosialist Vətənimizdə yaşayan çoxmilyonlu xalqlar
arasında sönməz şöhrət qazanmışdır. SSRİ xalqları indi
nəinki Sabirin əsərlərinin tərcüməsini öz ana dillərində
sevə-sevə oxuyur, eyni zamanda şairin yaradıcılığı
haqqında qardaş respublikaların elm ocaqlarında elmi
əsərlər yazılır, tədqiqat işləri aparılır.
Belə bir faktı qeyd etmək kifayətdir ki, bu il may
ayının 25-də M.V.Lomonosov adına Moskva Dövlət
Universitetinin SSRİ xalqları ədəbiyyatı kafedrasında
son kurs tələbələrindən Tamara Aleksandrovna Romaniy
"Sabir satirasının xüsusiyyətləri" mövzusunda yazdığı
diplom işini müvəffəqiyyətlə müdafiə etmişdir.
Əsər haqqında çıxış edən dosent Xalıq Hüseyn oğlu
Koroğlu və başqaları gənc diplomçunun bu əsərinə yüksək
qiymət vermişlər. Əsər "əla" qiymətə layiq görülmüşdür.
Kafedra həmin diplom işini Bakıya, Nizami adına Dil və
Ədəbiyyat İnstitutuna göndərməyi qərara almışdır. Əsər
instituta təqdim edilmişdir.
Bu kiçik faktla göstərmək istəyirəm ki, xalqımızın böyük
şairi Sabiri SSRİ xalqları yaxından tanıyır, onun həmişə
təravətli olan, duzlu, məzəli, eyni zamanda kəskin
satira gülüşü ilə dolu olan şeirlərini sevə-sevə
oxuyurlar.
Mirzə Ələkbər Sabir bütün Sovet xalqlarının sevimli
şairi olmuşdur. Bu bizim fəxrimizdir. Böyük şairimiz
Sabir öz ölməz əsərləri ilə illər, əsrlər boyu qardaş
Sovet xalqları arasında hörmətlə yad ediləcək və onun
əsərləri sevilə-sevilə oxunacaqdır.
Əziz ŞƏRİF,
M.V.Lomonosov adına Moskva Dövlət Universiteti
SSRİ xalqları ədəbiyyatı kafedrasının müdiri, filoloji
elmlər doktoru, professor
"Azərbaycan müəllimi",
31 may 1962-ci il, № 43
Uşaq təxəyyülünün bəzi xüsusiyyətləri haqqında
Kəndə xalasının yanına dincəlməyə gəlmiş yeddi yaşlı
Ənvər axşam üstü həyətdə oyuncağını axtararkən qonşu
qızın ağladığını eşitdi. O, qaça-qaça evə gəlib: - Ana!
Ana! Rasiməni canavar apardı, - dedi.
Ana təəccüb etdi: - Necə yəni apardı?
Uşaq çiyinlərini çəkdi: - Apardı də. Axı, onun da
uşaqları gəlincik istəyir.
Hamı gülüşdü. Xalası Ənvəri qucağına alıb onu əzizləyə-əzizləyə
dedi:
- Sən nə yaman yalançısan! Bir də yalan danışsan canavar
gəlib səni də aparar.
Məktəbəqədər yaşlı uşaqlarda belə hallar tez-tez baş
verir. Lakin təəssüflə qeyd etmək lazımdır ki, bəzi
valideynlər çox vaxt uşağın özündən müxtəlif əhvalatlar
uydurmasının mahiyyətini nəzərə almadan, onu yalan
danışma kimi qiymətləndirirlər. Bu, ciddi səhvdir.
Yalan danışan uşaq başqalarını aldatmaq və çaşdırmaq
məqsədi ilə həqiqəti təhrif edir. Qəsdən yalan danışma
uşağın insanlara və həyata saxta münasibətlərinin
ifadəsidir. Çox vaxt isə uşaq, əslində qarşısına yalan
danışmaq məqsədi qoymur. O, həqiqəti qəsdsiz surətdə
təhrif edir. Yuxarıda verdiyimiz nümunə buna misal ola
bilər.
Belə hallarda uşağı yalan danışmaqda ittiham etmək, "yalan
danışdığı" üçün cəzalandırmaq olmaz. Heç vaxt yalan
danışmaq haqqında düşünməyən və bəlkə də bu sahədə hələ
təsəvvürü olmayan məktəbəqədər yaşlı uşağı yalançılıqda
ittiham etdikdə, onda insanlara etibar və inam azalır,
qeyri-səmimi münasibət yaranır. Uşaqda qapalılıq, az
danışmaq, başqa adamlarla ünsiyyətdən qaçmaq meyli
təşəkkül tapır.
Əlbəttə, uşaq həqiqəti təhrif edirsə, onun səhvini
düzəltmək lazımdır. Bu, həm də uşaqları düzgün tərbiyə
etmək üçün çox əhəmiyyətlidir. Çünki uşaq həqiqəti
təhrif edə-edə tədricən yalan danışmağa adət edə bilər.
Lakin bu, valideyndən xüsusi məharət tələb edir...
...Uşaqların həqiqəti qəsdsiz təhrif etməsi, hər şeydən
əvvəl, onların qavrayış və təfəkkürünün xüsusiyyətləri
ilə əlaqədardır. Müşahidəçilik qabiliyyəti inkişaf
etməmiş uşaq cismin əsas xüsusiyyətlərini görə bilmir,
daha çox nəzərə çarpan ikinci dərəcəli xüsusiyyətlərə
fikir verir. Qavrayışın dəqiq və tam olması müşahidə
şəraitindən də çox asılıdır. Uşaq cismi hərtərəfli
qavramaq imkanına malik olmadıqda onu adətən səthi
qavrayır və gördüyü hadisəni öz təəssüratı səpgisində
təsvir edir...
Əbdül ƏLİZADƏ,
V.İ.Lenin adına APİ-nin psixologiya kafedrasının baş
müəllimi
"Azərbaycan müəllimi",
13 dekabr 1964-cü il, № 100 |
