|
Novruz bayramı ərəfəsində Azərbaycan Respublikasının
Prezidenti cənab İlham Əliyev tərəfindən imzalanmış
"Azərbaycan Respublikasının ərazi bütövlüyünün,
müstəqilliyinin və Konstitusiya quruluşunun müdafiəsi
zamanı əlil olmuş və Azərbaycan Respublikasının
azadlığı, suverenliyi və ərazi bütövlüyü uğrunda həlak
olan, hərbi əməliyyatla əlaqədar itkin düşən və məhkəmə
tərəfindən ölmüş elan edilən vətəndaşların uşaqlarının
təhsil xərclərinin ödənilməsi haqqında" sərəncam
yüzlərlə azərbaycanlı ailəsinin sevincinə səbəb olub.
Bu sərəncamla ölkəmizin ali təhsil müəssisələrində
bakalavriat və magistratura (tibb təhsilində əsas və
rezidentura) təhsil səviyyələrində və orta ixtisas
təhsili müəssisələrində ödənişli əsaslarla təhsil alan
müvafiq kateqoriyadan olan tələbələrin təhsil xərcləri
2014-2015-ci tədris ilindən etibarən dövlət büdcəsinin
vəsaiti hesabına ödəniləcəkdir. Qeyd olunan sərəncam
müvafiq tələbə kontingentini əlavə ödəniş qayğılarından
azad edir ki, bu da onların təhsil uğurlarının
yüksəlməsinə imkan verəcəkdir.
Azərbaycanda həyata keçirilən sosialyönlü dövlət
siyasətinin daha bir təzahürü olan bu sərəncam ali
təhsil müəssisələrində bakalavriat və magistratura (tibb
təhsilində əsas və rezidentura) təhsil səviyyələrində və
orta ixtisas təhsili müəssisələrində ödənişli əsaslarla
təhsil alan müvafiq tələbələr, eləcə də geniş
ictimaiyyət tərəfindən rəğbətlə qarşılanıb. |
