|
İsmayıllı rayonunda rayon icra hakimiyyəti başçısının
sərəncamı ilə 2014-cü il "İnnovativ təlim
texnologiyaları ili" elan olunub. Sərəncamın icrası ilə
əlaqədar RTŞ-də silsilə tədbirlər həyata
keçirilməkdədir. Bu tədbirlərdən biri də RTŞ-ın akt
zalında keçirilən "Fizikanın tədrisində riyaziyyatın
tətbiqi və fənlərarası inteqrasiya zamanı innovasiyalar"
mövzusunda seminar-müşavirə olmuşdur. Rayonun ümumtəhsil
məktəblərinin fizika, riyaziyyat müəllimlərinin iştirak
etdiyi seminarı metodik kabinetin direktoru H.Əsədov
açaraq fəndaxili və fənlərarası inteqrasiya haqqında
geniş məlumat vermişdir. Metodistlər R.Məmmədov
"Fizikanın tədrisi zamanı tətbiq olunan əsas riyazi
məsələlər", V.Ağayeva "Riyaziyyatın fizikaya tətbiqində
qarşıya çıxan problemlər və onların aradan qaldırılması"
mövzularında çıxış etmişlər. Sonra tədbir müəllimlərin
iştirakı ilə müzakirə şəraitində davam etmişdir. Gülyan,
Təzəkənd, Talıstan, Topçu kənd tam orta, Qaraqaya,
Balik kənd ümumi orta və digər məktəblərin
müəllimləri çıxış edərək mövzu ilə bağlı fikirləri
bildirmiş, təkliflər səsləndirmişlər.
Tədbiri yekunlaşdıran RTŞ-ın müdiri R.Orucov rayonun
məktəblərində innovativ təlim texnologiyalarının tətbiqi
istiqamətində görülən işlərdən danışmışdır. O, son illər
rayonun 17 məktəbinə prometan (ağıllı) lövhələrin
verildiyini, 25 məktəbin yüksək sürətli İnternetə
qoşulduğunu, məktəblərdə kompüterlərin sayının
artırıldığını, tədris ocaqlarına xeyli sayda proyektor
və digər İKT vasitələrinin verildiyini
bildirmişdir.
R.MƏMMƏDOV,
İsmayıllı RTŞ-ın metodisti |
