|
Ölkəmizdə nümunəvi ümumtəhsil müəssisələrindən biri
olan Bakı Avropa Liseyində Fənlərarası Təlim
Proqramının (FAT) tətbiqinin 20 illiyi münasibətilə
Azərbaycan Dövlət Akademik Milli Dram Teatrında yubiley
mərasimi keçirildi. Mərasimin bədii hissəsində liseyin
şagirdləri çıxış etdilər. Tədbir qeyri-adi rəqs
nömrələri ilə başlandı. Sonra Bakı Avropa Liseyinin
direktoru, psixologiya elmləri üzrə fəlsəfə doktoru,
əməkdar müəllim Zülfiyyə Veysovanın lisey haqqında
videoçarxı nümayiş olundu.
Aparıcılar qonaqlara liseyin yaranma tarixi və inkişaf
yolu və FAT haqqında danışdılar. Əvvəlcə məktəbin
ibtidai sinif şagirdləri çıxış etdilər. Konsert proqramı
çox zəngin və orijinal çıxışlarla yadda qaldı. İbtidai
sinif şagirdlərini yuxarı siniflərdə təhsil alan
məktəblilər əvəz etdilər. Söylənilən şeirlərdə, oxunan
mahnılarında Azərbaycana, xalqımıza, ana dilimizə və
doğma təhsil ocağına məhəbbət tərənnüm olunurdu.
Rəşad RAMAZANOĞLU,
"Azərbaycan müəllimi" |
