|
 Cavanşir
Cahangir oğlu Səfərov 1997-ci il yanvarın 23-də Bakıda
anadan olub. O, uşaq yaşlarından idmanın qılıncoynatma
növünə böyük həvəs göstərib. Cavanşir marağı olduğu
idman növünün sirlərini atası, 8 nömrəli
İxtisaslaşdırılmış Olimpiya Ehtiyatları Uşaq-Gənclər
İdman Məktəbinin qılıncoynatma bölməsinin müəllimi
Cahangir Səfərovdan öyrənməyə başlayıb. 10 yaşından bu
məktəbin qılıncoynatma bölməsinə yazılıb.
Dəfələrlə ölkədaxili yarışlara qatılan və həmin
yarışlarda uğurlar qazanan Cavanşir 2010-cu ildən 2014-cü
ilə kimi Azərbaycan çempionatlarında iştirak edərək I
yerin sahibi olub. 2011-ci ildə Türkiyənin Bursa
şəhərində 10 ölkənin iştirakı ilə keçirilən beynəlxalq
turnirdə II yerə çıxıb. Bundan başqa o, 2013-cü ildə
Gürcüstanın Tbilisi şəhərində 15-ə yaxın ölkənin
iştirakı ilə keçirilən beynəlxalq turnirdə III yeri
tutub. Həmyerlimiz bu yaxınlarda İran İslam
Respublikasının Tehran şəhərində 15-ə yaxın ölkədən 38
idmançının qatıldığı Dünya kuboku yarışında iştirak
edərək fəxri kürsünün II pilləsinə qalxıb. Cavanşir
2015-ci ildə ölkəmizdə keçiriləcək Avropa Olimpiya
Oyunlarına hazırlaşır. Arzusu bu mötəbər yarışda
Azərbaycanımızın üçrəngli bayrağını zirvələrə
qaldırmaqdır. Biz də ona uğurlar arzulayırıq.
R.ZİYADOV,
"Azərbaycan müəllimi" |
