|
Müasir və müstəqil Azərbaycan Respublikasının ictimai,
siyasi, mədəni həyatında qazanılan parlaq qələbələri
ölkə tarixinə qızıl hərflərlə yazmış ümummilli lider
Heydər Əliyevin anadan olmasının 91-ci ildönümü
münasibəti ilə aprelin 4-də Sumqayıt Dövlət
Universitetində Təhsil Nazirliyinin və Təhsil İşçiləri
Azad Həmkarlar İttifaqı Respublika Komitəsinin birgə
təşkilatçılığı ilə ali məktəb tələbələri arasında bədii
yaradıcılıq festivalının seçim turu keçirilib. Seçim
turunda SDU-nun istedadlı tələbələri maraqlı konsert
proqramı ilə çıxış edib, şeir, mahnı və digər musiqi
nömrələri səsləndirilib.
Festivalın keçirilməsi üzrə təşkilat komitəsinin üzvləri
və Azərbaycan Bəstəkarlar İttifaqının katibi, Bakı
Musiqi Akademiyasının professoru Zemfira Qafarova,
ADPU-nun baş müəllimi, bəstəkar Nailə Mirməmmədli,
əməkdar incəsənət xadimi, şair Baba Vəziroğlu,
Azərbaycan Respublikasının xalq artisti Təranə Muradova,
Azərbaycan Dövlət Opera və Balet Teatrının baş rejissoru
Hafiz Quliyev, Təhsil Nazirliyi Təhsil Alan Gənclərin
Respublika Bədii Yaradıcılıq Evinin direktor müavini
Kəmalə Həsənova münsiflər kürsüsündə əyləşmişlər.
İstedadlı tələbələr münsiflər qarşısında öz
bacarıqlarını nümayiş etdiriblər.
Bədii qiraət üzrə fizika və elektroenergetika
fakültəsinin tələbəsi Rufanə Hacıyeva Cabir Novruzun
"Sevin, Azərbaycan", kimya və biologiya fakültəsinin
tələbəsi Lalə Axundlu Məmməd Arazın "Ayağa qalx,
Azərbaycan!", filologiya fakültəsinin tələbəsi Lalə
Niftəliyeva Abbas Səhhətin "Vətən", filologiya
fakültəsinin tələbəsi Əfşan Veysəlova Əhməd Cavadın
"Kuropatkino", filologiya fakültəsinin tələbəsi Anar
Məmmədli Cabir Novruzun "Azərbaycan dərdi", mühəndislik
fakültəsinin tələbəsi Elvin Musayev öz müəllifi olduğu
"Səni niyə sevmişəm?" şeirlərini yüksək peşəkarlıqla
səsləndiriblər.
Seçim turunda milli, folklor rəqsi ilə yanaşı xarici və
hind rəqs nömrələri də maraqla qarşılanıb.
Filologiya fakültəsinin tələbəsi Rahib Məmmədlinin saz
ifası müsabiqəyə xüsusi əlvanlıq qatıb.
Mühəndislik fakültəsinin tələbəsi Niyaməddin Əhmədov
"This is the life (Bu həyatdır)", riyaziyyat
fakültəsinin tələbəsi Raci İmamverdiyev "Süsən sünbül"
xalq mahnısını ifa etdi. Raci İmamverdiyevin ifasındakı
"Qarabağ şikəstəsi" münsiflər və tədbir iştirakçıları
tərəfindən xüsusi rəğbətlə qarşılanıb.
Sonda münsiflər heyəti öz təklif və tövsiyələrini verib,
tələbələrin hərtərəfli yetişməsi üçün yaradılan şəraitə
və onlara göstərilən diqqət və qayğıya görə universitet
rəhbərliyinə dərin təşəkkürlərini bildirdilər.
Mayın 7-də Azərbaycan Dövlət Musiqili Teatrında ali
məktəb tələbələrinin bədii-yaradıcılıq festivalının
yekun konsertinin keçirilməsi nəzərdə tutulub.
SDU-nun Mətbuat xidməti |
