|
 BDU-nun
nəzdindəki "Gənc istedadlar" liseyi yaşının az olmasına
baxmayaraq, çox böyük uğurlar qazanmışdır. Burada təhsil
alan şagirdlərin səsi-sorağı artıq respublikamızın
hüdudlarını aşır. Onlar beynəlxalq olimpiadalarda və
bilik yarışmalarında çıxış edirlər.
Fəaliyyət göstərdiyi müddət ərzində "Gənc istedadlar"
liseyini bitirən məzunların hamısı yüksək nəticə
göstərərək respublikamızın və dünyanın ən nüfuzlu
universitetlərinə daxil olmuşlar. Hazırda Kanada, Rusiya
və Türkiyənin nüfuzlu universitetlərində liseyimizin 13
məzunu müvəffəqiyyətlə təhsil alır. Bu gün təhsil
aldıqları elm ocaqlarından da onların xoş sədaları
eşidilir.
"Gənc istedadlar" liseyinin nümunəvi məzunlarından biri
də İsazadə Nicat Ramiz oğludur. Nicat İsazadə 1995-ci
iyulun 5-də Bakı şəhərində anadan olmuşdur. 2012-ci ildə
BDU-nun nəzdindəki "Gənc istedadlar" liseyini əla
qiymətlərlə bitirib yüksək (657) balla BDU-nun kompüter
elmləri ixtisasına daxil olmuşdur.
Nicat liseydə təhsil alarkən öz təlim-tərbiyəsi,
nizam-intizamı və savadı ilə seçilən şagirdlərdən
olmuşdur. O, ciddiliyi, çalışqanlığı, məntiqi təfəkkürü
ilə də başqalarından fərqlənirdi. Oxuduğu müddət ərzində
heç kəs Nicatın xoşa gəlməyən davranışını, yersiz bir
hərəkətini görməmişdir. Nicat İsazadə dərslərini əla
oxumaqla yanaşı, bilik yarışmalarına və müxtəlif
müsabiqələrə də qatılırdı. 2011-ci ilin aprel ayında
"Ətraf mühitin mühafizəsi" V Beynəlxalq Layihə
Olimpiadasında (5th İnternational Environmental Project
Olympiad, April 6-11, 2011, Baku) bürünc medalla təltif
olunmuşdur.
Bu gün Nicat BDU-nun kompüter elmləri ixtisasının II
kursunda təhsil alır. Birinci kursun yekunlarına görə
onun orta balı 93.10 olmuşdur.
 Nicat
İsazadənin 2013-cü ilin ölkəmizdə
"İnformasiya-kommunikasiya texnologiyaları ili" elan
olunması ilə bağlı Azərbaycan Respublikasının Prezidenti
yanında Elmin İnkişafı Fondu, Azərbaycan Respublikasının
Rabitə və İnformasiya Texnologiyaları Nazirliyi və
YUNESKO üzrə Azərbaycan Respublikasının Milli
Komissiyasi tərəfindən keçirilmiş "İKT sahəsində dərc
olunmuş ən yaxşı elmi işlərə görə mükafat müsabiqəsində"
"R.M.Alguliev, R.M.Aliguliyev, N.R.İsazade
DESAMC+DocSum: differential evolution with self-adaptive
mutation and crossonver parameters for multidocument
summarization // Knowledge-Based Systems, 2012, vol. 36,
pp. 21-38" məqaləsi I yerə layiq görülmüşdür.
Məlumat üçün bildirək ki, alim və mütəxəssislər üçün 5
yer (1-ci yer-1, 2-ci yer-2, 3-cü yer-2)
müəyyənləşdirilmişdir.
Müsabiqə çərçivəsində İKT sahəsində fəal çalışan alim və
mütəxəssislərin fəaliyyətinin stimullaşdırılması
məqsədilə dərc olunan ən yaxşı elmi işlər
qiymətləndirilmişdir. Müsabiqədə akademiya
təşkilatlarından və ali təhsil müəssisələrindən alimlər
iştirak etmişlər. Qaliblərin seçilməsi prosesində Elmin
İnkişafı Fondunun müstəqil ekspertləri, Himayədarlar
Şurası və icraçı direksiyası ilə yanaşı, müsabiqə
təşkilatçıları tərəfindən yaradılmış birgə komissiya da
iştirak etmişdir.
Məqalənin çap olunduğu "Knowledge-Based Systems" jurnalı
dünyanın dörd ən böyük nəşriyyat evindən biri olan
"Elsevier"də nəşr olunur. Dünyada dərc olunan elmi
məqalələrin 25 faizi məhz bu nəşriyyatda çap olunur. Bu
jurnal İmpact Factor göstəricisinə (İF: 4.104. Thomson
Reuters, 2013 Journal Citation Reports) görə dünyada
kompüter elmləri sahəsində nəşr olunan ən nüfuzlu
jurnallardan biridir. Onu da xüsusilə vurğulamaq
lazımdır ki, bu jurnalda azərbaycanlı alimlərin məqaləsi
ilk dəfədir ki, çap olunur. Çap olunmasından az müddət
keçməsinə baxmayaraq, məqaləyə artıq dünyanın "IEEE
Transactions on Magnetics", "Siqnal Processing",
"Chemometrics and Intelligent Laboratory Systems",
"Lecture Notes in Computer Science" və s. kimi nüfuzlu
jurnallarından və konfrans materiallarından istinadlar
olmuşdur.
Bu gün "Gənc istedadlar" liseyinin rəhbərliyi və
pedaqoji kollektivi Nicat kimi yetirmələri ilə fəxr
edir.
Sevinc
ƏLLƏZOVA,
BDU-nun nəzdindəki "Gənc istedadlar" liseyinin müəllimi,
fəlsəfə doktoru |
