|
Son illər regionların sosial-iqtisadi inkişafı üzrə
Dövlət Proqramına uyğun olaraq respublikamızın hər
yerində olduğu kimi, Kürdəmirdə də yeni məktəb binaları
tikilib. Onlardan biri Qarasaqqal kənd tam orta
məktəbidir.
Rayonun ən ucqar yaşayış məskənlərindən olan bu kənddə
ilk məktəb 1928-ci ildə tikilib. Daha sonra, 60-cı
illərdə 8 illik məktəb binası inşa edilib.
180 şagird yerlik ikimərtəbəli yeni məktəb binası isə
cari dərs ilinin əvvəlində tikilib istifadəyə verilib.
Müasir tələblərə cavab verən məktəb strukturu yaradılmış
yeni binada 9 sinif otağından əlavə, zəruri
avadanlıqlarla təchiz olunmuş fizika, kimya, informatika
kabinetləri, eləcə də kitabxana, akt və idman zalları
vardır. Bu, məktəbin beşgünlük tədris həftəsində bir
növbədə fəaliyyət göstərməsinə əlverişli şərait yaradıb.
Belə əzəmətli məktəb binasının tikilməsi müəllim və
şagirdlərin, eyni zamanda kənd ictimaiyyətinin çoxdankı
arzusu idi. Hazırda Qarasaqqal kənd tam orta məktəbinin
22 sinif komplektində 271 şagird təhsil alır. Onların
təlim-tərbiyəsi ilə 32 nəfər pedaqoji işçi məşğul olur.
Hicran ƏKBƏROVA,
"Azərbaycan müəllimi" |
