|
 Layihə
əsaslı öyrənmə müəyyən fənnin tədrisi prosesində
şagirdləri real problemlərin tədqiq və təhlil
edilməsinə alışdıran dinamik yanaşma olaraq fənnin daha
müasir, interaktiv və əsaslandırılmış tədrisinə
yönəlmişdir. İngilis dilinin tədrisində artıq öz
təsdiqini tapmış layihə əsaslı öyrənmə bu dilin sinifdə
istifadəsi ilə real həyatda istifadəsi arasında körpü
rolunu oynayır: şagirdlər uyğun situasiyalarda sinifdə
öyrəndiklərini real həyatda tətbiq edərək ünsiyyət qurur
və dil qabiliyyətlərini inkişaf etdirirlər.
Layihənin məqsədindən asılı olaraq şagirdlər müəyyən
tapşırıqların yerinə yetirilməsi zamanı fərdi, cütlər və
ya qruplar şəklində işləməli olurlar. Şagirdlərin qrup
və ya cütlər şəklində işləməsi isə onlarda işin
planlaşdırılması, təşkili, problemin həll edilməsi,
danışıqlar aparmaq və ya görüləcək işlər haqqında ümumi
qərarların verilməsi, məsul tərəflərin, işin uğurlu
aparılması üçün fəaliyyət planının müəyyən edilməsi,
görülmüş işlərin hesabatının aparılması kimi vərdişlər
yaradır və beləliklə də şagirdlər ingilis dilinə
yiyələnməklə yanaşı təşkilatçılıq, liderlik kimi
bacarığa malik olurlar. Layihə işinin əməkdaşlıq
çərçivəsində aparılması sayəsində dil bacarıqları ən
aşağı səviyyədə olan şagird də ümumi işə öz töhfəsini
verməyə çalışır, onda fənnə olan maraq artır və nəticədə
şagirdin inkişafında dönüş yaranır. Dərs dediyim
siniflərdə şagirdlərlə beynəlxalq və yerli layihələrdə
iştirak edərkən onların dil qabiliyyətlərinin fərdi
şəkildə hər dörd məzmun xətti üzrə dinamik inkişaf
etdiyini müşahidə etmişəm. Ümumiyyətlə, layihə əsaslı
öyrənmə, mənə görə, şagirdyönümlü təlim mühitinin
yaradılması üçün əvəzsiz metoddur. Şagirdlərin
forumlarda ünsiyyət qurması, müxtəlif Web 2.0
alətlərindən istifadə edərək təqdimatlar, slaydlar,
video və qrafiklər, bloqlar, qloqlar və elektron
kitablar hazırlaması onlarda İKT bacarıqlarını inkişaf
etdirməkdə ən böyük yardımçımız olur. Son 5 ildə
iştirak etdiyimiz AzETA, İEARN, İREX təşkilatlarının
inkişafyönümlü təhsil layihələri, "Orqanik bağ", "Gələcək
üçün meşələr", "350.org" və s. kimi ekologiya ilə bağlı
layihələrdə, "Global Power Shift" beynəlxalq İstanbul
sammiti, "İNEPO" ətraf mühitin mühafizəsi üzrə VII
Beynəlxalq Layihə Olimpiadası şagirdlərin ingilis dili
və İKT bacarıqlarını inkişaf etdirməklə yanaşı onlarda
təbiətə sevgi, təbiəti mühafizə etmək, kimyasız qida,
təmiz hava və sağlam həyat əldə etmək və eyni zamanda
təhlükəsi gözlənilən ərzaq çatışmazlığı ilə
qarşılaşmamaq üçün təkrar istifadə sistemini öyrənmə,
təbii sərvətlərə qayğı ilə yanaşmaq kimi keyfiyyətlər
formalaşdırmaqda böyük rolu olmuşdur.
2013-2014-cü tədris ilinə isə məktəbimiz yeni
əməkdaşlıqla qədəm qoydu. Avropa təhsil sisteminin
üstünlüklərindən faydalanmaq və Avropa məktəbləri ilə
əməkdaşlıq etmək üçün Avropanın fasiləsiz təhsil
proqramının bir hissəsi olan "eTwinning Plus"
layihəsinə qoşuldu. "eTwinning" Avropa məktəblərinin
onlayn xidmətlər və informasiya-kommunikasiya
texnologiyalarından istifadə edərək əməkdaşlıq
etmələrinə geniş imkanlar yaradan təhsil şəbəkəsidir. O,
2005-ci ilin yanvar ayında Avropa Komissiyasının
elektron təhsil proqramı əsasında yaradılıb və Avropa
İttifaqının fasiləsiz təhsil proqramını əks etdirən bir
layihədir. Avropanın 95 mindən artıq məktəbini 25
mindən artıq təhsil layihəsində birləşdirərək "eTwinning"
təhsil və İKT sahəsində böyük uğurlara və geniş
əməkdaşlıqlara yol açmışdır. Şəbəkə əhatə dairəsini
genişləndirərək 2013-cü ildə daha 6 ölkəni öz üzvlüyünə
qəbul etdi və onları "eTwinning Plus" layihəsi altında
birləşdirdi. "eTwinning Plus" layihəsinin əsas məqsədi
xüsusi platforma vasitəsilə 33 Avropa ölkəsindən olan
məktəbləri Azərbaycan və digər 5 ölkə məktəbləri ilə
birləşdirmək və müştərək layihələr icra etməkdir. Bu,
təhsil qurumları ilə ünsiyyət, əməkdaşlıq, daha müasir
layihə əsaslı təhsil və Avropanın ən mükəmməl pedaqoji
ictimaiyyətinə inteqrasiya imkanları yaradan "eTwinning"
proqramının genişləndirilmiş formasıdır. Azərbaycanda bu
layihəni Təhsil Nazirliyinin əməkdaşlığı ilə "Mədəd-Azərbaycan"
təşkilatı həyata keçirir. Bu təşkilatın vasitəçiliyi ilə
2013-2014-cü tədris ilində Azərbaycanın infrastruktur
şəraiti imkan verən 20 "elektron məktəb"inin müəllimləri
bu layihələrə cəlb edilmişdir. Bu məktəblər sırasında
İsmayıllı şəhər 1 nömrəli orta məktəbin yeganə region
məktəbi olması isə təbii ki, biz müəllimlərin üzərinə
böyük məsuliyyət qoyur. Portalda rəsmi qeydiyyatdan
keçdikdən sonra müəllimlər asanlıqla şagirdlərini üzv
olaraq qəbul edib onların yaş qrupuna, maraq dairəsinə
və əhatə kateqoriyasına uyğun seçdikləri layihədə
təlimata uyğun tədbrilər həyata keçirir, layihə
iştirakçısı olan ölkələrin məktəbləri ilə təcrübə və
fikir mübadiləsi edə bilərlər. Ən uğurlu layihələr
seçilib mükafatlandırılacaq, eyni zamanda, ən fəal və
həvəsli müəllimlər "eTwinning" iştirakçıları üçün
keçiriləcək müxtəlif beynəlxalq tədbirlərdə iştirak
etmək şansı əldə edəcəklər. Daha uğurlu fəaliyyət
nümayiş etdirmələrinə dəstək olmaq üçün "Mədəd-Azərbaycan"
təşkilatı müəllimlər üçün onlayn treninq sessiyalar,
vebinar və təlimlər həyata keçirir, müəllimlərin
beynəlxalq təlimlərdə iştirakına imkanlar yaradır. Belə
təlimlərdən biri də 26-29 sentyabr tarixlərində Polşa
Respublikasının Krakov şəhərində keçirilən "eTwinning
Plus Contact Seminar" - əlaqələndirici seminar oldu. Mən
də "eTwinning Plus" layihəsinin yeni iştirakçısı kimi
Azərbaycandan olan nümayəndələrlə birlikdə bu seminarda
iştirak etmək imkanı əldə etdim. Seminarın
keçirilməsində məqsəd layihədə iştirak edəcək
müəllimlərin bir-biri ilə tanışlığı və əməkdaşlığı, İKT-nin
təhsildə tətbiq edilməsində yeniliklərlə tanışlıq,
layihə zamanı istifadə ediləcək TwinSpace, işçi masası
və digər "eTwinning Plus" alətlərindən uğurlu istifadəni
təmin edən təlimlərin keçirilməsi, yeni layihələrin
işlənib təqdim edilməsi və yeni tərəfdaşların
qazanılmasına yardım etmək idi. Seminarı "eTwinning
Plus" layihəsinin perspektivli inkişafına zəmanət verən
uğurlu bir addım hesab etmək olar. Çünki əməkdaşlıq
etdiyimiz iştirakçılarla canlı ünsiyyət, uğur qazanmış
və qalib gəlmiş layihə iştirakçıları ilə söhbət, fikir
mübadiləsi aparmaq həqiqətən bizdə böyük motivasiya
yaratdı. Artıq məktəbimizin 20-dən artıq müəllimi
müxtəlif kateqoriyalar üzrə "eTwinning Plus"
layihələrində şagirdləri ilə birgə iştirak edir.
Öyrəndiklərimizi paylaşaraq və layihələrdə tətbiq edərək
layihə əsaslı tədrisin nəticələri ilə təlim proqramları
əsasında şagirddə əldə etdiyimiz bilik, bacarıq və
nailiyyətlər arasında uğurlu bir körpü yarada bilirik və
bu nəticələrə söykənərək layihə əsaslı öyrənmənin
ingilis dili fənni üzrə tədris planına daxil edilməsini
təklif edərdik.
Ruhiyyə MAHMUDOVA,
İ.Həsənov adına İsmayıllı şəhər
1 nömrəli tam orta məktəbin ingilis dili müəllimi
|
