|
 Azərbaycanın
birinci xanımı Mehriban Əliyeva sərgi ilə tanış olub
Aprelin 9-da Heydər Əliyev Mərkəzində müasir dünya
incəsənətinin görkəmli nümayəndələrindən biri, məşhur
britaniyalı heykəltəraş Toni Kreqqin fərdi sərgisi
açılmışdır.
Azərbaycanın birinci xanımı, Heydər Əliyev Fondunun
prezidenti Mehriban Əliyeva və Fondun vitse-prezidenti
Leyla Əliyeva sərgi ilə tanış olmuşlar.
Sərginin açılış mərasimində çıxış edən Heydər Əliyev
Mərkəzinin direktoru Anar Ələkbərov mərkəzin həyata
keçirdiyi layihələrdən geniş söhbət açmışdır.
Bildirmişdir ki, mərkəz mədəniyyət və incəsənət
nümunələrinin sərgilənməsi baxımından qabaqcıl
məkanlardan birinə çevrilmişdir. Burada dünya şöhrətli
rəssam və heykəltəraşların əsərləri təqdim edilir və
çoxsaylı xarici qonaqlar mərkəzə gələrək həmin əsərlərlə
tanış olmaq imkanı qazanırlar.
Diqqətə çatdırılmışdır ki, Azərbaycanda müasir
incəsənətlə bağlı tədbirlərin keçirilməsi böyük önəm
daşıyır. Müasir İncəsənət Muzeyinin fəaliyyəti, "Fly to
Baku" sərgisi, "YARAT" Müasir İncəsənət Məkanının həyata
keçirdiyi layihələr müasir incəsənətin təbliğində mühüm
rola malikdir.
 Anar
Ələkbərov Heydər Əliyev Mərkəzinin həyata keçirdiyi
layihələrə göstərilən dəstəyə görə Azərbaycanın birinci
xanımı, Heydər Əliyev Fondunun prezidenti Mehriban
Əliyevaya dərin minnətdarlığını bildirmişdir.
Diqqətə çatdırılmışdır ki, bu gün Heydər Əliyev Mərkəzi
Toni Kreqq studiyası ilə birgə əməkdaşlıq layihəsi
çərçivəsində dünya şöhrətli heykəltəraşın əsərlərinin
xüsusi təqdimatını reallaşdırır. Sərginin açılış
mərasiminin müəllifin 65 illik yubileyinə təsadüf
etdiyini qeyd edən Anar Ələkbərov Toni Kreqqi bu
münasibətlə təbrik etmişdir.
Mərasimdə çıxış edən Toni Kreqq sərginin təşkilinə
göstərdikləri dəstəyə görə Azərbaycanın birinci xanımı
Mehriban Əliyevaya və Fondun vitse-prezidenti Leyla
Əliyevaya dərin minnətdarlığını bildirmiş və sərginin
hazırlanmasında əməyi olan hər kəsə təşəkkür etmişdir.
Britaniyalı heykəltəraş Azərbaycanı və sərginin
keçirildiyi Heydər Əliyev Mərkəzini çox maraqlı məkan
adlandırmışdır. Yaradıcılığından, sənətə gəlişindən
danışan Toni Kreqq bu sərgidəki əsərləri böyük arzu və
istəklə yaratdığını söyləmişdir. Bildirmişdir ki,
heykəltəraşlıq obyektlərin sakitliyini təcəssüm etdirsə
də, incəsənət sahəsi kimi dinamik inkişaf edən
istiqamətlərdən biridir.
Azərbaycan Dövlət Rəssamlıq Akademiyasının rektoru, xalq
rəssamı, akademik Ömər Eldarov Toni Kreqqin əsərlərini
monumental, ekspressiv, gözəl, eyni zamanda, zərif
incəsənət nümunələri adlandırmışdır. O, Toni Kreqqə
təmsil etdiyi ali təhsil müəssisəsinin fəxri professoru
diplomunu təqdim etmişdir.
Sonra sərgiyə baxış olmuşdur.
Tonni Kreqq yaradıcılığına həsr olunan sərginin
kataloqunu Mehriban Əliyevaya və Leyla Əliyevaya təqdim
etmişdir.
Bakıda ilk dəfə təşkil olunan ekspozisiyada müəllifin 28
əsəri sərgilənir. Artıq aprelin 6-dan Bakıda olan Toni
Kreqq sərginin tərtibatında özü bilavasitə iştirak
etmişdir.
Sərgi Heydər Əliyev Mərkəzində xüsusi kompozisiyada
təqdim olunur. Mərkəzin parkında, eləcə də foyedə
müəllifin bir neçə əsəri izləyiciləri sərgiyə doğru
istiqamətləndirərək burada sənətsevərlər üçün xüsusi
ab-hava yaratmışdır.
Ekspozisiyanın açılışı ərəfəsində Toni Kreqqin
yaradıcılığına həsr olunan sərginin kataloqu da
hazırlanmışdır. Heydər Əliyev Fondunun vitse-prezidenti
Leyla Əliyevanın bu kataloqda yer aldığı fikirləri
diqqəti xüsusilə cəlb edir. Leyla Əliyevanın kataloqda
yer alan qeydlərində deyilir ki, geniş auditoriyaya
dünya incəsənət incilərinin təqdim edildiyi, müntəzəm
olaraq sərgilərin keçirildiyi nadir və gözəl binada -
Heydər Əliyev Mərkəzində bu dəfə müasir incəsənətin ən
xarizmatik və nüfuzlu simalarından olan tanınmış
heykəltəraş Toni Kreqqin əsərləri sərgilənəcəkdir. Siz
valehedici və cazibədar sənət nümunələrinin � polad,
şüşə, keramika, ağacdan hazırlanmış və qarışıq
kompozisiyalarda müxtəlif formalı heykəltəraşlıq
əsərlərinin əhatəsində olacaqsınız. Əminəm ki, müasir
incəsənətin heyranedici mühiti hər birinizin yaddaşına
unudulmaz təəssüratlarla həkk olunacaqdır.
Azərbaycan paytaxtında müasir incəsənət sahəsinə səmimi
bir marağın olduğunu qeyd edən Leyla Əliyeva bu
istiqamətdə sərgilərin artıq ənənəyə çevrildiyini,
təşkil olunan hər yeni tədbirin cazibədarlığı və şövq
gətirən ab-havası ilə seçildiyini bildirmişdir.
Nəşrdə, həmçinin Toni Kreqq yaradıcılığı haqqında
məlumat verilir.
Toni Kreqq 1949-cu il aprelin 9-da Böyük Britaniyanın
Liverpul şəhərində anadan olmuşdur. O, 1966-1968-ci
illərdə Milli Kauçuk İstehsalı Tədqiqat Assosiasiyasında
texnik işləmişdir. Sənətin sirlərini Çeltnem şəhərindəki
Qlosterşir İncəsənət Kollecində öyrənməyə başlayan Toni
Kreqq daha sonra Uimbldon İncəsənət Məktəbində, Kral
İncəsənət Kollecində təhsil almışdır. O, 1977-ci ildə
Böyük Britaniyanı tərk edərək Almaniyanın Vuppertal
şəhərinə köçmüş və sərgilərlə çıxış etməyə başlamışdır.
Görkəmli sənətkar hazırda Düsseldorf İncəsənət
Akademiyasının rektorudur.
Toni Kreqq yaradıcılığının ilk dövründə tullantılardan
və istifadə olunmuş materiallardan, köhnə metal
konstruksiyalardan hazırladığı əsərləri ilə tanınmışdır.
Hazırda onun əsərlərinə dünyanın bir çox yerlərində rast
gəlmək mümkündür. Toni Kreqq böyük, monumental
kompozisiyaların müəllifidir. Onun bürünc, mərmər, ağac,
polad, plastik, keramika, çini və şüşədən hazırlanmış
heykəlləri yalnız muzeyləri deyil, həmçinin London,
Liverpul, Bazel, Vyana, Düsseldorf, Vaşinqton, Nyu-York,
Atlanta, Stokholm və digər şəhərlərin küçə və
meydanlarını, korporasiya və bankların binalarını
bəzəyir.
Müxtəlif ölkələrdə 350-dən artıq fərdi sərgisi təşkil
olunan Toni Kreqq 1988-ci ildə müasir incəsənət
sahəsində məşhur Törner mükafatına, 2007-ci ildə isə
Yaponiyanın İmperator mükafatına layiq görülmüşdür.
Tamaşaçılar üçün aprelin 10-dan açıq olacaq sərgi
avqustun 31-dək davam edəcəkdir.
AzərTAc |
