|
Bu günlərdə V.Korolenko adına Mərkəzi Şəhər Gənclər
Kitabxanasında "Yaşıl dünyamız" mövzusunda "dəyirmi
masa" keçirilib.
Təhsil Nazirliyinin Respublika Ekoloji Tərbiyə və
Təcrübəçilik Mərkəzi və yuxarıda adıçəkilən kitabxananın
birgə təşkilatçılığı ilə keçirilən tədbirdə alim və
mütəxəssislər, RETTM-nin və Binəqədi rayonunda fəaliyyət
göstərən kitabxanaların əməkdaşları, müəllimlər,
şagirdlər, o cümlədən "Eko-klub"un və "Ətraf mühit və
insan sağlamlığı" dərnəyinin üzvləri iştirak ediblər.
Qeyd etmək lazımdır ki, təhsil müəssisələri və
kitabxanaların birgə əməkdaşlığı ilə təşkil edilən
kütləvi tədbirlərin məktəblilərin ekoloji
maarifləndirilməsində xüsusi rolu vardır. Bir neçə ildir
ki, Təhsil Nazirliyi Respublika Ekoloji Tərbiyə və
Təcrübəçilik Mərkəzinin və Mədəniyyət və Turizm
Nazirliyi V.Korolenko adına Mərkəzi Şəhər Gənclər
Kitabxanasının birgə əməkdaşlığı ilə yaradılmış
"Eko-klub"un üzvləri, alimlər, mütəxəssislər və
yazıçılarla müxtəlif ekoloji mövzularda müntəzəm olaraq
görüşlər, yeni nəşrlərin müzakirələri və yaşıllaşdırma
tədbirləri keçirilir. Ətraf mühitin qorunmasına və
davamlı istifadəsinə aid yeni nəşrlərin gənclər arasında
təbliğ edilməsi ekoloji biliklərinin möhkəmlənməsinə
imkan yaradır. "Dəyirmi masa"ya dəvət olunmuş qonaqlar -
Təhsil Nazirliyi Tərbiyə və məktəbdənkənar müəssisələrlə
iş şöbəsinin baş məsləhətçisi Elnur Əlizadə, Respublika
Ekoloji Tərbiyə və Təcrübəçilik Mərkəzinin direktoru Əli
Şükürov, Binəqədi Rayon Mərkəzləşdirilmiş
Kitabxana Sisteminin direktoru Rəna Bilyandarlı,
Ekologiya və Təbii Sərvətlər Nazirliyi İxtisasartırma və
İxtisaslaşma İnstitutunun meşəçilik şöbəsinin müdiri
Allahverdi Dolxanov və başqaları məktəblilərin ekoloji
maarifləndirilməsi istiqamətində görülən işlər,
Azərbaycanda meşələrin qorunması sahəsində həyata
keçirilən tədbirlər haqqında ətraflı məlumat veriblər.
Maraqlı diskussiya şəraitində keçən tədbirdə İDEA
İctimai Birliyinin çağırışına qoşulan məktəblilərin
"Yaşıl Azərbaycan" devizi altında yaşıllaşdırma
aylıqlarında fəal iştirakına və meşələrin qorunmasında
"Gənc meşəçilər" dəstələrinin fəaliyyətinə həsr olunmuş
təqdimat da böyük maraqla qarşılanıb. "Eko-klub"un
üzvləri və Bakıdakı 3 nömrəli məktəbin şagirdlərinin
çıxışlarında Azərbaycanın işğal olunmuş təbiət
guşələrindən, Qarabağ meşələrindən bəhs olunub.
Məktəblilərin ifasında təqdim olunan "Qarabağ",
"Xarı-bülbül" və s. şeirlər, ekoloji səhnəciklər təbiətə
təcavüz edənlərə qarşı etiraz olaraq səslənib.
Tədbirin sonunda RETTM-nin əməkdaşları tərəfindən
Binəqədi rayonu üzrə kitabxanaların nümayəndələrinə və
məktəblilərə "Məktəb meşəçiliyinin yaradılması",
"Meşənin həyatı" adlı vəsaitlər və posterlər,
"Azərbaycanın təbiət gözəllikləri" adlı videofilmlərin
DVD diskləri, "Təbiəti qoruyun" və "Dağların
biomüxtəlifliyi" adlı tematik təqvimlər təqdim olunub.
Hicran ƏKBƏROVA,
"Azərbaycan müəllimi" |
