|
Cari ilin 26 may tarixində Bakıda Gənclər və İdman
Nazirliyi, Azərbaycan Milli Elmlər Akademiyası, YUNESKO,
Gənc tədqiqatçıların Avropa Şurası "Eurodoc" və
"Azərbaycan gənc alim, aspirant və magistrlər"
Cəmiyyətinin birgə təşkilatçılığı ilə "Bakı Dünya
Alimlər Forumu" ("Baku World Science Forum") öz işinə
başlayacaq. 31 may tarixinədək davam edəcək forumun əsas
məqsədi dünyanın gənc alimlərini bir araya gətirərək
müxtəlif elmlərin nümayəndələri arasında iş birliyinin
yaradılması, mövcud gənc alimlər şəbəkələrinin
inkişafına dəstək verilməsidir. Foruma 100 ölkədən 200
nəfər yerli iştirakçı da daxil olmaqla 500 nəfərdən
artıq iştirakçının qatılacağı gözlənilir.
Forumun əsas mövzusu kimi "Dünya elmində yeni
çağırışlar: Gənc alimlərin birgə yanaşmaları" elan
edilib. Forum çərçivəsində aşağıdakı 5 istiqamət üzrə
qeyd olunan mövzularda sessiyalar keçiriləcəkdir:
- Texniki sahələr: "Texniki elmlər müasir innovasiya
sistemlərinin əsası kimi".
- Səhiyyə, biologiya və kimya: "Yeni texnologiyaların
yaradılması əsasında təbii proseslər".
- Ekologiya, torpaq elmləri və kənd təsərrüfatı:
"Torpaq, kənd təsərrüfatı və ətraf mühitin
öyrənilməsində fənlərarası yanaşma".
- İqtisadiyyat və sosiologiya: "İqtisadiyyat və
sosiologiya qlobal inkişafın uğurlu birləşməsi kimi".
- Tarix, fəlsəfə, mədəniyyət: "Müasir dünyada sosial və
humanitar elmlərin problemləri".
Qeyd edək ki, işçi dili ingilis dili olacaq "Bakı Dünya
Alimlər Forumu"nda dünya şöhrətli alimlərin və müxtəlif
beynəlxalq mükafat laureatlarının çıxışları da
gözlənilir.
Samirə KƏRİMOVA,
"Azərbaycan müəllimi" |
