|
Aprelin 2-də Təhsil Problemləri İnstitutunda ABŞ-ın
ölkəmizdəki səfirinin xanımı Feys Pirs Morningstarla
görüş keçirilib.
Görüşdə xanım Morningstarla şagirdlərin reproduktiv
sağlamlığı, onlara psixoloji xidmətin göstərilməsinə
kömək edəcək layihənin hazırlanması və həyata
keçirilməsi barədə müzakirələr aparılıb.
Təhsil Problemləri İnstitutunun direktoru Qulu Novruzov
hazırkı şəraitdə ölkəmizdə həyata keçirilən təhsil
islahatlarından irəli gələn vəzifə kimi ümumtəhsil
məktəblərinin bir sıra problemlərinin, o cümlədən
şagirdlərin reproduktiv sağlamlığı və onlara psixoloji
xidmətin göstərilməsinin vacib olduğunu qeyd edib. BŞTİ-nin
məktəblərdə psixoloji xidmətin yaxşılaşdırılması ilə
əlaqədar instituta müraciət etdiyi və şagirdlərə
psixoloji dəstək və onların reproduktiv sağlamlığının
keyfiyyətli şəkildə qurulmasının əhəmiyyətli məsələ
olduğu bildirilib. Qeyd edilib ki, layihənin
hazırlanması və həyata keçirilməsi, onun nəticələri,
verəcəyi effekt, tətbiq sahələri, əhatə edəcəyi sosial
kollektivlər və s. kimi məsələlər ətraflı müzakirə
olunmalıdır. Müəllimlər və məktəb rəhbərləri, eləcə də
rayon təhsil şöbələri bu barədə təlimatlandırılmalı və
öyrədici kurslardan keçməlidirlər.
İnstitutun direktor müavini Ənvər Abbasov çıxış edərək
ümumtəhsil məktəblərində reproduktiv sağlamlıq və
psixoloji xidmət məsələlərinin həyata keçirilməsinə
kömək edən fənlərdən və kurikulumlarda məsələnin
qoyuluşundan bəhs edib. Layihə ilə əlaqəli tədqiqatların
aparılmasının vacibliyi, məsələnin kurikulumlarda
qoyuluşu və dərsliklərdə reallaşdırılması vəziyyətinin
öyrənilməsinə ehtiyac olduğu qeyd edilib.
Xanım Feys Morningstar layihənin ilkin variantının
hazırlanması və həmin layihənin əhatə edəcəyi sahələrin
müəyyənləşdirilməsi məsələsinə toxunaraq bildirib ki,
burada şagirdlərin reproduktiv sağlamlığı, onların
özlərinə və başqalarına humanist və qayğıkeş münasibəti,
qadınların liderlik məsələsi və onların təhsilə cəlb
olunması, müəllimlərin və valideynlərin
maarifləndirilməsi kimi məsələlər öz əksini tapmalıdır.
O, şagirdlərin şəxsiyyət kimi inkişafı, elmi biliklərlə
yanaşı, onlara həyati bacarıqların öyrədilməsi, tənqidi
təfəkkürün və emosional sferanın inkişafı barədə də
danışıb.
Görüşdə layihənin ilkin variantının hazırlanaraq növbəti
müzakirəyə təqdim olunması qərara alınıb.
Şəfa KAZIMOVA,
Təhsil Problemləri İnstitutunun böyük elmi işçisi |
