|
 Azərbaycandan
bir qrup müəllim 15-23 mart 2014-cü il tarixlərində
Böyük Britaniyanın Saint Mary’s Universitetində təlim
səfərində olmuşdur.
Nümayəndə heyətinin tərkibinə Təhsil Nazirliyinin İnsan
resursları şöbəsinin müdiri Fərzəli Qədirov, Britaniya
Şurasının təhsil proqramlarının rəhbəri Gülşən
Hüseynova, Salyan şəhər 7 nömrəli məktəbin ingilis dili
müəllimi Səidə Mirzəyeva, Bakı şəhəri 18 nömrəli
məktəbin ingilis dili müəllimi Fatimə Məmmədova,
Zaqatala şəhər Zərifə Əliyeva adına liseyin ingilis dili
müəllimi Xuraman Muradova, Lənkəran şəhər 4 nömrəli
Humanitar təmayüllü məktəb-liseyin ingilis dili müəllimi
Aynur Axundova, Bakı şəhəri 304 nömrəli məktəb-liseyin
ingilis dili müəllimi Ülkər Əliyeva, Şəki şəhər 8
nömrəli tam orta məktəbin ingilis dili müəllimi Ülkər
Əliyeva, Bakı şəhəri 132-134 nömrəli təhsil kompleksinin
ingilis dili müəllimi Mədinə Əhmədova, S.C.Pişəvəri
adına Humanitar fənlər gimnaziyasının ingilis dili
müəllimi, təlim-tərbiyə işləri üzrə direktor müavini
Səbinə Turabova, Bakı şəhəri "Ankara məktəbi"
məktəb-liseyinin ingilis dili müəllimi Çinarə Babayeva,
Bakı şəhəri 23 nömrəli məktəbin ingilis dili müəllimi
Lalə Ləbibova, Xaçmaz şəhər 8 nömrəli məktəbin ingilis
dili müəllimi Tamilla Əliyeva daxil olmuşdur.
Təlim səfəri "XXI əsrin müəllimi" proqramı çərçivəsində
İngilis dilinin intensiv tədrisi layihəsinin icra
planına əsasən həyata keçirilmişdir. Layihə çərçivəsində
50 pilot məktəbindən seçilmiş 11 nəfər müəllim Böyük
Britaniyanın London şəhərində Saint Mary’s
Universitetində keçirilən təlimlərə cəlb olunmuşdur.
Qeyd etmək lazımdır ki, İngilis dilinin intensiv tədrisi
layihəsi 2008-ci ildən Bakı şəhərinin 7 pilot məktəbində
başlanmış, yeni proqram və dərsliklər, tədris metodikası
tətbiq edilmişdir. Hazırda pilot məktəblərin sayı,
regionlar da əhatə olunmaqla 50-yə çatmışdır. Ötən
müddət ərzində pilot məktəblərin 800-dək ingilis dili
müəllimi üçün təlimlər təşkil edilmişdir. Böyük
Britaniyadan dəvət olunmuş müstəqil ekspertlər
tərəfindən layihənin monitorinqi aparılmış və nəticələr
yüksək qiymətləndirilmişdir. Eyni zamanda bu layihə
cəmiyyət tərəfindən, o cümlədən valideynlər, müəllimlər,
şagirdlər tərəfindən böyük razılıqla qarşılanmışdır.
Təlim səfərinin ilk günü nümayəndə heyəti universitet
kampusu ilə tanış olmuşdur. Saint Mary’s Universiteti
1850-ci ildən fəaliyyət göstərir. Universitetin qədim və
müasir korpusları, teatrı, idman kompleksləri, olimpiya
hazırlıq mərkəzləri tələbələrin keyfiyyətli təhsil
almasına zəmin yaradır. Universitetin özəl
xüsusiyyətlərindən biri odur ki, burada müxtəlif fənlər
üzrə müəllim hazırlığı və müəllimlərin peşəkar inkişafı
həyata keçirilir. Bu təhsil ocağı məzunlarının işlə
təmin olunma faizinə görə Böyük Britaniyada yüksək
reytinqə malikdir. Belə ki, məzunların 96 faizi
bitirdiyi ildə işlə təmin olunur ki, bu da yüksək
keyfiyyət göstəricisidir.
Müəllimlər üçün təlimlər universitetin əməkdaşı,
təcrübəli təlimçi Kler Brennok tərəfindən aparılmışdır.
Təlim prosesində 4 sahə üzrə (oxu, yazı, dinləmə,
danışıq) müəllimlərə müvafiq kompetensiyalar
aşılanmışdır:
*
ingilis dilində düzgün və sürətli danışıq bacarıqlarının
inkisafı üçün praktik tapşırıqlar;
*
oxu və dinləmə öyrənmə məqsədləri kimi;
*
şagirdlərin motivasiyasının inkişaf etdirilməsi;
*
birgə əməkdaşlığın inkişafı;
*
tələffüzün inkişafı;
*
peşəkar inkişaf üçün tapşırıqlar;
*
sərbəst öyrənmə;
*
tapşırıq əsaslı öyrənmədə yeni yanaşmalar;
*
akademik təqdimat bacarıqlarının inkişaf etdirilməsi;
*
akademik yazı bacarıqlarının inkişaf etdirilməsi;
*
ingilis dilinin tədrisində planlaşdırma;
*
müəllimlərin şagirdlər tərəfindən qiymətləndirilməsi
təcrübəsi;
*
şagirdlərin oxu bacarıqlarının inkişaf etdirilməsi;
*
dilin tədrisində qiymətləndirmənin rolu;
*
yeni sözlərin öyrənilməsində yazının rolu;
*
ingilis dili dərslərində tənqidi təfəkkürün inkişafı;
*
dilin tədrisində İKT-dən istifadə;
*
ingilis dili dərslərində idarəetmə və qiymətləndirmə;
*
kreativ pedaqogika və dil təlimi;
*
vizual nitq texnologiyalarından istifadə etməklə
təqdimat qabiliyyətinin inkişafı;
*
sinfin idarə edilməsi;
*
dərsin planlaşdırılması;
*
səhvlər üzərində iş;
*
xarici dilin təhlili yeni sözlərin tədrisi;
*
fonologiya üzrə iş;
*
çoxsəviyyəli təlim üsulları;
*
dərsin qiymətləndirilməsi;
*
əyləncəli tapşırıqlarla iş;
*
qrup işinin təşkili;
*
qrammatikanın tədrisində uğurlu strategiyalar;
*
peşəkarlığın davamlı inkişafı;
*
elektron lüğətlərdən tədrisdə istifadə.
Təlimin sonunda qiymətləndirmə aparılmış və bütün
iştirakçılar yüksək nəticələr nümayiş etdirmişlər.
Müəllimlərə beynəlxalq səviyyəli sertifikatlar təqdim
edilmişdir. Hər bir müəllim təlim səfəri ilə bağlı
hesabat hazırlamış, təlimlərin son dərəcə əhəmiyyətli
olduğunu bildirmişdir.
Tamilla Əliyeva:
"Təlim çox maraqlı idi. Müxtəlif üsullar, iş formalarını
öyrənmək məqsədilə keçirilən müzakirələr bizim
təcrübəmizin zənginləşməsində böyük rol oynadı. Təlim
bir-birindən maraqlı oyun və tapşırıqlardan istifadə
etməklə müxtəlif formalarda aparılırdı. İndi mən
öyrəndiklərimi bölüşməyə və tətbiq etməyə hazıram".
Çinarə Babayeva:
"Düşünürəm ki, belə təlimlərin təşkili müəllimlərin
inkişafı üçün çox vacibdir. Yeni metodlarla tanışlıq
dərslərin daha da keyfiyyətli olmasına çox kömək edir.
Hər bir müəllim əldə etdiyi yeni bilikləri digər
müəllimlərlə bölüşməklə Azərbaycan təhsilinin inkişafı
üçün böyük addım atmış olar. Bunu nəzərə alaraq mən
məktəbimizdə keçiriləcək növbəti pedaqoji şurada
keçdiyim təlimlə baglı məlumat verəcəyəm".
Səbinə Turabova:
"Biz təlim zamanı müxtəlif texnologiyalar və metodları
öyrəndik. Təlim çərçivəsində London məktəblərindən
birində yerli müəllimlərin dərslərini izlədik. Müxtəlif
dildə danışan tələbələrin ingilis dilini necə
öyrəndiklərinin şahidi olduq. Hər birimiz ayrı-ayrı
dərsləri müşahidə etdik və sonra birlikdə
müşahidələrimizi bölüşdük. Təlim prosesi çox maraqlı
keçdi".
Səidə Mirzəyeva:
"Biz təlim zamanı çox aktiv işləyir, verilən
tapşırıqları qruplar, cütlər və ya fərdi şəkildə yerinə
yetirirdik. Təlimçi ilə birlikdə Londonun bir məktəbində
dərsləri müşahidə etdik. Müşahidə etdiyimiz dərsdə
tətbiq edilən təlim texnologiyaları mənim üçün çox
maraqlı oldu. Təlimdə əldə etdiyim bilik və bacarıqları,
innovasiyaları öz fəaliyyətimdə tətbiq etmək və
həmkarlarım üçün nümunəvi dərs təşkil etməyə
hazırlaşıram".
Fatimə Məmmədova:
"Biz dərslərin səmərəli təşkili və planlaşdırılması,
oxu bacarıqlarının inkişafı, oxu zamanı yeni strategiya
və texnikalardan istifadə, debatların, dialoqların
təşkili, sərbəst mövzularda ünsiyyətin qurulması,
inkişaf səviyyələrinə uyğun tədris materiallarının
seçilməsi üzrə bacarıqlar əldə etdik. Mən bu təlimdən
əldə etdiyim bilik və materiallardan istifadə edərək
dərslərimin daha maraqlı və yaddaqalan olması üçün
çalışacağam. Eyni zamanda "açıq dərs"lər təşkil edərək
müəllim həmkarlarıma yeni dərs üsullarını nümayiş
etdirəcəyəm".
Xuraman Muradova:
"Təlim səfəri çox faydalı idi. Birincisi, kitablardan
haqqında oxuduğumuz və gördüyümüz, dilini şagirdlərimizə
öyrətdiyimiz ölkə indi gözümüzün önündə idi. İkincisi,
öyrəndiyimiz bilikləri dərslərimizdə tətbiq edə bilərik.
Digər tərəfdən isə tipik ingilis ailəsində qaldığımız
müddətdə onların adət- ənənələri, mədəniyyətləri ilə
yaxından tanış olduq. Öyrəndiyim bilikləri digər ingilis
dili müəllimləri ilə paylaşmaq üçün öz məktəbimdə kiçik
bir kurs təşkil etməyi planlaşdırıram. İstərdim ki, belə
kurslar ölkəmizdə də tez- tez təşkil olunsun və
müəllimlər bu imkandan faydalana bilsinlər".
Aynur Axundova:
"Belə bir təlimdə iştirak etmək mənə təcrübəmi
müəllimlərlə bölüşmək imkanı verdi. Həm öz məktəbimin,
həm də AzETA üzvü olan müəllimlərlə təcrübə mübadiləsi
edəcəyəm. Yaşadığım rayon paytaxtdan uzaqda yerləşsə də
ən böyük məqsədim keyfiyyətli tədris sahəsində paytaxt
məktəblərindən geri qalmamaqdır. Yaxın gələcəkdə təlimçi
kimi fəaliyyət göstərməyi də planlaşdırıram".
Ülkər Əliyeva
(Bakı şəhəri 304 nömrəli məktəb): "Təlim mənim üçün
həddən artıq faydalı oldu. Dilin tədrisində müasir
texnologiyalardan istifadə, kommunikativ yanaşmaya
əsaslanan təlim sahəsində kompetensiyalara yiyələndim.
Eyni zamanda Londonun tarixi yerləri və Saint Mary’s
Universiteti ilə tanışlıq məndə böyük təəssürat
yaratdı.Təlim zamanı öyrəndiklərimi dərslərimdə tətbiq
etməyə və tədrisin keyfiyyətini yüksəltməyə
çalışacağam".
Ülkər Əliyeva
(Şəki şəhər 8 nömrəli məktəb): "Təlim iştirakçısı olaraq
bilik və bacarıqlarımı xeyli zənginləşdirdim. Qazandığım
kompetensiyaları məktəbimizin müəllimlərinə aşılamaq
üçün seminar təşkil etməyi, AzETA Şəki filialında digər
məktəblərin müəllimləri üçün təlimlər keçirməyi,
AzETA-nın beynəlxalq konfransında təqdimat keçirməyi,
təlimçi kimi regionlarda müəllimlərlə öz bilik və
bacarıqlarımı bölüşməyi planlaşdırıram".
Lalə Ləbibova:
"Təlim zamanı müxtəlif səviyyəli şagirdlərlə iş, sinfin
idarə olunması, yazı, oxu, dinləmə və danışıq
vərdişlərinin inkişafı sahəsində zəruri bacarıqlara
yiyələndim. Ən əhəmiyyətli cəhətlərdən biri o oldu ki,
biz xarici dilin tədrisi ilə bağlı suallarımıza ətraflı
cavablar aldıq, təlimçi ilə geniş müzakirələr apardıq,
qruplarda işləməklə praktik kompetensiyalar əldə etdik".
Mədinə Əhmədova:
"5 günlük təlimi özüm üçün çox uğurlu sayıram. Belə ki,
əvvəlki biliklərimi təkrarlamaqla yanaşı, yeniliklərə də
yiyələnmişəm. Əsasən aşağı siniflərdə dərs dediyimi
nəzərə alsaq, mənim üçün yeni üsul və texnologiyalardan
geniş istifadə xüsusilə əhəmiyyətli oldu. Əldə etdiyim
bilik və təcrübəni yaxın vaxtlarda Bakı şəhəri 132-134
nömrəli təhsil kompleksindən olan həmkarlarım, daha
sonra isə digər məktəblərdəki ingilis dili müəllimləri
ilə bölüşməyi düşünürəm".
Təlim səfərinin özəl cəhətlərindən biri də hər bir
müəllimin ingilis ailələrində qalması, həmin ailələrdə
onlar üçün otaqların ayrılması və şəraitin təmin
edilməsi, ingilis dili daşıyıcıları ilə birbaşa ünsiyyət
imkanlarının yaradılması olmuşdur. Müəllimlər bir həftə
müddətində ailələrdə yaşamaqla həmin xalqın
adət-ənənəsi, mədəniyyəti ilə tanış olmuş, eyni zamanda
qaldıqları ailələrə Azərbaycan mədəniyyəti və milli
dəyərləri barədə geniş məlumatlar vermişlər.
Müəllimlər təlimdən əhəmiyyətli dərəcədə
faydalandıqlarını bildirmiş, belə bir imkanın
yaradılmasına görə Azərbaycan Respublikasının Təhsil
Nazirliyinə və Britaniya Şurasının Azərbaycan
nümayəndəliyinə minnətdarlıqlarını bildirmişlər.
Səfər çərçivəsində nümayəndə heyəti Saint Mary’s
Universitetində müəllim hazırlığı və müəllimlərin
peşəkar inkişafı üzrə departamentlərdə görüşlər
keçirmiş, bu sahədə universitetin təcrübəsi ilə tanış
olmuşdur. |
