|
Cari ilin fevral ayının ilk günlərindən Şamaxı
rayonundakı Heydər Əliyev Mərkəzində xüsusi canlanma
hiss olunur. Təhsil Nazirliyinin tövsiyə və tapşırığına
əsasən cari ilin fevral-may aylarında ümumtəhsil
məktəblərinin XI sinif şagirdlərinə dərsdənkənar
vaxtlarda 2 akademik saat ərzində əlavə dərslərin
keçilməsinə başlanmışdır.
Müstəqil Azərbaycan Respublikasının tarixinə aid
seçilmiş mövzuların tədrisi ilə bağlı Heydər Əliyev
parkında start götürən dərslər artıq ikinci aydır ki,
mütəşəkkil qaydada keçirilir. Hər gün bura gələn
şagirdlər dahi rəhbərin heykəli önünə gül dəstələri
qoyaraq mərkəzin foyesindəki eksponatlarla tanış olur,
xatirə şəkilləri çəkdirir və buradan xoş təəssüratla
məktəbə qayıdırlar.
Tədbirə cəlb edilən 10 nəfər qabaqcıl tarix müəllimi
müstəqil Azərbaycan dövlətinin qurucusu və memarı Heydər
Əliyevin tarixi xidmətləri barədə birinci dərslərdə
ətraflı məlumat verir, ikinci saatlarda isə sənədli
filmlər nümayiş olunur.
Tədbirlərdə iştirak edən Şamaxı RTŞ-ın müdiri,
filologiya üzrə fəlsəfə doktoru Eyvaz Eminalıyev ulu
öndərin ən çətin günlərdə xalqla birlikdə olduğundan,
bacarıqlı dövlət xadimi, müdrik sərkərdə kimi
Azərbaycanın nicatını təmin etməsindən, vətəndaş
müharibəsinə necə son qoymasından, Milli Ordu
quruculuğu, Neft Strategiyası sahəsindəki parlaq
siyasətindən danışaraq şagirdlərə tövsiyələr verir.
Dərslərdə Şamaxı Rayon İcra Hakimiyyətinin nümayəndələri
də iştirak edirlər.
Ədalət MƏMMƏDOV,
Şamaxı RTŞ Metodkabinetinin müdiri |
